ပ္ဍဲတွဵုရးဍုၚ်မန် ပွိုၚ်ဍုၚ်ရေဝ်ဂှ် ဟွံမွဲကဵုအခေါၚ်မွဲသာ် ၜံက်ခါဲသွံစဒၟံၚ် တိတၟံဝါန်ကေုာံတိကြေဟ်ဂှ် ဒၞါတာ ကေတ်ကဵုအရေဝ်ညိ နူဥူချေတ်တေန် အမာတ်ကၠတ်ထဝ်တွဵုရး ဒေသမာဲစၟတ် (၂) ပွိုၚ်ဍုၚ်ရေဝ် ပ္တိုန်လဝ်ဂလာန် ပ္ဍဲကၠတ်ထဝ်တွဵုရးမန် အလန်ဒုတိယ ကောံဓရီုလၟေၚ်ဆဋ္ဌမ တ္ၚဲပထမတုဲ ပ္ဍဲကောံဓရီု တ္ၚဲဒုတိယဂှ် ညးစၞး (၄) တၠဆက်သဳကၠဳတုဲ နူကၠတ်ထဝ် ဒုၚ်တဲသ္ပဒ္တန်ဂလာန်ဂှ်ရောၚ် ဂွံတီကေတ်ရ။
“ဍာံဍာံတှေ် လာၚ်ဇြေန်လေဝ်ဟွံမွဲ ၜံက်ခါဲမ္ဂး ကေတ်အရေဝ် လွာဲလွာဲဂှ်ဂွံမံၚ်။ ဒှ်သာ်ဂှ်ရ မၞိဟ်ၜံက်ခါဲ သွံမံၚ် ဟွံမွဲကဵုလာၚ်ဇြေန်တံဂှ် နူအလဵုအသဳ သွက်ဂွံရပ် ကေတ်အရေဝ်နွံမံၚ်။ သွက်ဂွံရပ်စပ် ကေတ်အရေဝ်ဂှ်လေဝ် တာလျိုၚ်နွံ ပ္ဍဲသ္ကိုပ်ပရေၚ်အုပ်ဓုပ်နာနာတံရောၚ်တုဲ ကဵုလဝ်စၞောန် ကုသ္ကိုပ်ပရေၚ်အုပ်ဓုပ်တံဂှ်တုဲရ” သာ်ဝွံ အ္စာသဝ်ဟံၚ်ဍုၚ် ဝန်ဇၞော်ထိၚ်ဒဝ်မၚ်မွဲ ပရေၚ်သယံဇာတကေုာံပရေၚ်သဘာဝပွဳပွူ တွဵုရးဍုၚ်မန် ဟီုရ။
ဥူချေတ်တေန် အမာတ်ကၠတ်ထဝ်တွဵုရး နူဒေသမာဲစၟတ် ၂ ပွိုၚ်ဍုၚ်ရေဝ် (MNA)
ၜိုန်ဂှ်လေဝ် ပၠာ်ဗလာ်ဖျေံဒဵုတုဲ ၜံက်သွံဒၟံၚ်တိတၟံဝါန် ပ္ဍဲဒေသဂအုံကွာန်အစေန်တေံဂှ် သ္ကိုပ်ပရေၚ်အုပ်ဓုပ် ကွာန်အစေန် ၜိုန်ပလံၚ်ဗ္စိုပ်လဝ်လိက် ညံၚ်ဂွံဒေံါထောံဂှ်ကီုလေဝ် ဆက်ကၠောန်ဒၟံၚ် ကမၠောန်ဂှ် ဖိုဟ်ဏီဏောၚ် ဂွံတီကေတ် နူဥူချေတ်တေန် ညးတၠဂလာန်ဂှ်ကီုရ။
“ခါဲသွံစမံၚ် ဗီုဗီုဏံဂှ် ပ္ဍဲပွိုၚ်ဍုၚ်ရေဝ် နွံၜိုတ် ၃/၄ ဒၞါဲဏောၚ်၊ မွဲမွဲဒၞါဲတှေ် သမၠဲဍေံ နွံၜိုတ် ၅ ဨက၊ ပ္ဍဲဒၞါကြပ်ကဵုသ္ၚိမၞိဟ်တံ၊ ပ္ဍဲအကြာသ္ၚိမၞိဟ်တံဂှ်လေဝ် ၜံက်ခါဲမံၚ်အိုတ်ရ၊ သွက်မၞိဟ်တံ အန္တရာဲဂၠိုၚ်ကွေံကွေံ” သာ်ဏံ ဥူချေတ်တေန် ညးတၠဂလာန် ဂးရ။
မၞိဟ်ၜံက်သွံမံၚ် တိတၟံဝါန်တံဏံဂှ် ဒှ်တၠတိဖအိုတ်ရ၊ ဟွံစကာပ္ဍဲအရာတဵုစတုဲ ပြံၚ်စကာထောံ မွဲနဲမွဲဗီု သာ်ဏံဂှ် အာတ်လဝ်အခေါၚ် ပ္ဍဲအလဵုအသဳ ဟွံမွဲရ၊ နူညးတာလျိုၚ် ဆေၚ်စပ်တံ ကဵုလဝ်သတိကီုလေဝ် ဆက်ကၠောန်မံၚ်ဖိုဟ်၊ ပ္ဍဲတွဵုရးမန် ၁၀ ပွိုၚ်ဍုၚ်ဏံ ကၠောန်ဒၟံၚ်ကမၠောန် ၜံက်ခါဲသွံစတိဏံ နွံ (၇၅)ဒၞါဲ၊ ကိစ္စဏံ နူအလဵုအသဳ ကေတ်အရေဝ်ဏောၚ် ဟီုမံၚ်ကီုလေဝ် မၚ်ရံၚ်အာဏောၚ် ဥူချေတ်တေန် ဂးရ။
