စေတနာ လှာၜိုပ်
၁၈/၃/၂၀၂၂
ဟွံလအ်ကွေံကွေံရ ဂွံမိၚ်ကေတ်ပရိုၚ် ကောံဓရီုဇၞော် ပရေၚ်ဂကူမန် မွဲဝါပၠန်၊ ပ္ဍဲကဵုကောံဓရီုဇၞော် ပရေၚ်ဂကူမန်ဂှ် ဂကောံဇဳ သွာၚ်ဇဳ ပဠေဝ်ပဠေတ်စမံၚ်အိုတ်ရ၊ အိုဿီုကဵုညးစၞး တိုန်စိုပ်ဂမၠိုၚ်တံ ဂကောံတၠပညာ ကျာ်ဇၞော်အ္စာ က္ဍိုပ်သ္ကိုပ် မှာဇန်ညးကွာန် သၟတ်ခေတ်တၟိ ဌာန်သ္ၚောဲကြပ် အလုံဂၠးကဝ်တံ ပ္တဝ်လဝ်ဂၠံၚ်တရဴဗျူဟာကောန်ဂကူ ပံၚ်ကောံကသပ်ညာဏ် သွက်ဂကူမန် ဂွံရုန်ဂစာန်ကေတ် အခေါၚ်အရာဂကူကဵု ကံကုသဵုမန် မန်ညံၚ်ဂွံဖန်ဖက်ကေတ်တ်တုဲ က္လေၚ်ကၟောန်ပခိုၚ် ကၠောန်ဗဒှ် ကောံဓရီုဇၞော် ပရေၚ်ဂကူမန်ရ။
မိမညးဍုၚ်ကွာန်မန်တံ မိၚ်ဒးပရိုၚ်မိပ်စိုတ် မၚ်စၟဳဒုၚ်တၠုၚ်မံၚ်အိုတ်ရ၊ ပ္ဍဲကောံဓရီုဏံ ၜိုန်ညးတံဟွံပါကီုလေဝ် စိုတ်ဓါတ်ညးတံ မၚ်စၟဳမံၚ် အခေါၚ်ဗၠးၜးဂကူကဵု ပ္ၚံက်ပရေၚ်ဍုၚ်ကွာန် ပ္ဍဲဂကူပိုဲပြံၚ်သၠာဲ သီုကဵုသ္ဇိုၚ်မူ သၞောတ်ဒက်ပ္တန် ဍုၚ်မန်တၟိ ဗီုလဵု အဝဵုဇကု အခေါၚ်ဇကု တၞဟ်ခြာအာ နူကဵုသၞောတ်ဖေတ်ဒရေဝ်ဂှ်ကီု ဂွံဇြဟတ်ဗီုလဵု အာနကဵုသၞောတ်ဒဳမဝ်ကရေဇြဳ အဝဵုပိတန်ဂှ်ဗီုလဵု (၁) အဝဵုကောန်ဂကူ (၂) အဝဵုပရေၚ်ပိုန်ဒြပ် (၃) အဝဵုအုပ်ဓုပ်ဍုၚ် ကေုာံ တၚ်တၞဟ်နာနာဂမၠိုၚ်လေဝ် သွက်ဂကူပိုဲတံ ဗျဵုတဟၚ်မံၚ် မၚ်က္လၚ်ဗဵုမံၚ်အိုတ်ရ။
ပ္ဍဲအကြာဏံ တၠပညာ ခမဳသၚ် ကျာ်ဇၞော်အ္စာ က္ဍိုပ်သ္ကိုပ်တၠပညာ မှာဇန် သၟတ်မန် မိမညးဍုၚ်ကွာန်ဂမၠိုၚ်ကီု သီုကဵု ဗော်ဍုၚ်မန်တၟိ, ဗော်ညဳသၟဟ်မန် ဂကောံမန်နာနာတံ ဂကောံလဵုဟွံဟီု ကၠောန်ဗဒှ်ကောံဓရီုဇၞော် ပရေၚ်ဂကူမန်ဏံမာန်ဂှ် မိပ်စိုတ် ဗွဲမလောန်ရ။
