သွက်ဂွံၜံက်ခါဲ ကပေါတ်ပၞာန်သှေ် နူခေတ်ဂျပါန် ပ္ဍဲဒဵုမၚ်ဗၠာဲ နွံဇရေၚ်ဍုၚ်ဇြပ်ဗု တွဵုရးမန်ဂှ် အလဵုအသဳ တွဵုရးမန် ကဵုလဝ်အခေါၚ် စံၜတ်ကၠာတဲ ကုကမ္ပဏဳ Royal Eagle Development Group Co,Ltd ဍုၚ်လ္ဂုၚ်ရောၚ် ဥူမျေအ်တာန်ဝေန် သ္ကိုပ်စၞောန်ပ္ညုၚ် နူဂကောံအလဵုအသဳ တွဵုရးမန် ဟီုကဵုဌာန်ပရိုၚ်မန်ရ။
“စပ်ကဵုဒဵုမၚ်ဗၠာဲဂှ် ပ္ဍဲဒဵုဏံ ကပေါတ်ပၞာန်သှေ်ဇးဒၟံၚ် နူခေတ်ပၞာန်ဂၠးတိဒုတိယတေံ နွံမံၚ်ဏောၚ် နူအလဵုအသဳရ ဂးလဝ်တုဲ ကဵုအခေါၚ်ၜံက်ခါဲညိ ကဵုအခေါၚ်လ္ၚတ်စံၜတ်ကၠာတဲညိ ပ္တိုန်ထ္ၜးအာတ်မိက်ကၠုၚ်လဝ်တှေ် နူအလဵုအသဳတွဵုရးမန် ကဵုလဝ်အခေါၚ်” ညးတေံ ဂးရ။
ကပေါတ်ပၞာန်ဂျပါန်သှေ် ဂျပါန်တံ ဂိုၚ်တိုပ်လဝ် ပ္ဍဲကာလပၞာန်ဂၠးတိ ဒုတိယတေံဂှ် သွက်ဂွံမၚ်မွဲ ညံၚ်ဟဂွံလီုလာ်ကီု၊ သွက်ဂွံဒၞါတာ ညးၜံက်ခါဲဟွံလုပ်ကဵုသၞောဝ်တံကီု၊ ဘဏ္ဍာကၟိန်ဍုၚ်လေဝ် ညံၚ်ဟဂွံချောံကီု ရန်တၟံသာ်ဂှ်တုဲ လ္တူကမ္ပဏဳ အာတ်မိက်ကၠုၚ် သွက်ဂွံကဵုအခေါၚ်ကၠောန် ပံၚ်တောဲပါ်ပရအ်ဂုဏ်ဖဵုတုပ်ဂှ် ၜိုန်ကဵုလဝ်အခေါၚ် နူအေဗရဴ ၂၆ တေံကီုလေဝ် ကဵုလဝ်အခေါၚ်ကၠောန် အလုံမွဲကိုန်အစဳဇန် ဟွံသေၚ်ရောၚ် ဥူမျေအ်တာန်ဝေန် ဂးရ။
“လ္ၚတ်စံၜတ်ကၠာတဲဟီုဂှ် ဒးကံက်တၚ်နၚ် ဒေတာ ဏောၚ်၊ ဒှ်မာန် ဟွံမာန် ဒးစၟဳစၟတ်ဏောၚ်၊ ဒုၚ်သဇိုၚ် လ္တူတၚ်နၚ်ဂှ်တုဲ ဆက်ခါဲဟာ၊ ဟွံဆက်ခါဲဟာဟီုဂှ် ကၟိန်ဍုၚ်တေံ ဖျေံသ္ဂုတ်သွာတ်ဏောၚ်၊ဣဏံဂှ် ကဵုလဝ်အခေါၚ် သွက်ဂွံကၠောန် အလုံကိုန်အစဳဇန် ဟွံသေၚ်ပုဟ်၊ ကဵုလဝ်အခေါၚ် ဆၜိုတ်အဆံၚ် လ္ၚတ်စံၜတ်သၟးရဏောၚ်” ညးတေံ ဆက်ဟီုရ။
ဗီုဂှ်ကီု ပ္ဍဲဂိတုဖေဖဝ်ဝါရဳတုဲကၠုၚ်ဏံ နူကမ္ပဏဳ Golden Geo Myanmar Co.,LTD လ္ဂုၚ် ကၠုၚ်ၜံက်ခါဲလဝ် ဒဵုမၚ်ဗၠာဲဂှ် ဟိုတ်နူဟွံဂွံလဝ်အခေါၚ်တုဲ ဒးဒိုအ်ထောံ ဂွံတီကေတ်။
ၜိုန်ဂှ်လေဝ် ဥူဝေန်တိၚ် ဒါရာ်တာ Golden Geo Myanmar Co.,LTD သ္ဂးဂှ် “ၜိုတ်အဲတီဂှ်တှေ် သ္ကိုပ်ဝန်ဇၞော်တွဵုရးမန် ကဵုလဝ်အခေါၚ်လ္ၚတ်စံၜတ်ကၠာတဲ၊ ညံၚ်ဂွံဂွံအခေါၚ် ဆက်ၜံက်ခါဲ ကမၠောန်ဏံဂှ် ပိုဲပ္တိုန်လဝ်လိက် ပ္ဍဲသမ္မတ” ဂးရ။
ဒှ်သာ်ဂှ် ညံၚ်သ္ဂောံဂွံအခေါၚ် က္လေၚ်ၜံက်ခါဲ ပ္ဍဲဒၞါဲဂှ်ဂှ်လေဝ် အာတ်လဝ် အမိၚ်ကဵုအခေါၚ်ကၠောန် ပ္ဍဲသမ္မတ ကဵု သ္ကိုပ်ဝန်ဇၞော် တွဵုရးမန်ဖိုဟ်ဏောၚ် ဥူဝေန်တိၚ် ဆက်ဟီုရ။
ပ္ဍဲကာလပၞာန်ဂၠးတိဒုတိယတေံ ကၠောန်ပံက်လဝ်ဂၠံၚ်ကွဳပၟတ် ကလုတ်သၟိၚ်ဂစိုတ် သေံ-ဗၟာတုဲ ဒၞါဲဒဵုမၚ်ဗၠာဲ ဇရေၚ်ဍုၚ်ဇြပ်ဗုဏံဂှ် ဒှ်ဒၞါဲဗ္ဒိုပ်အဓိက ပၞာန်ဂျပါန်တံဖျေံသဇိုၚ်ရ၊ ဒၟါနူဂှ်ရ ပ္ဍဲဒၞါဲဏံ ကပေါတ်ပၞာန် ကေုာံကပေါတ်ရတ် ဂျပါန်တံ နွံမာန်ဏောၚ် ကောန်ဒေသတံ ထေၚ်လဝ်အိုတ်ရ။