ဆေၚ်ကၠေၚ်ပ္ဍဲကၟိန်ဍုၚ်ဗၟာပိုဲတအ် ဒဒှ်ရကွဳစက်ကာတအ် ကောံကလောံကၠုၚ်တုဲ ညံၚ်ကဵုအဃောရာန်စုတ်မံၚ်ကၠေၚ်ကီု တက်လဝ်ဗီုဂှ်ကဵု(drone)တုဲ ဗီုပတောံဂှ် မံၚ်ပြးတိတ်ကၠုၚ်ဒၟံၚ် လ္တူsocial mediaတအ် မွဲအလန်ပၠန်ရ။ ဗီုဏံဝွံ ပ္ဍဲဂိတုအေဗြဴ၊ သၞာံ၂၀၂၀ဂှ် ပ္ဍဲဍုၚ်ကၟိန်ဍုၚ် “သူဒါန်” (ဆူဒန်နိုၚ်ၚံ)တအ် အဃောကၠေၚ်စက်ပိုတ်ထကုတ်လဝ်အခိၚ်တုဲတုဲတေံတုဲ ကလေၚ်ပ္တိုန်လဝ်ရ။

ဗီုပြၚ်ချူပတိုန်လဝ်ဂှ်တှေ် “ကံၚ်သဳပၞာန်တံ မွဲဏှေအ်မွဲဗီု မွဲဏှေအ်မွဲဗီု

ဗီုပြၚ်ဗွဲမဂၠိုၚ် ကဵုမံၚ်ဒဒိုက် ကဵုညးဍုၚ်ကွာန်တအ်” ဂးတုဲ နူကဵုpage The Voice Of Springဂှ်မွဲကဆံၚ် ပ္ဍဲဂိတုအေဗြဴ၊ စၟတ်တ်ရဲ၁၉ဂှ် တောဲပတိုန်လဝ် သီုဗီုပန်(၄)ဗီုကဵုလိက်ဂှ် ဂွံဆဵုကေတ်မာန်ရ။ postဂှ်တိုန်အာတုဲ မၞိဟ်ကဵုလဝ် reactၜိုတ်(၁၇၀၀)နွံတုဲ ရဲကလေၚ်ပါ်ပရအ်လဝ်ဂှ်တှေ် ၜိုတ်(၂၂၉)တၠဒှ်ကၠုၚ်ရ။

ဗီုပတိုန်လဝ်တအ်ဏံဂှ် နူဌာနပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ဒးမံၚ်ဗီုပတောံမွဲဂှ် ပိုဲစၟတ်သ္တီလဝ်ရ။ မုဟိုတ်ဂွံစၟတ်သ္တီလဝ် ဗီုပတောံမွဲဟီုဂှ်တှေ်ဗီုရုပ်တက်လဝ်ကဵု(drone) ဒဒှ်ရ ကာတအ်ကောံရာန်မံၚ်ကၠေၚ် ပ္ဍဲဆေၚ်ကၠေၚ်ဏံဂှ် လ္တူWebsite RUPTLYဂှ်မွဲကဆံၚ် ပ္ဍဲဂိတုအေဗြဴ၊ သၞာံ၂၀၂၀ဂှ် ကေၚ်ပတိုန်ထ္ၜးလဝ်နွံရ။ ဟိုတ်ဒှ်သာ်ဂှ် ဗီုပတိုန်လဝ်ဏံဂှ် ဗီုနူကၟိန်ဍုၚ်ဗၟာဟွံသေၚ်တုဲ ဒှ်မံၚ်ဗီုနူဍုၚ် “သူဒါန်” (ဆူဒန်)တေံမွဲဂှ် ပိုဲစၟတ်သမ္တီလဝ်ရ။

ပ္ဍဲကၟိန်ဍုၚ်ပိုဲတအ်ဝွံ စပ္တံနူအေဗြဴ(၁၉)ဂှ်တုဲ ဆေၚ်ကၠေၚ်လ္ရဵုတအ်ဂှ် ခေတ္တကၟာတ်(ယာယီ)ထောံလဝ်နွံမံၚ်ကီုရ။ ဆေၚ်ကၠေၚ်ဇၞော်ဇၞော်ဗွဲမဂၠိုၚ်တအ်ဂှ် ရဲရာန်ကၠေၚ်မွဲတၠမ္ဂးၜါလက်ဒကေဝ်(20000 kyats)ဟေၚ် သွံကဵုဂွံရောၚ် ပရိုၚ်ဂှ်မံက်ပြးတိတ်အာတုဲဂှ် ညးရာန်စုတ်ကၠေၚ်တအ် ကောံရာန်ကၠုၚ်မံၚ်ညးသ္ကအ်ဂှ်နွံရ။

ပရိသာတ် ညးမဗှ်မံၚ်လိက်ပရိုၚ်တအ်ညးဂမၠိုၚ်လေဝ် ဆဵုတမ်ရိုဟ်ပရိုၚ်မွဲမွဲမ္ဂး လ္ပပတေဟ်စှေ်စိုတ်ပြဟ်ကၠာဏီညိ။ ဗီုပတိုန်လဝ်တအ်ဂှ် ယွံပိုဲတအ်ဒှ်မံၚ်သံသယလ္တူဗီုဏောၚ်ဟီုတှေ် စၟဳစၟတ်ရံၚ်နဲကဲစၟဳစၟတ်ဗီု ပ္ဍဲgoogleကၠာညိ။ တုဲပၠန်ကလေၚ်ပကိတ်ပညဳရံၚ် နူဌာနပရိုၚ်လုပ်ကဵုသၞောဝ်တအ်ကၠာတုဲမှ ပတှေ်စှေ်စိုတ်ပါ်ပရအ်ညိဂှ် မိက်ဂွံဗတိုက်ဖ္အောဝ်ဏာကီုရ။