ပ္ဍဲကဵုလညာတ်တၟိဏံ မံက်ကၠုၚ်ဗက်ဟွံဂတာပ် လညာတ်တြေံ ဒၞါဲစကာဂွံနာနာတံဂှ် ယဝ်ကပှ်ကၠဟ်ဖအိုတ်မ္ဂး သ္ဇိုၚ်မူဂှ် ဍေံဟွံဒှ် မိက်ဂွံဂးရ၊ ဂွံဒှ်သ္ဇိုၚ်မူ ခိုၚ်ၚ်ကၠိုက်က်မာန် သီုလညာတ်ၜါဏံ ပံၚ်စုတ် ဒါန်ပ္တိုန်လိက်စံၚ်ဇၞော်အဓိကမွဲတုဲ က္လေၚ်ဒက်လဝ်ဂကောံ (MAU) သၞောတ်တၟိဏံ ညံၚ်ဂွံအာဍာ်ဇမၠိၚ်မာန် ဂစာန်လွဳ ထိၚ်ဒဝ်မၚ်မွဲ ဗွဲပိုတ်သ္ကုတ်ညိ။
ယဝ်က္လေၚ်ရုပ်သီပၠန်မ္ဂး ပရေၚ်ဂကူပိုဲဂှ် ဍေံရောအ်ရေၚ် ထ္ကးပြး ဒဵုကဵုက္လေၚ်ဒက်ပ္တန်တၟိဂှ် ကောံကောံကဠောံကဠောံ ဍေံဒှ်ဟွံမာန်ရ၊ အခိၚ်လၟုဟ်ပၠန်လေဝ် ညံၚ်ဂကောံနာနာဂွံစှေ်စိုတ်ဂှ် ပံက်ပ္တိုန်ကမ္မတဳက္ဍိုက်ပ် ဂကောံဇဳ သွာၚ်ဇဳ အောန်အိုတ် မွဲဂကောံ (၇) တၠ နွံမှလေဝ် ပရေၚ်ကေၚ်ကာမန် အလုံအိုဿီု ဂွံဇြဟတ်စိုတ်ရ။
ပ္ဍဲဂကောံမွဲကဵုမွဲ အခိၚ်ရုဲစှ်ကောန်ဂကောံမ္ဂး ရံၚ်မုက်ပူဂဵုတုဲ ရုဲစှ်ဂှ် ဍေံဟွံဒးရး၊ ဒးရံၚ်ပ္ဍဲစေတနာကဵု အခိၚ်သၠဖဵုပူဂဵု၊ စရာဲဍာ်ဒကေဝ် လညာတ်ညာဏ် တန်တဴကဵုပရေၚ်ကမၠောန်နာနာ ချဳဒရာၚ် ဂေတ်လၟိုန်န်ဒးဒှ်ရောၚ်၊ ဂကောံက္ဍိုက်ပ်ဝွံ ထ္ၜုတ်လဝ်တုဲ အယုက်အပိုၚ်ခြာ ဆုဲပြံၚ် ဒးနွံထေက်ရ။
ယဝ်ရံၚ်ကဵုအကာဲအရာသၟးမ္ဂး တၠပညာသၟေဟ်မံၚ်တံဂှ် ဂွံထပ်ပါပၠန်လေဝ် ဒးချပ်လဝ်ရောၚ်၊ မိက်ဂွံသ္ပကောန်သၟိၚ်မ္ဂး ဒးယိုက်လဝ်ကဠာကၠာရ၊ ဗီုဏံကွေံကွေံဟွံသေၚ်က္ဍၚ်ဏီရ၊ ဂွံဒှ်ဇြဟတ် ပ္ဍဲဂကူမန်ဂှ် ဇၟာပ်မန် ဒးလေပ်လဝ်ကမၠောန်ရ၊ ပ္ဍဲအခိၚ်သဳကၠဳပၠန်လေဝ် တၚ်ဒးဗၟံက်ရုပ်ရဴတံဂှ် ဟီုပ္တိုန်ထ္ၜး ပ္ဍဲဝိုၚ်ဂံၚ်ၚ်ညိ၊ တၚ်အဓိကဂွံတုဲ တၚ်တၞဟ်ဟ်ဂှ် ဂၠာဲအာလညာတ် ကေတ်ကသပ် ချပ်ဗၟံက်အာ ရုပ်ရဴမာန်ရ။
