ပ္ဍဲကောံဓရီုကၠတ်ထဝ် တွဵုရးမန်အလန်ဒုတိယ ကောံဓရီုလၟေၚ်ဍာံအလန်တတိယ တ္ၚဲတတိယ ဂိတုအံက်တဝ်ဗာ ၅ ဂှ် သွက်ဂွံတိုန် “တ္ၚဲအ္စာ အလုံဂၠးကဝ်” နူသ္ကိုပ်ဝန်ဇၞော်တွဵုရးဍုၚ်မန် အာတ်ပါတ်အခေါၚ် ကၠတ်ထဝ်တုဲ ဟိုတ်နူတိုန်စိုပ်လဝ်ဟွံမွဲဂှ်ရ ညးစၞးကၠတ်ထဝ် ၂ တၠ ဒ္စဵုဒ္စး ကိစ္စပါန်အခေါၚ်ဂှ်ရ။

ပ္ဍဲကောံဓရီုလၟေၚ်ဍာံ အလန်တတိယ ကၠတ်ထဝ်တွဵုရးမန် တ္ၚဲတတိယဂှ် သ္ကိုပ်ဝန်ဇၞော် တွဵုရးဍုၚ်မန် ပါန်လဝ်အခေါၚ် သွက်ဂွံအာတိုန် အသေအဟာန် “တ္ၚဲအ္စာ အလုံဂၠးကဝ်” နွံကၠုၚ်တုဲ ကိစ္စဏံ ပရူပရာလေဝ် ဟွံဆက်စပ် ဟွံတုပ်ညးသ္ကံဂးတုဲ ပ္ဍဲကောံဓရီုကၠတ်ထဝ်ဂှ် ပ္တိုန်စွံလဝ်စၟတ်သမ္တီ ရောၚ် ဂွံတီကေတ်ရ။

ဥူမေန်န်ဥူ သ္ကိုပ်ဝန်ဇၞော်တွဵုရးမန် အလဵုအသဳတၟိ NLD (MNA)

“ဍေံအာတ်အခေါၚ် ကိစ္စဟွံဆက်စပ်ဗီုဏံဂှ် ဂုန်သိက္ခာဍေံစှေ်ဏောၚ်၊ သ္ပဗီုဏံတှေ် ညံၚ်ရဴဟွံရှေ်သှေ် ဟွံသ္ပဂရုကဵု ကဏ္ဍအဝဵုခၞံသၞောဝ်ဂှ်ဏောၚ်၊ ပွဏံ ဍေံဒးပဠေဝ် ဇကုဍေံဏောၚ်၊ ထ္ၜးဟိုတ်တှေ် ဟိုတ်ဍာံဍာံပြပြ အဆက်အစပ်နွံနွံဂှ် ဒးထ္ၜးဏောၚ်” သာ်ဝွံ ဒဝ်တေန်အိ ဥက္ကဌကၠတ်ထဝ်တွဵုရးဍုၚ်မန် ဂးရ။

ယောၚ်ယာလီုဒေက်အာ ပ္ဍဲအရာတိုန်ကၠတ်ထဝ်မ္ဂး အတိုၚ်သၞောဝ် ၜိုန်ကေတ်အရေဝ် ဟွံဂွံကီုလေဝ် ဂွံဒှ်သ္ကိုပ်ဝန်ဇၞော်ဂှ် ဒှ်ကၠုၚ်နူညးစၞးကၠတ်ထဝ် ညးဍုၚ်ကွာန်တံမရုဲစှ်လဝ်ရောၚ်တုဲ တာလျိုၚ်ဇကု ဒးတိုန်ကောံဓရီုကၠတ်ထဝ် သွက်စၞးဒေသမာဲဇကုကီု တာလျိုၚ်တိုၚ်ခဳ ၃ သာ်ဂှ်ကီု ဒးဇြိုဟ်နက် ဒးသ္ပအဲပရဲ ဗွဲတၟေၚ်ရောၚ် သာ်ဝွံ ဥက္ကဌကၠတ်ထဝ်တွဵုရးမန် ဂးရ။

