ကၟာဍာ်ကၟိုန်ဝၚ်ဖၞုၚ် နွံကရပ်ကွာန်အၜေတ် ပွိုၚ်ဍုၚ်မုဟ်ဍုၚ်ဂှ် ကရောန်အာဣရ ပရိုၚ်သာ်ဏံ တိတ်ကၠုၚ် ပ္ဍဲဂိတုဂျောန် ၁၈ ဖါသဝ်တ္ၚဲဂှ် ပရိုၚ်ဍာံဍာံဟွံသေၚ် သာ်ဝွံ ဥူအံၚ်သဵုထိတ် သ္ကိုပ်က္ဍိုက်ပ်ကၟာမြံၚ် ပွိုၚ်ဍုၚ်မုဟ်ဍုၚ် ဂးရ။
“ကၟိုန်ဍာ်ကၟာဂှ် မုဟွံဒှ်ရ။ ခိုၚ်မ္ၚိုဟ်ဒၟံၚ်ဖိုဟ်ရ။ ပရိုၚ်ဏံ ညးလဵုဟီုဗဒှ်ကေတ်အရေဝ် ဟွံတီရ။ကၟိုန်ပိုဲဏံ မုဟွံဒှ်ရောၚ်ဂှ် အဲဂံၚ်ဒုၚ်ဒၟံၚ်လျိုၚ်ကဵုဘဝအဲဏောၚ်။ နူဏေံတေံ ဗြဲဍာ်ဇၞော်တုဲ ပိုဲအာစၟဳစၟတ်ကၟိုန်ဏောၚ်။ လ္ပာ်သၟဝ်ကၟိုန်တေံ ညးဍုၚ်ကွာန် နွံဒၟံၚ်အောန်အောန်လေဝ် ဟွံသေၚ်တှေ် ဒှ်ကၠုၚ်မ္ဂး ပိုဲကဵုသတိတဝဵုရ။ အဲ ဗီုလဵု ဂွံဒုၚ်ဒှ်မာန်ရော။ ဒှ်ကၠုၚ်မ္ဂး ညံၚ်ဂွံကဵုပရိုၚ်ဂတာပ်ဂှ် ပ္ဍဲပွိုၚ်ဍုၚ်လေဝ် ပံက်စွံလဝ် ဂကောံနွံမံၚ်” ဥူအံၚ်သဵုထိတ် ဂးရ။
စပ်ကဵုကိစ္စဏံတုဲ သ္ကိုပ်ပရေၚ်အုပ်ဓုပ်ခရိုၚ်၊ ညက္ဍိုက်ပ်ကၟာမြံၚ်တွဵုရး၊ ညးက္ဍိုက်ပ်ကၟာမြံၚ်ခရိုၚ်၊ သ္ကိုပ်ပရေၚ်အုပ်ဓုပ်နာနာ ပွိုၚ်ဍုၚ်၊ ညးက္ဍိုက်ပ်ကၟာမြံၚ်ပွိုၚ်ဍုၚ်တံ အခိၚ်ဗ္တံ ၜိုတ် ၁၀ နာဍဳ အာစိုပ်သောၚ်က္လး ကိစ္စပရိုၚ်ကောလာဟလ ပ္ဍဲကွာန်နွံဇရေၚ်တံဂှ်ကီုရဂှ်လေဝ် ဥူကျဝ်ထေန် သ္ကိုပ်ပရေၚ်အုပ်ဓုပ်နာနာ ပွိုၚ်ဍုၚ်မုဟ်ဍုၚ် ဟီုရ။
“နူဏေံတေံ ဍာ်ဇၞော်အာတှေ် ကၟာဏံ ခိုၚ်မ္ၚိုဟ်ဒၟံၚ်ဖိုဟ်ဟာ အကာဲအရာနွံဗီုလဵုရော မိက်ဂွံတီတုဲ မၞိဟ်ဇၞော်ဇၞော်တံ ကၠုၚ်ရံၚ်စၟဳစၟတ်အကာဲအရာကၟာဏောၚ်၊ အေလ္တူဏံ မၞိဟ်တံ သလှေ် (အထေၚ်) ဗၠေတ်အာတုဲ ဗက်ဟီုဒၟံၚ်လိုဟ် ဒှ်ကၠုၚ်သာ်ဏံ” ဥူကျဝ်ထေန် ဂးရ။
ကၟာဝၚ်ဖၞုၚ် ကရောန်အာဣရ ပရိုၚ်ကောလာဟလတိတ်ကၠုၚ်သာ်ဏံတုဲ ကောန်ကွာန် မပ္တံ ကွာန်အၜေတ်၊ ဒဵုမာဲ၊ ထုၚ်မၚ်၊ ဆက်တဲ၊ ကွာန်ထဗုဲ၊ တံၚ်ပိုအ်၊ က္လအ်သတ် ကေုာံ နှေဟ်ဗ္ဒဝ် မကြပ်ဒၟံၚ်ကဵုကၟာဝၚ်ဖၞုၚ်ဏံ လကိုတ်ဖေက်ဒၟံၚ်အိုတ်ရောၚ်ဂှ် ပရိုၚ်ပြးဒၟံၚ် လ္တူ Facebook တေံ ဂွံဆဵုကေတ်။