ဗီုဂွံညာတ်ကေတ် အကာဲအရာဍာ်ဇၞော် ပ္ဍဲဍုၚ်ရေဝ် ဂိတုဂျောန် ၁၇ ဖါနူဂယး (Nai Ko Thu)
ဂိတုဂျောန် ၁၇ ဂှ် ပ္ဍဲတွဵုရးမန် ဟိုတ်နူဗြဲဂူရိုပ်ထတ်ဂှ်ရ ပ္ဍဲအရာပ်လ္ၚဵုလ္ၚဵု နွံလ္တူဍုၚ် ကဵု ဂၠံၚ်ဍာန်အာကၠုၚ် လ္ၚဵုလ္ၚဵုတံ တၞီအာဍာ်တုဲ အစဳဇန် ဝိုၚ်ဓရီုတက်ကျာ သွက်ဂွံကၠောန်ပ္ဍဲဍုၚ်ရေဝ်ဂှ် ဒးဖျုဲထောံတ္ၚဲ သာ်ဝွံ ဂွံတီကေတ် နူကမ္မတဳကၠောန်ဗဒှ်တံရ။
ဝိုၚ်ဓရီုတက်ကျာ ကိစ္စပရေၚ်ၜိုဟ်လလံဏံ ၜိုန်စဳဇန်လဝ် သွက်ဂွံကၠောန် ပ္ဍဲဂိတုဂျောန် ၁၇ ပယာံဖါနူဂယး ၉ နာဍဳဂှ်ကီုလေဝ် ပ္ဍဲဂၠံၚ်ကွဳစက် ရေဝ်-မတ်မလီု ဒၞါဲဗွဲမဂၠိုၚ်ဂှ် ဟိုတ်နူဗၠိုက်ဒၟံၚ်ဍာ်ကီု၊ ပ္ဍဲဍုၚ်ရေဝ် ကေုာံကွာန်တံဂှ်လေဝ် ဟိုတ်နူနွံကၠုၚ်ကဵုဘဲဍာ်က္လိုပ်တုဲ ဒးဖျုဲထောံတ္ၚဲရောၚ် နာဲတူ ညးစဳဇန်ပေါဲဂှ် ဟီုရ။
“ပ္ဍဲဍုၚ်ရေဝ်ကီု ကွာန်တံကီု က္တဵုဒှ်ကၠုၚ် ဒဒိုက်ဘဲဍာ်ဣရတှေ် စဳဇန်လဝ် သွက်ဂွံကၠောန် ဝိုၚ်တက်ကျာပရေၚ်ၜိုတ်လလံ ကေုာံညးဍုၚ်ကွာန်ဂှ် ဒးဖျုဲထောံတ္ၚဲ၊ ရံၚ်အကာဲအရာဗြဲကျာတုဲ ညးဟီုတွံတံ က္လေၚ်ပ္ညဳညးသ္ကံတုဲမ္ဂး တ္ၚဲလဵုဒှ်ကၠောန်ရောဂှ် က္လေၚ်လလောၚ်ကဵုပၠန်ဏောၚ်” နာဲတူ ဂးရ။
ပ္ဍဲဝိုၚ်တက်ကျာပရေၚ်ၜိုဟ်လလံကေုာံညးဍုၚ်ကွာန်ဏံ နာဲဟံသာ ဒုဥက္ကဌ ဗော်ဍုၚ်မန်တၟိ၊ မာံကျဝ်ဇြေယျာဥူ နူဂကောံညးအုပ်ကာ UPDJC ကမ္မတဳ ပံၚ်ဓမံက်ရုပ်ရဴပရေၚ်ၜိုဟ်လလံကၟိန်ဍုၚ်၊ အ္စာချူလိက် ဥူဌေတိၚ် (က)နံၚ်ကျဝ် ညးလ္ၚတ်ဒၟံၚ်အကာဲအရာပရေၚ်ဍုၚ်ကွာန်၊ ဥူယျေဝ်မျဵုတိၚ် နူဂကောံ (တကောၚ်း နိုၚ်ၚံရေး လေ့လာမှုအရပ်ဘက် အဖွဲ႔အစည်း) တံ သ္ပက္ဍိုပ်သဳကၠဳအာဏောၚ် ဂးရ။
“ ပိုဲဂှ် သွက်ဂွံအာပေါဲဟီုတွံ ပ္ဍဲဍုၚ်ရေဝ်တေံရ၊ ဆ္ဂး စိုပ်ၜိုတ်နှေဟ်ဗ္ဒဝ် ဍာ်ဇၞော်ဒၟံၚ်ဏောၚ်တှေ် ကွဳစက်တံ တတ်အာဟွံဂွံ၊ နူဂယးဏံ ၜိုတ် ၆ နာဍဳဂှ် ပိုဲစိုပ်ဒၟံၚ်ဒၞါဲဏံဣရ” သာ်ဝွံ နာဲအံၚ် ကောန်ဒေသမုဟ်ဍုၚ် ဂးရ။
ဂိတုဂျောန် ၁၇ ဂှ် ဟိုတ်နူကျာထတ် ဗြဲဇၞော်ဂူကၠုၚ်ဂှ်ရ ပ္ဍဲတွဵုရးမန် ဒေသဗွဲမဂၠိုၚ် ဍာ်ဇၞော်တိုန်တုဲ သ္ၚိဌာန် ၃၅၀၅ သ္ၚိတံလေဝ် ဒးဒၟံၚ်ဘဲဍာ်ဏောၚ် အလဵုအသဳတွဵုရးမန် လလောၚ်ပ္တိတ်လဝ်ဂှ် ဂွံဆဵုကေတ်။
