လိက်စၞောန် နူဌာနက္ဍိုက်ပ်စၞောန်ပ္ညုၚ် ကမၠောန်ဟိုဝ်တေဝ် ကေုာံကမၠောန်အာတရဴ တွဵုရးမန် (တၞးဆာဲ)

တၠကမၠောန် ပံက်လဝ် ဟိုဝ်တေဝ်၊မိုဝ်တေဝ်၊ဇၞူဇူဒီု ပ္ဍဲပွိုၚ်ဍုၚ်မတ်မလီုတံ ဒးဒ္ဂေတ်ဗက်ဂှ် ဂကောံမှာဇန် CSO ချဳဒရာၚ်ပရေၚ်မၞိဟ်တံ ကၠုၚ်သ္ပပေါဲချပ်ဓရီုကမၠောန်မ္ဂး နူကၠာဟဂွံကၠောန် ပရဟ်ဒုၚ် ၁၀ တ္ၚဲတုဲ ဒးပ္တိုန်ထ္ၜးဏောၚ် အခေါၚ်စှေ်ကၠုၚ်မှ ကဵုအခေါၚ်ကၠောန်ဂွံဏောၚ် သာ်ဝွံ ရံၚ်ကေတ်လိက်စၞောန် နူဌာနက္ဍိုက်ပ်စၞောန်ပ္ညုၚ် ကမၠောန်ဟိုဝ်တေဝ် ကေုာံကမၠောန်အာတရဴတုဲ ဂွံတီကေတ်ရ။

ဂကောံမှာဇန်သွာၚ်အရာပ်တံ ကောံဓရီုလေဝ်ကီု၊ ပေါဲသဳကၠဳချပ်ဓရီုကမၠောန်လေဝ်ကီု ယဝ်ဒးကၠောန်မ္ဂး ယၟုဂကောံ၊ ပရူပရာကၠောန်၊ ဒၞါဲကၠောန်၊ အခိၚ်ကၠောန်တံဂှ် ဒးပ္တိုန်ထ္ၜး ကဵုပရိုၚ် ကုသ္ကိုပ်ပရေၚ်အုပ်ဓုပ် ပွိုၚ်ဍုၚ်၊ ဌာနက္ဍိုက်ပ် သ္ကိုပ်ပရေၚ်အုပ်ဓုပ်နာနာ ပွိုၚ်ဍုၚ်မတ်မလီုတံဏောၚ် သာ်ဝွံ ဥူမျေအ်တာန်ဝေန် သ္ကိုပ်စၞောန်ပ္ညုၚ် နူဂကောံအလဵုအသဳ တွဵုရးမန် ဂးရ။

“ပရဟ်ဒုၚ် ၁၀ တ္ၚဲတုဲမှကၠောန်ညိ စၞောန်လဝ်ဗီုဂှ်ဟွံသေၚ်။ CSO နွံပ္ဍဲတွဵုရးဏံ ကၠောန်ကမၠောန်တှေ် ညံၚ်ဂွံပ္တိုန်ထ္ၜး ကဵုသမ္တီကုအလဵုအသဳရ။ ဂွံအခေါၚ်မှ ကၠောန်ညိ စၞောန်လဝ်ဗီုဂှ် ဟွံသေၚ်ပုဟ်” ဥူမျေအ်တာန်ဝေန် ဂး။

ဂကောံမှာဇန်တံ ဒးပ္တိုန်ထ္ၜးကဵုအလဵုအသဳဂှ် ယဝ်ယုတ်ဒေက်အာတှေ် ဒးကေတ်အရေဝ်မွဲမွဲသာ်ဏောၚ် ဗီုဏံလေဝ် ကဵုလဝ်စၞောန် ဟွံမွဲရောၚ် ဥူမျေအ်တာန်ဝေန် ဂး။

ဂကောံမှာဇန်တံ ကၠောန်သ္ပကောံဓရီုမွဲမွဲ ပရဟ်ဒုၚ်တုဲ ဒးကဵုသမ္တီ ဒးပ္တိုန်ထ္ၜးကဵု ရုၚ်အလဵုအသဳ တွဵုရးဏောၚ်မ္ဂး ပိုဲတံ ဒှ်အခက်ခုဲမာန်ဏောၚ် သာ်ဝွံ နာဲတေအ်ခါၚ် နူညိၚ်ဝှံၚ်ဒေယှေန် ဒှ်ဒၟံၚ်ညးတာလျိုၚ် ပ္ဍဲရုၚ်ပါ် တွဵုရးမန် ဂးရ။

“အတိုၚ်လိက်ဂှ်ရဟီုမ္ဂး ပိုဲတံ သွက်ဂွံဒှ်အခက်ခုဲနွံတၟာဂလိုၚ်ဏောၚ်၊ မုဒှ်ရောဟီုတှေ် ပ္တိုန်လိက်တုဲ ဂွံအခေါၚ်မှ ကၠောန်ဂွံဏောၚ်ဟီုလဝ်ဗီုဂှ်တှေ် ပိုဲကၠောန်ကောံဓရီုမွဲမွဲတှေ် ပိုဲဒးဘိက်လဝ် ညးဍုၚ်ကွာန်တံဏောၚ် ဘိက်တုဲမှ ယဝ်ဟွံဂွံအခေါၚ်ကၠောန်တှေ် ခက်အိုတ်တးဏောၚ်” နာဲတေအ်ခါၚ် ဂး။

ဗီုဂှ်ကီု ပ္ဍဲဂိတုမေဏံ ဟိုတ်နူဒုၚ်လဝ်တဲ ပေါဲသဳကၠဳချပ်ဓရီုကမၠောန် နူဂကောံမှာဇန်တံတုဲဂှ်ရ လၟုဟ် ပိုဲဒးဆဵုဒၟံၚ်အခက်ခုဲဖိုဟ်ရောၚ် မိဃေန်မာဥူ မာန်နေဂျာ ရာမညဟိုဝ်တေဝ် ဂးရ။

“ပ္ဍဲဂိတုဏံ သွက်ဂွံကၠောန် ပေါဲချပ်ဓရီုကမၠောန်ဂှ် ပိုဲဒုၚ်လဝ်တဲ နွံမံၚ်။ ကေတ်လဝ် သြန်ခရမ်လေဝ် တုဲဣယျတှေ် ခက်မံၚ်ဖိုဟ်ရ၊ CSO တံ ဂွံအခေါၚ် နူအလဵုအသဳမှ ပိုဲတံ ကဵုအခေါၚ်ကၠောန်ဂွံဏောၚ်” မိဃေန်မာဥူ ဂးရ။

အေဗရဴ (၂၃) တုဲကၠုၚ်ဏံ ကၠောန်လဝ် ကောံဓရီုပ္ညဳပ္ညပ် ဆေၚ်ကဵုပရေၚ်ဂီုကၠီု တွဵုရးမန် ပ္ဍဲၝောံခန်ကောံဓရီု ရုၚ်အလဵုအသဳ တွဵုရးမန်တုဲ ဖျေံလဝ်သ္ဂုတ်သွာတ်ရောၚ် သာ်ဝွံ ရံၚ်ကေတ်လိက်စၞောန်ဂှ်တုဲ ဂွံတီကေတ်ရ။