လိက်စၞောန် နူဌာနက္ဍိုက်ပ်စၞောန်ပ္ညုၚ် ကမၠောန်ဟိုဝ်တေဝ် ကေုာံကမၠောန်အာတရဴ တွဵုရးမန် (တၞးဆာဲ)
ဂကောံမှာဇန်တံ ကၠောန်သ္ပ ကောံဓရီုမမိက်ကဵုမွဲမွဲ ပ္ဍဲဟိုဝ်တေဝ်၊မိုဝ်တေဝ်၊ဇၞူဇူဒီု နွံပ္ဍဲပွိုၚ်ဍုၚ်မတ်မလီုဂှ်မ္ဂး ဂွံအခေါၚ်ကၠောန်တုဲမှ ကၠောန်ဂွံရောၚ် ပ္တိတ်လဝ်စၞောန်သာ်ဏံဂှ် က္လေၚ်ရုပ် (က္လေၚ်ပါဲဇိုတ်)ထောံဣရ သာ်ဝွံ ဥူမျေအ်တာန်ဝေန် သ္ကိုပ်စၞောန်ပ္ညုၚ် နူဂကောံအလဵုအသဳ တွဵုရးမန် ဟီုရ။
ဂိတုမေ ၁၈ ဖါသဝ်တ္ၚဲဂှ် ကော်ဆဵုဂဗကဵု ရဲမဳဒဳယာတံ ပ္ဍဲရုၚ်အလဵုအသဳ တွဵုရးမန်တုဲ ကၠောန်သ္ပဏာ ပေါဲသောၚ်က္လးလိက်ပရိုၚ်ဂှ် ဟီုလဴက္လးဏာ သာ်ဂှ်ကီုရ။
“ပရဟ်ဒုၚ်တုဲ ဟွံဒးအာတ်အခေါၚ် ပ္ဍဲဂကောံအလဵုအသဳ တွဵုရးမန်ပုဟ်၊ တုဲပၠန် သ္ကိုပ်ပရေၚ်အုပ်ဓုပ် ပွိုၚ်ဍုၚ် ကဵုအခေါၚ်မှ ကၠောန်ဂွံဏောၚ် ဟီုဂှ်လေဝ် ဟွံသေၚ်ပုဟ်၊ စပ်ကဵုကိစ္စဏံတုဲ လိက်စၞောန် ပ္တိတ်လဝ်ဂှ်လေဝ် ရုပ်ထောံတုဲ က္လေၚ်ဖန်တၟိပၠန်ဏောၚ်” ဥူမျေအ်တာန်ဝေန် ဂးရ။
သွက်ဂွံရုပ်ကၠေံ လိက်လလောၚ်ဂှ်ဂှ် ပ္ဍဲတ္ၚဲပံၚ်ရုၚ် တ္ၚဲစန်ဏံတှေ် ဟီုကဵုသ္ကိုပ်ပရေၚ်အုပ်ဓုပ် ပွိုၚ်ဍုၚ်၊ ရုၚ်ဌာနက္ဍိုက်ပ် သ္ကိုပ်ပရေၚ်အုပ်ဓုပ်နာနာ ပွိုၚ်ဍုၚ်တုဲ က္လေၚ်ကဵုစၞောန် သွက်ဂွံပ္တိတ် လိက်စၞောန်တၟိပၠန်ဏောၚ် ညး ဂးရ။
ပ္ဍဲကောံဓရီု အလဵုအသဳတွဵုရးမန် ပ္ညဳပ္ညပ်ဆေၚ်ကဵုပရေၚ်ဂီုကၠီုဂှ်မ္ဂး “ပ္ဍဲမပ္တံဟိုဝ်တေဝ် နွံပ္ဍဲပွိုၚ်ဍုၚ်မတ်မလီုတံဂှ် ဂကောံမှာဇန်တံ ကၠောန်ကောံဓရီု မမိက်ကဵုမွဲမွဲမ္ဂး ဒးကဵုသမ္တီ ကုအလဵုအသဳတွဵုရးမန်ကီုဏောၚ် ဖျေံလဝ်သ္ဂုတ်သွာတ်သာ်ဏံတုဲ အခါရဓမံက်ရုပ်ရဴဂှ် ကၠိုဟ်ဗၠေတ်အာ ဂးရ။
“သဳကၠဳလဝ်အတေံဂှ် သွက်ဂွံကဵုသမ္တီသၟးရ၊ ဆ္ဂး နူကဵုခရိုၚ်ဏံ စိုပ်ပွိုၚ်ဍုၚ် ဒးဓမံက်ရုပ်ရဴ နညးမွဲမွဲဂှ်မ္ဂး ပရဟ်ပွိုၚ် (၁၀) တ္ၚဲကၠာတုဲ ဒးပ္တိုန်ထ္ၜး ဒးအာတ်အခေါၚ်ကၠာဏောၚ် ဒှ်ကၠုၚ်ဗီုဏံ၊ ဣဏံဂှ် ဍေံတံကၠိုဟ်ဗၠေတ်အာဏောၚ်” ဥူမျေအ်တာန်ဝေန် ဂး။
အတိုၚ်သၞောဝ်ဥပဒေဂကောံ ၂၀၁၆ ဂှ်မ္ဂး ဂကောံမှာဇန်တံ ဗၠးဗၠးၜးၜး ကၠောန်ပေါဲချပ်ဓရီုသဳကၠဳကမၠောန် ဂွံမံၚ်ဏောၚ်ဂှ် ဂွံတီကေတ် နူအလဵုအသဳ တွဵုရးမန်ကီုရ။
0 Comments