သၞံၚ်တိုၚ်၊ ဂိတုသေပ်တေမ်ဗာ ၁၂၊ ၂၀၂၂
အပ္ဍဲအခိၚ်လိုက်ဝှ်တိကှ်ဏံ ပေဲါဇာတ်မၞုံပ္ဍဲတွဵုရးဍုၚ်မန်ဂမၠိုၚ် သွက်ဂွံလှေ်ဒယှေ်လဟိၚ်အာမာန်ဂှ် စပ္တံစဳဇန်ဒၟံၚ်ရောၚ် ဂွံတီကေတ် နူကဵုဂကောံပေဲါဇာတ်တအ်ရ။
လၟုဟ်ဏံဝွံ ဂကောံပေဲါဇာတ်ဂမၠိုၚ် ဗီုညးကဵုညး ကတ်လ္ၚတ် ပ္ကတ်ပ္ကေၚ် တေက်မံၚ်ဇာတ်တုဲ ညံၚ်ပေဲါဇာတ်တံ ဂွံကလေၚ်ဂျိုၚ်တိုန်မွဲဝါပၠန်ဂှ် စဳဇန်မံၚ်ဖိုဟ်ရောၚ်ဂှ်လေဝ် ဥက္ကဌ ဂကောံပေဲါဇာတ် နာဲသာန်ဠေန် ဟီုရ။
“ပ္ဍဲကဵုပိုဲဂှ် ဂကောံပေဲါဇာတ် ပ္တိုန်လဝ်အခေါၚ်လှေ် နွံ (၃၈) ဇာတ်ရ။ သီုမန် သီုဗၟာရ။ နူကဵုဂကောံပေဲါဇာတ်ဗဟဵုဂှ်လေဝ် ဖျေံလဝ်ကဵုတုဲမံၚ်ရ။ သွက်ဂွံဆက်ကၠောန်ဟေၚ်နွံရ။ အခိၚ်ယဲကိုဝ်ဝေဒ်သ္ကာတ်မြဟ် ဒးဒေံါဇူလဝ် ကြပ် (၃) သၞာံဏောၚ်ဟီုတှေ် သၟာအနုသုခုမသီုဖအိုတ်တံ ဒှ်အခက်ခုဲကဵု ပရေၚ်စသုၚ်မံၚ်စံၚ်ရ။ နကဵုလၟေၚ်ကမၠောန်ဂတ ညံၚ်ဂွံဒှ်ဂှ် ဒးကၠောန်ဟေၚ်” သာ်ဝွံ ဂးရ။
ဟိုတ်နူကဵု အကာဲအရာ ယဲကိုဝ်ဝေဒ်ကဵု အကာအရာ ပရေၚ်ဍုၚ်ကွာန်ဟွံညိၚ်ဝတ်ဂှ်ရ ပေဲါဇာတ်ဂမၠိုၚ် ဒးဒေါံဇူလဝ်အိုတ်တုဲ လၟုဟ်ကာလဂွံအခေါၚ် ကလေၚ်လှေ်ပၠန်ဂှ် ဂွံလဝ်သြန်ထံက်ပၚ်တံနွံကီု ညးဆက်ဟီုရ။
ပ္ဍဲဂိတုသေပ်တေမ်ဏံအိုတ်မ္ဂး ပေဲါဇာတ်ဗၟာဂမၠိုၚ်တံ စလှေ်အာ လ္ပာ်တွဵုကရေၚ်တေံကၠာတုဲ ပေဲါဇာတ်မန်တံဝွံ သွက်ဂွံလှေ်အာ လ္ပာ်ဒေသမန်တံဂှ် ဟိုတ်နူကဵုပရေၚ်ဂီုကၠီုတုဲ ဒးလဇလဝ်အခိၚ်ညိရောၚ် ညးက္ဍိုက်ပ်ပေဲါဇာတ် နာဲဒိုၚ်နာ ဟီုရ။
“ပေဲါဇာတ်မန်ပိုဲတံဂှ်တှေ် ဒးပမံၚ်ဇြဟတ်၊ ဒးဗ္ဒဗ္ဒဲါမံၚ် ပွိုၚ်ဍုၚ်ဇြပ်ဗု၊ ရေဝ်၊ မုဟ်ဍုၚ်ဏောၚ်ဟီုတှေ် ပြဟ်ပြဟ်ဏံ နကဵုအကာဲအရာ ပရေၚ်ဂီုကၠီုဂှ် ပိုဲတံ ချဳဓရာၚ်ဟွံဂွံဏီပုဟ်။ ဆဂး ပေဲါဇာတ်မၞုံဒၟံၚ် ပ္ဍဲတွဵုရးဍုၚ်မန် သီုဖအိုတ် ညံၚ်ဂွံလှေ်မာန်ဂှ်တှေ် ပိုဲတံ စဳဇန်လဝ်တုဲရ” သာ်ဝွံ ညးဟီုရ။
နကဵုပေဲါဇာတ်ဂမၠိုၚ်တံဝွံ ၜိုန်ရဂွံအခေါၚ်လှေ်ကီုလေဝ် ဟိုတ်နူကဵု ကပေါတ်မဆေၚ်စပ်ကဵုပေဲါဇာတ်တံ ၚုဟ်မးသၠုၚ်တိုန်မံၚ်ကီု၊ ဒးဒှ်မံၚ်ဓဝိၚ်ကဵု အကာဲအရာ ပရေၚ်ဂီုကၠီုဂှ်ရ သွက်ပေဲါဇာတ်တံဂှ် ဒှ်မံၚ်တၚ်ကော်ဆဴမွဲရောၚ် နာဲဒိုၚ်နာ ဆက်ဟီုလဝ်ရ။
ပ္ဍဲတွဵုရးဍုၚ်မန်ဝွံ ဂကောံပေဲါဇာတ် ကလိဂွံလဝ် အခေါၚ်လှေ်လဟိၚ် အပံၚ်သီုဖအိုတ် နွံဒၟံၚ် (၃၀) ဇာတ်ပြၚ်ရောၚ် ဂွံတီကေတ်ရ။