မိက်ဂွံကဵုဏာ လညာတ်ညိပၠန်ဂှ် ဒၟါနူပၟတ်ကောန်စာၚ် ပြာသာဒ်တူ၊ ပ္ဍဲဂကူမန်ပိုဲဖအိုတ် ဂကောံဖအိုတ် ဗော်ဖအိုတ် ကၠာ်အကြာဂှ် လ္ပယိုက်နၚ် ပ္ဍဲကောံဓရီုဇကုမွဲမွဲညိ၊ ဒၟါနူကဵုကၠာ်အကြာတုဲ ဂကူဇကုဒးပြးပၠန်ဂှ် ဂွိၚ်တုဲထပ်ဂွိၚ်ရ၊ ဂွံဆဵု ဂွံမိၚ်မံၚ်ရသေၚ်ဟာ၊ ပေါဲဗ္တိုက်ဂၠးကဝ် နူကဏေံတေံ “ကော်” ပေါဲဗ္တိုက်ဂၠးကဝ် အလန်တတိယ ဍုၚ်ယူကရိန် ကဵု ရယှာဂှ် ပေါဲပၞာန်က္တဵုဒှ်ဇၞော်ကဵုဇြဟတ်၊ ဒၟါနူကဵုပရေၚ်တိဍာ်ၜက်ၜေတ်၊ ပရေၚ်မၞိဟ် ပရေၚ်ပြိုၚ်ပကာန် ကပေါတ်လက်နက် ဂတာပ်ခေတ်၊ နူတမ်တေံလေဝ် ညးၜါဍုၚ်ဏံ ပရေၚ်ညဳသၟဟ် ကၠိုဟ်တဴသဘဴဓဝ်ပရေၚ်မၞိဟ် စပ်ကဵုပညာသိပ္ပံ ဆာန်ကၟိန်သၞေံသၞဴ ခိုဟ်တဴဗွဲမလောန်ရ။
လက္ကရဴဏံ ကၠာ်ပူဂဵုလုပ်ဂွံ အကြာကောန်ဂကူတုဲ ပြးဇးထၞာန်ဂွံစိုပ် ပ္ဍဲကောန်ဂကူတုဲ ပရေၚ်သဳကၠဳ ခၠေဝ်သှ် ဍေံဟွံပြေပြံၚ် ဍေံဟွံဒှ်မွဲကသပ် မွဲဂၞန်တုဲ ပရေၚ်ထ္ၜးဆီ အစောန်သတ္တိဗျတ္တိဂှ် မံက်တိတ်ကၠုၚ် ဂျိုၚ်ၚ်ရ၊ သ္ပဟိုတ်ကဵုကၠာ်ဏံတုဲ ဂကောံကၟိန်ဍုၚ်ဂမၠိုၚ်တံ ဂွိၚ်တိုန် ဗီုညးကဵုညး ဖေက်ပၟတ်ပၞာန်ဏံ ဂဵုထၞာန်အာ အလုံဂၠးကဝ်ရ။
ဗီုဂွံဂဵုထၞာန်ဂှ် အဲမဟာမိတ် ယူကရိန် ဒးကဵုဇြဟတ် ဒးပူဗိုၚ်ဏောၚ်ဂှ် လညာတ်ဗီုဏံ မံက်တိတ်ကၠုၚ်မာန်၊ အဲ မဟာမိတ်ရယှာ ဍေံကော် အာတ်အရီုဗၚ်မ္ဂး ဒးကဵုဇြဟတ်ရောၚ်၊ မဟာမိတ် မွဲဍုၚ်ကဵုမွဲဍုၚ် ဝေၚ်ပၞာန် က္လေၚ်ကၠောံပူဂွံမ္ဂး ပၞာန်ဂၠးကဝ်ဂှ် ဇၞော်ကဵုဇြဟတ် ထေက်ကဵုဒးဆဵုပၠန်ဟာ၊ ယဝ်ပၟတ်ပၞာန်ဏံ သြိုဟ်ပလိုတ်ဟွံမာန်မ္ဂး အရာဝတ္ထုနာနာ သီုမၞိဟ် သီုကပေါတ်သယံဇာတတံဂှ် သှေ်ဆပ္တေၚ်သၟးရ။
