ဝဏ္ဏမာန်၊ ဂိတုဂျောန် ၂၉၊ ၂၀၂၂

နူကဵုဌာန်ပရိုၚ် အာအေပ်အေ ပတိုန်ထ္ၜးလဝ်ပရိုၚ် နကဵုယၟုဍိုပ်ပရိုၚ် “ပွိုၚ်ဍုၚ်သဓီု ကွာန်ထုၚ်ဗဵုလေဝ် ဒးဒုၚ်စံၚ် (၁၅၀) သ္ၚိပြၚ်” တုဲကၠုၚ်ဂျောန် (၂၈) ဂှ် ဒပ်ပၞာန်ဗော်ဍုၚ်မန်တၟိလေဝ် ပံၚ်တောဲဗတိုက်ပၞာန် ကရောံကံၚ်ဇြဳပၞာန်ဟီု ဂှ် ဒှ်ပရိုၚ်ဗၠေတ်မွဲတုဲ ညံၚ်ဂွံကလေၚ်သောၚ်ကလးပရိုၚ်ဍာံညိဂှ် ဗော်ဍုၚ်မန်တၟိပ္တိတ်လိက် ဒစဵုဒစးရ။
လ္တူလိက်ဗော်ဍုၚ်မန်တၟိဂှ် “ဗော်ဍုၚ်မန်တၟိဝွံ နကဵုကံၚ်ဇြဳပၞာန်ကီု၊ နကဵုဒပ်မၚ်ပယျဵုကီု၊ မူဝါဒပံၚ်တောဲဗ္တိုက်ပၞာန်ဟွံမွဲ ရ။ ပ္ဍဲဒေသဒၞာဲဒှ်ပေဲါဗတိုက်ဂှ်လေဝ် ဒပ်ပၞာန်ဗော်ဍုၚ်မန်တၟိ အာကၠုၚ်ချဳဒရာၚ်လဝ် ဟွံမွဲရ”
“လ္တူဌာန်ပရိုၚ် အာအေပ်အေ ပတိုန်ထ္ၜးလဝ်ပရိုၚ်ဗၠေတ်ဂှ် ဒစဵုဒစးတုဲ လတူပရိုၚ်ဂှ် ညံၚ်ဂွံကလေၚ်သောၚ်ကလး အာဂှ်အာတ်မိက်ဏာရ” သာ်ဝွံ ဗော်ဍုၚ်မန်တၟိ ပ္တိတ်လိက်ရ။
တုဲကၠုၚ်ဂျောန် (၂၅) ဂှ် တွဵုရးဍုၚ်မန် ပွိုၚ်ဍုၚ်သဓီု၊ ကရပ်ကွာန်ထုၚ်ဗဵုလေဝ်ဂှ် ဒပ်ပၞာန်ကံၚ်ဇြဳပၞာန်တအ်ကဵု ဒပ်ပၞာန် ကေအေန်ယူ(ကရေၚ်) တအ် ဒှ်ပေဲါဗ္တိုက်တုဲ ညးအဝဲဟွံဍိုက်ပေၚ်မွဲတၠ ဒးဒုၚ်ပန်ဂစိုတ်ကီု၊ ဘာတန်သၠုၚ်၊ ဘာလကျာ်၊ သ္ၚိစမြိုၚ်ဂမၠိုၚ် လၟိဟ် (၁၅၂) မ ဒးဒုၚ်စံၚ်ပလီုရောၚ် ဌာန်ပရိုၚ်အာအေပ်အေ ပတိုန်ထ္ၜးလဝ်ရ။
ပ္ဍဲပေဲါဗတိုက် ကံၚ်ဇြဳပၞာန်ကဵု ကေအေန်ယူဂှ် ဌာန်ပရိုၚ်အာအေပ်အေတအ် သ္ပသၟာန်သွဟ်လဝ် ညးနွံလျိုၚ် ၝောံဒပ်မဟာ ကေအေန်ယူ (၁)၊ ခရိုၚ်သဓီု တမ်ဒပ် (၂) ဒပ်စဵုဒၞာညးဍုၚ်ကွာန် (KNU တပ်မဟာ ၁၊ သထုံခရိုၚ်၊ ပြည်သူ႔ကာကွယ်ရေးတပ်ဖွဲ႕ တပ်ရၚ်း ၂) မွဲတၠဂှ် ဟီုလဝ်သာ်ဝွံရ။
“ဒပ်ပၞာန်တအ်တိုန်ကၠုၚ်အလန်ဏံဂှ် ၝောံဒပ် (၂၂) တုဲ ပ္ဍဲဂှ် ဗွဲတၟေၚ် ဒပ်ဗော်ဍုၚ်မန်တၟိလ္ၚဵုတအ် ပါကၠုၚ်ဂွံဆဵုရ။ ဣဏံ ဒှ်တၟေၚ်ရ။ ဗော်ဍုၚ်မန်တၟိ ပံၚ်တောဲကဵု ဒပ်မၚ်ပယျဵု ပ္ဍဲအရာပရေၚ်ပၞာန်ဂှ် အလန်ဏံ ဒှ်အလန်ကၠာအိုတ်ရ” သာ်ဏံ ညးတေံ ဟီုသှ်ဏာလဝ် ကုဌာန်ပရိုၚ်အာအေပ်အေဂှ် ပရိုၚ်အာအေပ်အေတအ် ဗလးပတိုန်ဏာ အတိုၚ်ဂှ်ရ။
ဌာန်ပရိုၚ်အာအေပ်အေ ဗလးပတိုန်ဏာ အတိုၚ်ညးနွံလျိုၚ်(ကေအေန်ယူ) ဟီုစောတ်စောဲလဝ် ဗော်ဍုၚ်မန်တၟိလေဝ် ပံၚ်တောဲကရောံကံၚ်ဇြဳပၞာန်တုဲ ဗ္တိုက်ပၞာန်ဂှ် ပ္ဍဲဗော်ဍုၚ်မန်တၟိ မူဝါဒပံၚ်တောဲဗ္တိုက်ပၞာန်ဟွံမွဲရောၚ် တုဲ လ္တူပရိုၚ်အာအေပ်အေ ဟီုစောတ်စောဲဏာသာ်ဏံဂှ် ဒှ်ပရေၚ်ဗဇဵု ဖန်ဗဒှ်ပဋိပက္ခ အကြာမန်ကဵု ကရေၚ် ရောၚ်ဂှ်လေဝ် သၟာအခါတ်အကာဲဂမၠိုၚ် ဟီုတဴအိုတ်ရ။