နူကဵုဇာနှိက်သၟတ်တွဵုရးဍုၚ်မန် (မွန်ပြည်နယ်လူၚယ်လူမှုကွန်ရက်) သ္ပက္ဍိုပ်တုဲ သွက်ဂွံပဠေဝ် ဗပေၚ် သ္ပဒ္တန် မူဝါဒအပြောံသၟတ်တွဵုရးဍုၚ်မန်ဂှ် ပ္ဍဲဂိတုနဝ်ဝေမ်ဗာ ပထမသတ္တဟဏံ ကၠောန်ပေဲါသဳကၠဳ (ဖိုဝ်ရာမ်) မွဲ သွက်ဂွံရုဲညးစၞးသၟတ်တံရောၚ် ဂွံတီကေတ်နူ ကမ္မတဳကၠောန်ဗဒှ်တံဟီုထ႟႟္ၜးလဝ်ဂှ်ရ။

နူဖိုဝ်ရာမ်ဏံ သ္ပဒ္တန်မူဝါဒအပြောံသၟတ်တွဵုရးဍုၚ်မန်ဂှ်တုဲမ္ဂး သွက်ဂွံအာလုပ်သဳကၠဳ ပ္ဍဲဖိုဝ်ရာမ်မူဝါဒသၟတ် လက္ကရဴအိုတ် အလုံဍုၚ်ဗၟာ မကၠောန်သ္ပ ပ္ဍဲနေပျဳဒဝ် ဂိတုနဝ်ဝေမ်ဗာ ဒုတိယသတ္တတေံရောၚ် ဂွံတီလဝ် နူညးမၞုံတာလျိုၚ်တံရ။

“ပိုဲချဳဒရာၚ်ဒၟံၚ်လၟုဟ်ဂှ် ဒှ်သွက်မူဝါဒသၟတ်တွဵုရးမန်ရ၊ မူဝါဒအပြောံ သ္ပလဝ်ဒ္တန်ပ္ဍဲဝှိုဝ်ရာမ်ဏံဂှ် ပိုဲဂွံတုဲတှေ် စၞးတွဵုရးဇကု ဒးအာသဳကၠဳပ္ဍဲဝှိုဝ်ရာမ် နေပျဳဒဝ်တေံဏောၚ်၊ ကၠောန်ပ္ဍဲနေပျဳဒဝ်တေံဂှ် ပံၚ်ကၠောန်ကဵု ဌာနဝန်ဇၞော်ဏောၚ်တုဲ မူဝါဒ နူတွဵုရးတၞဟ်ဟ်တံလေဝ် သဳကၠဳပ္ဍဲဂှ်ဖအိုတ်ရ၊ နူဂှ်မွဲတဆံၚ် ညံၚ်ဂွံဒှ်မူဝါဒသၟတ် အလုံမွဲဍုၚ်ဂှ် ဒးဆက်သဳကၠဳပၠန်ဏောၚ်” သာ်ဝွံ ဥူမေန်မျာတ် ညးတာလျိုၚ် ချူခၞံမူဝါဒသၟတ် တွဵုရးဍုၚ်မန် ဟီုရ။

သွက်ဂွံချူမူဝါဒသၟတ် တွဵုရးမန်ဂှ် ဇာနှိက်သၟတ်တွဵုရးမန် သ္ပက္ဍိုပ်တုဲ နူဂိတုသေပ်တေမ်ဗာ (၆) ဒဵုကဵုသေပ်တေမ်ဗာ (၂၉) ဗက်ကေတ်လဝ်လညာတ် ကေုာံ ပရေၚ်အခက်ခုဲသၟတ် တွဵုရးမန် (၁၀) ပွိုၚ်ဍုၚ်တံရ၊ ကြဴနူဂှ် ပံၚ်ဗ္စပ်ကဵု ဂကောံမသ္ပစၞးသၟတ် ပ္ဍဲတွဵုရးမန်တံတုဲ ပ္ညဳပ္ညပ်သဳကၠဳကၠုၚ်ကီုရဂှ်လေဝ် ညးတာလျိုၚ်ဂှ် ဆက်ဟီုရ။

“ပ္ဍဲဝှိုဝ်ရာမ်လၟုဟ်ဏံ သၟတ် (CSO) တံပါဏောၚ်၊ သၟတ်ကောန်ဍုၚ်အရၚ်တံပါဏောၚ်၊ ဂကောံကောန်ဍုၚ်အရၚ်တံလေဝ် ပါဏောၚ်၊ ဘိက်လဝ်သီုဖအိုတ်ရ၊ နူဝှိုဝ်ရာမ်ဏံ ပိုဲရုဲကေတ်မၞိဟ် (၁၂) တုဲ မၞိဟ် (၁၂) ဏံဂှ်ရ အာသဳကၠဳ ပ္ဍဲအဆံၚ်ကၟိန်ဍုၚ်တေံဏောၚ်” သာ်ဝွံ ဒဝ်ခါၚ်ခါၚ်ဠေအ်မျေအ် ညးတာလျိုၚ် ချူမူဝါဒသၟတ် တွဵုရးဍုၚ်မန် ဟီုရ။

တၚ်နွံပၟိက် အရာနွံပၟိက်အဓိက ပ္ဍဲတွဵုရးကေုာံရးဒေသနာနာတံဂှ် အတိုၚ်နူညးဍုၚ်ကွာန်တံ အာတ်မိက်ကၠုၚ်ဂှ်ဟေၚ်ရ အလဵုအသဳ မိက်ဂွံဖန်ကဵု၊မိက်ဂွံကၠောန်ကဵုတုဲ ဂစာန်ဒၟံၚ် သွက်ဂွံချူခၞံ မူဝါဒသၟတ် ဆေၚ်ကဵုအလုံဍုၚ်ဗၟာရဂှ်လေဝ် ဂွံတီကေတ်နူညးမၞုံတာလျိုၚ်တံရ။

ပ္ဍဲအရာချူမူဝါဒသၟတ်ဏံ ပ္ဍဲအဆံၚ်ကၟိန်ဍုၚ်တှေ် ဌာနဝန်ဇၞော်ပရေၚ်ဟံၚ်ပြာ်ကေုာံဖျေံဒၞါဲဝါဲ၊ ဌာနဝန်ဇၞော် ပရေၚ်ထတ်ယုက်ကေုာံပရေၚ်ဝေၚ်ဒြဟတ်၊ ဌာနဝန်ဇၞော်ပရေၚ်ပညာ၊ဂကောံတၠပညာ ကေုာံ ဂကောံ UN တံလေဝ် လုပ်ရေၚ်တၠုၚ်မွဲစွံကီုတုဲ နူဂှ်မွဲတဆံၚ် ပံၚ်ကၠောန်ကဵုဂကောံသၟတ် ပ္ဍဲတွဵုရး ကေုာံ ရးဒေဇၞော်နာနာတံကီုရောၚ် ဂွံတီလဝ်ရ။