စၟတ်သမ္တီ တ္ၚဲကောန်ဂကူမန် ညံၚ်ဂွံဒှ်တ္ၚဲကၟာတ်ရုၚ်ဗွဲမလုပ်သၞောဝ်ဂှ် ကမ္မတဳကၠောန်ဗဒှ်တ္ၚဲကောန်ဂကူမန် ကဆံၚ် ရးဒေသဇၞော်၊ ကဆံၚ်တွဵုရးတံ ပတိုန်လိက်ဇရေၚ်သမ္မတကၟိန်ဍုၚ်ရောၚ် ဂွံတီကေတ်ရ။

“တ္ၚဲကောန်ဂကူမန်ဂှ် ရဲကောန်ဍုၚ်အရၚ်သီုဖအိုတ် ဂွံပကၠုၚ်စၟတ်သမ္တီကၠုၚ် ကဆံၚ်ဂကူမန်ပိုဲလေဝ် စရာဲမွဲနဲမွဲဗီု ဂှ် ပိုဲတံလေဝ် အတိုၚ်အလုံကောန်ဂကူမန်ပိုဲ မိက်ဂွံဂွံမံၚ်ဂှ် သ္ပကဵုစၞးတုဲ ပိုဲပတိုန်ကဵုလိက်ဏံရ” သာ်ဝွံ နာဲဖေ တေန် ဥက္ကဋ္ဌ ကမ္မတဳကၠောန်ဗဒှ်တ္ၚဲကောန်ဂကူမန် ရးလ္ဂုၚ် ဟီုကဵုသၞံၚ်တိုၚ်ရ။

ပ္ဍဲလိက်ဗစိုပ်သမ္မတကၟိန်ဍုၚ်ဂှ် နူကဵုရးဒေသဇၞော်လ္ဂုၚ်၊ ရးဗ္ဂော၊ ရးတၞၚ်သဳ၊ တွဵုရးဍုၚ်ကရေၚ် ကေုာံ ကဆံၚ် ဗဟဵု တွဵုရးဍုၚ်မန်တံ နကဵုစၟတ်တဲဥက္ကဋ္ဌကမ္မတဳကၠောန်ဗဒှ်တ္ၚဲကောန်ဂကူမန် ကဆံၚ်ၚ်တံပါလုပ်ရောၚ်။

ဥက္ကဋ္ဌ ကမ္မတဳကၠောန်ဗဒှ်တ္ၚဲကောန်ဂကူမန် ရးဗ္ဂော နာဲသိုဝ်တုၚ်ဂှ် “ဂွံဒှ်ကၟာတ်ရုၚ်ဂှ် အောန်အိုတ် ပ္ဍဲတွဵုရး (ဍုၚ် မန်) တေံဂှ် ဒးဒှ်ထေက်မံၚ်ရဏောၚ်။ အာဂတနူဂှ် ပ္ဍဲကဵုဍုၚ် (ဗ္ဂော) ပိုဲလေဝ် ဂွံဒှ်ကၠုၚ်ကီု ပတိုန်လဝ်လိက်ဏံ” သာ်ဝွံ ညးဟီုရ။

ညံၚ်ဂွံပလံၚ်ဗစိုပ်လိက်ဏံ ဇရေၚ်သမ္မတပြဟ်ဟ်မာန်ဂှ် ကမ္မတဳဗဟဵုက္ဍိုက်ပ်တုဲ ပကောံပကေဝ်မံၚ်လိက် နူကမ္မတဳကဆံၚ်ၚ်တံရောၚ် နူကဵုဂကောံကမ္မတဳဗဟဵုတံ ဟီုရ။

“ပိုဲဂှ် သ္ပစၞးပွိုၚ်ဍုၚ်တုဲ ပိုဲပတိုန်ဏောၚ်။ ပွိုၚ်မွဲၜါတ္ၚဲဏံ ပတိုန်ဏောၚ်။ မၚ်မံၚ်ဥက္ကဋ္ဌ ထပက်စၟတ်တဲရဏောၚ်။ လိက်နူကဵုကဆံၚ်နာနာ လိက်တမ် (မူရၚ်း) ဂှ် နွံပ္ဍဲတဲပိုဲရဏောၚ်။ ပိုဲပတိုန်ကဵုသမ္မတတုဲတှေ် လိက်တၞးဆာဲတံ ဂှ် ပိုဲကလေၚ်ကဵု ပွိုၚ်ဍုၚ်နာနာတံပၠန်ဏောၚ်” သာ်ဝွံ နာဲမန်ရာဇာ ဖက်ဆောညးအုပ်ကာ ကမ္မတဳကၠောန်ဗဒှ်တ္ၚဲ ကောန်ဂကူမန် ( ဗဟဵု) ဟီုရ။

ပ္ဍဲကဵုပွိုၚ်ဍုၚ်မတ်မလီုဂှ် တၠကမၠောန်ဂကူမန်တံ ညံၚ်ဂွံကၟာတ်ကဵုရုၚ်ကမၠောန် ပ္ဍဲကဵုစၟတ်သမ္တီတ္ၚဲကောန်ဂကူမန် မာန်ဂှ် ကၠောန်မံၚ်ပရေၚ်ချဳဓရာၚ်စန်ဒက်မံၚ်တၠကမၠောန်တံကီုရောၚ် ကမ္မတဳပွိုၚ်ဍုၚ်မတ်မလီု ဟီုရ။
ကောန်သၟိၚ်သမလ၊ ဝိမလ ကောကဵုဒေံၜါ ပတိုန်လဝ်ဍုၚ်မန်ဟံသာဝတဳ ပ္ဍဲသက္ကရာဇ်သာသၞာ (၁၁၁၆) ဂိတု မာ်မွဲစွေက် တ္ၚဲစန်ဂှ် ဂကူမန်တံသ္ပစၟတ်သမ္တီတ္ၚဲပရဲ ဒဒှ်တ္ၚဲကောန်ဂကူမန်ရောၚ်။