“ပ္ဍဲကဏ္ဍပရေၚ်အုပ်ဓုပ် တွဵုရးမန်ဏံတှေ် ညးတေံ တာလျိုၚ်ဇၞော်အိုတ်ရ။ တုဲပၠန် နွံဒၟံၚ်ပ္ဍဲတွဵုရးမန်ရဏောၚ် ဂှ်လေဝ် ညးဍုၚ်ကွာန်တံ ဆက်ကၠုၚ်လဝ်ဖုၚ်။ သွက်ဂွံတိုန်ကောံဓရီုကၠတ်ထဝ်ဂှ် တာလျိုၚ်ညးတေံ နွံပေၚ်ၚ်ဏောၚ်။ ပရူညးတေံ ပါန်အခေါၚ် ကဵု ဒၞါဲဌာန်ဒေသတံဂှ်လေဝ် တၞဟ်ခြာဒၟံၚ်ဏောၚ် ဒၟါနူဂှ်ရ သ္ပစၞးညးဍုၚ်ကွာန်တံတုဲ ပိုဲဒးဒ္စဵုဒ္စး” သာ်ဝွံ ဥူထောန်မေန်အံၚ် နူဒေသမာဲလၟိဟ်(၁) ပွိုၚ်ဍုၚ်ပံၚ် ဟီုရ။

ကိစ္စကေၚ်ကာ ညးဍုၚ်ကွာန် ၂၀ ကိုဋ်ပြၚ် နွံပ္ဍဲတွဵုရးဍုၚ်မန်ဏံဂှ် ဟိုတ်နူ ဒးသဳ ကၠဳပ္တိုန်ထ္ၜး အပ္ဍဲကၠတ်ထဝ်ဏံဂှ်ရ ကိစ္စလ္ၚဵုလ္ၚဵုဂှ် အလဵုဇကုသ္ကိုပ်ဝန်ဇၞော်ရောၚ် ဒးကဵုသွဟ်တုဲ လၟုဟ် ဟိုတ်နူ ညးတေံ ဟွံတိုန်ကောံဓရီုကၠတ်ထဝ်ဂှ်ရ စိုတ်လီုကွေံကွေံရဂှ်လေဝ် ဥူမေန်ထောန်အံၚ် ဆက်ဟီုရ။

သ္ကိုပ်ဝန်ဇၞော် ဥူမေန်န်ဥူဝွံ ပ္ဍဲကောံဓရီုကၠတ်ထဝ် တ္ၚဲဒုတိယဂှ်လေဝ် အာတ်ပါန်လဝ်အခေါၚ် သွက်ဂွံအာစၟဳစၟတ် ဂၠံၚ်ဍာန် သ္ကုတ် ဇြပ်ဗု-ရေဝ်။ ပ္ဍဲအံၚ်တဝ်ဗာ ၆/၇ ပၠန်လေဝ် သွက်ဂွံတိုန် ပေါဲသဳကၠဳ “ပရေၚ်ကမၠောန်ဗၞိက်ပယျဵု” ပ္ဍဲဍုၚ်လ္ဂုၚ်။ ဆဏံသၟးဟွံသေၚ် ပ္ဍဲတ္ၚဲကောံဓရီု (ကၠတ်ထဝ်တွဵုရးမန်အလန်ဒုတိယ ကောံဓရီုလၟေၚ်ဍာံ အလန်တတိယ) တၞဟ်ဟ်ဂှ်လေဝ် အာတ်လဝ်အခေါၚ်နွံဒၟံၚ်ဏီ သာ်ဝွံ ဂွံတီကေတ် နူကမ္မတဳစၟဳစၟတ်ကၠတ်ထဝ် ကၠတ်ထဝ်တွဵုရးဍုၚ်မန်ရ။

ကၠတ်ထဝ်တွဵုရးဍုၚ်မန် အလန်ဒုတိယ ကောံဓရီုလၟေၚ်ဍာံ အလန်တတိယဝွံ စကၠောန်လဝ် နူအံက်တဝ်ဗာ (၃) မံက်ဂှ်တုဲ ဆက်ကၠောန်ဒဵုကဵု အံက်တဝ်ဗာ (၇) ရောၚ် ရဴဝွံ ဂွံတီကေတ် နူဥက္ကဌ ကၠတ်ထဝ် တွဵုရးဍုၚ်မန်ရ။