အကာဲအရာဍုၚ်ယူကရိန်ကဵုဍုၚ်ရယှာဂှ် လၟုဟ် အသိၚ်လွဟ်ဗြု ၜိုန်သ္ၚိတ်အာကီုလေဝ် ပရေၚ်ဖံက်ပန် ဖံက်ဗတိုဟ် နွံမံၚ်ဏီတုဲ ပၟတ်ပၞာန်ဇၞော်ဏံ ဂွံပြေဟောဲအာ ပြဟ်ဟ်မာန် ဂကောံကုလသမဂ္ဂ (၁၅) ဍုၚ် ချပ်သဳကၠဳ ပလိုတ်မံၚ်ပၟတ်ပေါဲပၞာန်ရ။
သီုၜါလ္ပာ်ဂှ် နကဵုဂကောံကၟိန်ဍုၚ်ဇၞော်ဇၞော်တံ ကော်ပ္ညဳဍေံဟွံဒှ်မွဲဂၠံၚ်ဏီတုဲ ပ္ဍဲတၚ်ပ္ညဳဏံ စပ်ကဵု ပရေၚ်ပ္ဍဵုပ္ဍိုက် ဂကူညးဇြဟတ်ဇၞော် မွဲလ္ပာ်ဂှ် ပ္ဍဵုပ္ဍိုက်သ္ပမာန် ညးဇြဟတ်ဍောတ်အိုတ်ရ။ ညးဇြဟတ်ဍောတ်ဂှ်လေဝ် ပတေၚ်တိုန်ဇြဟတ် လဝေၚ်ပၞာန်တုဲ ဟွံဖျအ်စိုတ်ဓါတ် ဂလိုၚ်ဇြဟတ်ပၞာန်ရ၊ အလုံကောန်ဂကူဇကု ညးဗြဴ ညးတြုံ ဟွံရုဲ ဒးကဵုဂကူတုဲ ရပ်လွဟ် ဟွံဖေက်ချိုတ်ရ၊ ပရေၚ်ပြယာဲပၞာန် ထ္ၜးအရံၚ်ဇြဟတ်ပၞာန်ကီု သီုမအာတ်အရီုဗၚ် မဟာမိတ်ဇကုပၠန်ရ၊ ထံက်ရံၚ်ကဵုဗွဲလ္တူတေံမ္ဂး ညးကော်မဟာမိတ် အဲကော်မဟာမိတ် “လအ်မ္ဂး” ပရေၚ်ဇီုကပိုက် ပါ်ခြာဂကူဂှ် ဂဵုထၞာန်အာ အလုံဂၠးကဝ်မာန်ဏောၚ်ဂှ် လညာတ်ဏံ မံက်ထေၚ်လဵုဒၟံၚ် ဗဗုၚ်ဗဗုၚ်သပါသပါရ။
ပ္ဍဲကောန်ဂကူပိုဲပၠန်လေဝ် ဂွံဆဵု ဂွံမိၚ်ကေတ် ခန်လ္ၚတ်ဏံတုဲ ညံၚ်ဂွံဂွံဓဝ်သတိ ပြသၞာဂကူညးတၞဟ်ဒှ်ဂှ် ဒှ်အ္စာသွက်ဂကူပိုဲရ၊ ပိုဲစွံဓဝ်သတိညိ၊ ဂွံသတိတုဲ ပ္ဍဲပိုဲကၠောန် ကောံဓရီုဇၞော်ဏံ လညာတ်ခိုဟ် ကသပ်ပြဲ ယိုက်နၚ်ပ္ဍဲဝိုၚ် ကောန်ဂကူပိုဲညိ၊ ဘဝဂကူပိုဲဂှ် အတိုၚ်တီမံၚ်တ္ၚဲဏံဂှ်ရ။
ယွံက္ဍိုပ်သ္ကိုပ်တၠပညာ ခမဳသၚ်ကျာ်ဇၞော်အ္စာ သၟတ်မိမဂကူပိုဲမန်တံ ညးဂမၠိုၚ် ဒှ်မဇခိုဟ်ဍာံ ဟွံဒးရုဲပယာံ တဵုကဠုတ်မာန်တုဲ ပကဴနွံကဵုသၞိၚ်မောဝ်ၜိုဟ် ဂွံလဟိၚ်ဇူဍာံဍာံရ။
0 Comments