ဂိတုဖေဖဝ်ဝါရဳ စၟတ်တ္ၚဲ (၂၆) တ္ၚဲဏအ်ဝွံ ပ္ဍဲကဵုကမ္မရဳ၊ ကွဳစက်ထပၠုပ်ကောန်ဍုၚ်ဗၟာ ညးကၠတ်လုပ်ဍုၚ်သေံမွဲဖ္ဍိုက်ဗ္ကပ်တုဲ မၞိဟ်ဒးဘဲဝပ်နွံကၠုၚ်လဝ်ဗွဲမဂၠိုၚ်ရောၚ် ပရိုၚ်သေံဂမၠိုၚ် ပ္တိုန်ထ္ၜးလဝ်ရ။

တ္ၚဲဏအ် အခိၚ်နူဂယး ၜိုတ် (၇) နာဍဳဂှ်ဝွံ အကြာကမ္မရဳကဵု သာဲယျော် ပ္ဍဲကွာန်ဝါန်ဒံၚ်၊ အရာပ်ၜါန်နံၚ်သာန်ဖရာန်ဂှ် ကွဳစက်ထပၠုပ်ကောန်ဍုၚ်ဗၟာ အဃောဂြိပ်မံၚ်ဗၠာဲသၟိၚ်သေံ ဟိုတ်နူဒဳအသိၚ်ထတ် ဗ္ကပ်စှေ်သ္ကဲဂၠံၚ်တုဲ ကောန်ဍုၚ်ဗၟာ ညးပါဗက်ကၠုၚ်ဗွဲမဂၠိုၚ်ဂှ် ဒးလဝ်ဘဲဝပ် (၂၀) တၠ ပြၚ်နွံရောၚ် ဂွံတီကေတ်ရ။

ပ္ဍဲကဵုကွဳစက်ထပၠုပ်မၞိဟ်မွဲဖ္ဍိုက်ဏအ်ဝွံ ကောန်ဍုၚ်ဗၟာ ညးဍိုက်ပါဗက်ကၠုၚ် မၞိဟ်တြုံ၊ မၞိဟ်ဗြဴ လၟိဟ်ဗဒဲါ (၆၀) တၠနွံတုဲ ညးဒးလဝ်ဘဲဝပ်အသိၚ်ကွဳစက်ဗ္ကပ် ကာတၟေၚ်တအ်ဂှ် နူကဵုဂကောံရီုဗၚ်ဟံၚ်ပြာ်မၞိဟ်သေံတအ် ပလံၚ်ပစိုပ်ဏာရုၚ်ဂဥုဲ “ဖှာဟော်ဖဝ်လက်ပါယုဖာသေနာ” တေံရ။

ကောန်ဍုၚ်ဗၟာ ညးဟွံဒးဘဲဝပ်တအ်ဂှ် ဗၠာဲသၟိၚ်သေံတအ် ရပ်ထိၚ်စၟဳစၟတ်မံၚ် တၞးလိက်သက်သဳ ပ္ဍဲရုၚ်ဗၠာဲသၟိၚ်ကမ္မရဳတုဲ ဃံၚ်ညးထပၠုပ်မၞိဟ် ဂြိပ်ဗၠးအာတအ်ဂှ် ဆက်ဂၠိုက်ဂၠာဲ ကေတ်အာအရေဝ်ရောၚ် ဂွံတီကေတ်ရ။

ညးလုပ်တိတ်ဍုၚ်သေံ နကဵုသၞောဝ်တအ်ကီု ဟွံလုပ်ကဵုသၞောဝ်တအ်ကီုဂှ် ဟိုတ်နူဒးဆဵုဂ္ဗကဵု ဘဲအန္တရာဲကွဳစက်ဗ္ကပ်တုဲ ညးဒးဘဲဝပ်ချိုတ်ဂျိုၚ်လဝ် နွံကၠုၚ်ဗွဲမဂၠိုၚ်ရ။

လ္ပါ်ကဵုပယျဵုသေံ-ဗၟာ ဒေသကျာ်ပိ မွဲဒမြိပ်ဂၠံၚ်သၚ်္ခဠၜူရဳ၊ ကမ္မရဳဂှ်မ္ဂး ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီု ဒေသပယျဵုတအ် ဟိုတ်နူပတေၚ်လဝ်ပရေၚ်ဂီုကၠီုတုဲ စၟဳစၟတ်ရပ်စပ်ဂွံမံၚ် ကောန်ဍုၚ်မန်ဗၟာ ညးကၠတ်လုပ်ဍုၚ်သေံတအ် အဆက်က်နွံကၠုၚ်မံၚ်ရောၚ် ဂွံတီကေတ်ရ။