ပ္ဍဲအယုက်အထက် ကၠတ်ထဝ်တွဵုရးမန် ညောန်လုပ်ကၠုၚ် (၉) ဂိတုဏံ လိက်တေၚ် နူညးဍုၚ်ကွာန်တံ လုပ်စိုပ်ကၠတ်ထဝ် ရ၀၀ တၞးပြၚ် သာ်ဝွံဂွံတီကေတ်နူကၠတ်ထဝ် တွဵုရးဍုၚ်မန်ရ။

ကောံဓရီု ကၠတ်ထဝ်တွဵုရးမန် အလန်ဒုတိယဂှ် စပ္တံကၠုၚ်နူဂိတုဖေဖဝ်ဝါရဳ ၈ တေံတုဲ စိုပ်ကၠုၚ်ဒဵုကဵု ဂိတုအံက်တဝ်ဗာအိုတ်ဏံ လိက်တေၚ်ဗ္စိုပ် နူညးဍုၚ်ကွာန် ရ၀၆ တၞး စိုပ်ကၠုၚ်ပ္ဍဲကၠတ်ထဝ်တွဵုရးဍုၚ်မန်ရ။

“လိက်တေၚ် စိုပ်ကၠုၚ်ပ္ဍဲပိုဲဂှ် ဗွဲမဂၠိုၚ်တှေ် ပြသၞာတိရ၊ လိက်တေၚ် စိုပ်ကၠုၚ်ပ္ဍဲပိုဲတှေ် ပိုဲကဵုသမ္တီကဵု ဂကောံအလဵုအသဳ မဆေၚ်စပ်တံ၊ ပိုဲကဵုကသပ် ကဵုညးတံတုဲ အရာဒးကၠောန်ဂှ် ဒှ်ကလောန်ညးတံရ” သာ်ဝွံ ဒံက်တာအံၚ်နာၚ်ဥူ ဒုဥက္ကဌ ကၠတ်ထဝ်တွဵုရးဍုၚ်မန် ဟီုရ။

လိက်တေၚ်ဗွဲမဂၠိုၚ်ဂှ် ပရူပြသၞာတိ၊ ပရူသဘာဝပွဳပွူလီုလာ်၊ ကိစ္စပရေၚ်ပူဂဵုတံရ ပါလုပ်ဂၠိုၚ် သာ်ဝွံ ဂွံတီကေတ် နူဒုဥက္ကဌ ကၠတ်ထဝ်တွဵုရးဍုၚ်မန်ရ။

အပ္ဍဲကမ္မတဳဆေၚ်ကဵုပရေၚ်ကၠတ်ထဝ်မန်ဂှ် ကမ္မတဳစၟဳစၟတ်ညးစၞး၊ ကမ္မတဳပရေၚ်ကေၚ်ကာကောန်ဍုၚ်အရၚ်၊ ကမ္မတဳစၟဳစၟတ် ကဵုကသပ်သၞောဝ်ဥပဒေ၊ ကမ္မတဳ ပရေၚ်ပိုန်ဒြပ်ကေုာံ ကိုန်အစဳဇန်ပရေၚ်ဘဏ္ဍာ၊ ကမ္မတဳ ပရေၚ်ထိၚ်ဒဝ်သဘာဝပွဳပွူ၊ ကမ္မတဳ သ္ၚဳဂၠိပ်စၟဳစၟတ် လိက်တေၚ် ကေုာံ လိက်ဒုၚ်ကရုဏာ မပ္တံသာ်ဝွံ ပံက်လဝ်နွံ ရ။

ပ္ဍဲကမ္မတဳသ္ၚဳဂၠိပ်စၟဳစၟတ် လိက်တေၚ် ကေုာံ လိက်ဒုၚ်ကရုဏာဂှ် လိက်တေၚ် စိုပ်ဒၟံၚ် ၄၀၀ တၞးပြၚ်တုဲ အပ္ဍဲဂှ် နကဵုကမ္မတဳ ပသောၚ်ကဵုလဝ် ၜိုတ် ၅၀% ဂးရ။

“ပ္ဍဲကမ္မတဳပိုဲ လိက်တေၚ် စိုပ်ကၠုၚ်ၜိုတ် ၄၀၀ တၞး၊ ပြသၞာတိဂှ် နွံဂၠိုၚ်၊ ပြဟ်ဟ်ဏံ ပသောၚ်လဝ် ၜိုတ် ၅၀%” သာ်ဝွံ ဥူအံၚ်ကျဝ်ဒူ ဥက္ကဌ ကမ္မတဳသ္ၚဳဂၠိပ်စၟဳစၟတ် လိက်တေၚ်ကေုာံလိက်ဒုၚ်ကရုဏာ ဟီုရ။

ပ္ဍဲလက်ထက် အယုက်ကၠတ်ထဝ်တွဵုရးဍုၚ်မန် အလန်ပထမ ပွိုၚ် ၅ သၞာံတုဲကၠုၚ်တေံ လိက်တၚ် နူညးဍုၚ်ကွာန်တံ နွံ ၁၆၆၁ တၞးတုဲ အပ္ဍဲလိက်တေၚ်ဂမၠိုၚ်ဂှ် ကၠတ်ထဝ်ပ္ညဳကဵုအလဵုအသဳတုဲ ပသောၚ်ကဵုလဝ် ၃၇၀ တၞး ရဴဝွံ ဂွံတီကေတ် နူလိက်စၟတ်သမ္တီ ကၠတ်ထဝ်တွဵုရးမန်အလန်ပထမတေံရ။