ဂၠံၚ်အာရုၚ်စက်တိဗဳလာတ် MCL(GS)
စပ်ကဵုပရိုၚ်ရုၚ်စက်တိဗဳဠာတ် သုၚ်စောဲချးတၟအ်ဏံဂှ် သ္ကာတ်မြဟ်ဂၠိုၚ်ကၠုၚ်အကြာညးဒေသတံ စပ္တံနူဂိတုဒဳဇြေမ်ဗါ သၞာံ ၂၀၁၅ တေံတုဲ ဗွဲမဂၠိုၚ်ဂှ် ဒှ်မံၚ်ဓဝိၚ် စပ်ကဵုအန္တရာဲ ပွမသုၚ်စောဲချးတၟအ်ဂှ်ရောၚ် ဟီုဂးအိုတ်ရ။
မိနဳနဳအံၚ် နူကွာန်ကအ်ဒုန်ဂှ် “ပရိုၚ်ဍေံသုၚ်စောဲချးတၟအ်ဏံဂှ် ကၠာတေံညးတံ ဟွံတီလဝ်ပုဟ်၊ လၟုဟ် ရဲဒေသတံ မိၚ်မံၚ် ဗီုဂှ်ဏောၚ်တှေ် ညးတံ ဖေက်မံၚ်၊ ညးတံဟွံမိက်ကဵုကၠောန်ပုဟ်” သာ်ဝွံ ဟီုရ။
စပ်ကဵုပရိုၚ်ရုၚ်စက်တိဗဳဠာတ် ကၠောန်ကဵုချးတၟအ်ဏံဂှ် ၜိုန်ရဟီုဂးမံၚ်အကြာကွာန်ညးသ္ကံကီုလေဝ် နူလ္ပာ်ကမ္ပဏဳ ရုၚ်စက်တံ ဂွိုအ်သောၚ်က္လးလဝ်တုဲ ချိုတ်တ်ပၠိုတ်တ်ဂှ် ဟီုဟွံမာန်ရောၚ် သ္ကိုပ်အုပ်ဓုပ်ကွာန်ဒေသပွဳပွူရုၚ်စက်တိဗဳ ဠာတ်ဂှ်မွဲတၠ ဟီုရ။
ရုၚ်စက်တိဗဳဠာတ်ဂှ် မဒှ်ကိုန်စဳဇန် က္လိဂွံလဝ်အခေါၚ်ကၠောန် နူကဵုကဝ်မယှေန်ဓလိုက်တမ်ရိုဟ်ကၟိန်ဍုၚ်ဗၟာမွဲတုဲ သွက်သ္ဂောံက္လိဂွံဇြဟတ်ပၟတ်မာန်ဂှ် နကဵုအစဳဇန်ဇကုဇကုကီု၊ ပညဳကဵု ပရေၚ်ကမၠောန်တရးပၟတ်ကီု ကၠောန်ၜိုတ် ရေၚ်တၠုၚ်အာရောၚ် ဂွံတီကေတ်နူကဵုဂကောံအလဵုအသဳတွဵုရးဍုၚ်မန်ရ။
“ဂွံအခေါၚ်ကၠောန်တုဲယျဟီုဂှ် ဗီုလဵုကဵုလဝ်အခေါၚ်ကၠောန်ရော၊ ပိုဲဟွံတီပုဟ်၊ တုဲတှေ် ဇြဟတ်ပၟတ် သွက်ရုၚ်စက် ဂွံဂေတ်ဂှ် ဂွံနူလဵုရော ဟွံကၠးမးပုဟ်၊ ၜိုတ်ဂွံမိၚ်ကေတ်ဂှ်တှေ် ဍေံတံ သုၚ်စောဲချးတၟအ် ချိုတ်ပၠိုတ်မံၚ်ရောၚ်” သာ်ဝွံ ညးစၞးကၠတ်ထဝ် တွဵုရးဍုၚ်မန် ဟွံကဵုဓမံက်ယၟုမွဲတၠ ဟီုကဵုသၞံၚ်တိုၚ်ရ။
ရုၚ်စက်တိဗဳဠာတ်မတ်မလီုဏံဝွံ ဓလိုက်လဝ်တမ်ရိုဟ်သြန်သေံၜါတ် လၟိဟ် (၁၂,၄၀၀) ပြကောဋိကိုဋ်၊ ပွိုၚ်မွဲတ္ၚဲမ္ဂး တိဗဳဠာတ် (၅၀၀၀) တာန် ပ္တိတ်ရောၚ်တုဲ ပ္ဍဲဂိတုမေ (၇)၊ သၞာံ ၂၀၁၃ တေံဂှ် က္လိဂွံလဝ်အခေါၚ်ကၠောန် နူကဵုကဝ် မယှေန်ပရေၚ်ဓလိုက်တမ်ရိုဟ်ကၟိန်ဍုၚ်ဗၟာရ။
နူကဵုဂိတုဂျာန္နဝါရဳ သၞာံ ၂၀၁၄ တေံ စဓမံက်ကၠုၚ်လဝ်ရုပ်ရဴပရေၚ်သိုၚ်ခၞံရုၚ်စက်တိဗဳဠာတ်ဂှ်တုဲ ပ္ဍဲသၞာံ ၂၀၁၆ ၜိုတ် ဂိတုမာတ်တေံမ္ဂး ဗဂေတ်ရုၚ်စက်မာန်ရောၚ် လ္ပာ်ကမ္ပဏဳသိုၚ်ခၞံရုၚ်စက်တံ ဟီုလလောၚ်လဝ်ရ။
