မာံသုခ၊ ဂိတုသေပ်တေမ်ဗာ ၁၃၊ ၂၀၂၂

ပ္ဍဲကဵုအခိၚ်စပံက်ထၜိုတ်ဏံ ဟိုတ်နူၚုဟ်ဗွဝ်ဖျာနာနာ တိုန်သၠုၚ်မံၚ်ဖအိုတ်တုဲ ၚုဟ်ထၜိုတ်ဟွံပဵုတိုန်ကွေံဂှ်ရ ဇီုကပိုက်အာကဵု ပရေၚ်စသုၚ်မံၚ်စံၚ် ပ္ဍဲညးတၠကၠအ်ထၜိုတ်တအ် ဂၠိုၚ်မံၚ်ရောၚ်ဂှ် ညးကၠအ်ထၜိုတ်တအ် ဟီုရ။
“ဇကုဂှ် ကၠအ်နွံမံၚ်ၜါကၠအ် အရိုဟ်သၞာံတှေ် မွဲကၠအ်ဂှ် ကဵုထောံကောန်လိၚ် သှေ်မွဲကၠအ်ဂှ်တှေ် ဇကုခွာတ်၊ က္လေၚ်မွဲနာဍဳကတဵုတှေ်တုဲ၊ သၞာံဏံ ဒးအာနူဇိုၚ်သဝ်တ္ၚဲဟဍေံရ ၜါကၠအ် ဇကုဒးခွာတ်ကေတ်သီုၜါကၠအ်ရ၊ မုပရောတှေ် ဠဂှ်မှ ကောန်ဇာတ် သမ္ဘာဇကု ဂွံစရုံ၊ ဒးဂ္စါန်ကေတ်ညိလေဝ် ပဟလဵု၊ ယဝ်ကဵုထောံကောန်လိၚ် မွဲကၠအ်တှေ်ပၠန်လေဝ် အရၚ်ဇကုဂွံအောန်အာ၊ ကဵုၚုဟ်ဗွဝ်ဖျာတိုန်မံၚ်လမုဟ်တှေ် ကြေပ်ရဲထၜိုတ်” သာ်ဝွံ ညးတၠကၠအ်ထၜိုတ် နူကွာန်သံၚ်သၟဴတ္ၚေက်မွဲတၠ ဟီုရ။
ညးတၠကၠအ်ထၜိုတ်တအ် လၟေၚ်သၞာံမ္ဂး လိၚ်ကေတ်ကောန်ရဲ ပါ်ပရအ်ထောံကဝက်ဂှ်ဂၠိုၚ်တုဲ သၞာံဏံ ပါ်ကဵုကောန်ရဲမ္ဂး စသုၚ်ဟွံရုံဂပ်ဂှ်ရ အလဵုဇကုတၠကၠအ်တအ် ဒုၚ်ကေတ်ဒဒိုက်တုဲ ဒးခွာတ်မံၚ်နွံရ၊ သွက်ညးကၠအ်ထၜိုတ်သ္ၚောဲ ဒးအာကဵုကွဳလိုန်ဓါတ်တအ် ဒးစုတ်ကၠေၚ်ကွဳကဵု ၚုဟ်ဂွံထၜိုတ်ဂှ် တော်မ္ဂး ပဵုတုဲခက်ခုဲဂၠိုၚ် ညးဆက်ဟီုလဝ်ရ။
ၚုဟ်ထၜိုတ်သၞာံတုဲတေံ အခိၚ်စပံက်ထၜိုတ်ဏံဝွံ တီုတီု ၚုဟ်နွံအကြာ (၈၀၀)၊ ကြဳကြဳ ၚုဟ်နွံအကြာ (၁၁၀၀)၊ သၞာံဏံ တီုတီု ဂွံၚုဟ် (၁၁၀၀)၊ ကြဳကြဳ (၁၅၀၀) ရ။ တော်ကဵုၚုဟ်ဗွဝ်ဖျာတၞဟ်တၞဟ် ၚုဟ်ဝါဲတဆိပ်ချေံတံတုဲ ၚုဟ်မးထၜိုတ်ပဵုတိုန်ဟွံဂၠိုၚ်ဂှ်ရ သွက်ညးကၠအ်ထၜိုတ်တအ် တော်စဟွံကိတ်ဒှ်မံၚ်ရ။
ပ္ဍဲဒေသလှာဒကှ်ဝွံ ဒုၚ်သ္ဇိုၚ်ကဵု ကမၠောန်ထၜိုတ်တုဲ ဂယိုၚ်မံၚ်လမျိုဂၠိုၚ်၊ ပၞော်ဩန်လုပ်ကမၠောန်တၞဟ်ဟွံမွဲဂှ်ရ ၚုဟ်ထၜိုတ်ဟွံထပ်တိုန်မ္ဂး ဆက်တုဲဇီုကပိုက်အာကဵု ပရေၚ်စသုၚ်မံၚ်စံၚ် ညးဒေသတအ်ဂၠိုၚ်မံၚ်ရ။