စနူအခိင်လိုက်ဝှ်ဏံတုဲ ဂၠံၚ်ဇၞော်ရေဝ်-ဇြပ်ဗု မွဲဒမြိပ်ဂှ် ပေါဲဗတိုက်ညိင်သ္ရိတ်ကၠုင်မံၚ်ဗွဲမလအ်လဂှ် တ္ရဲဏံ (ဒဳဇြေမ်ဗာ ၁၇) အခိင်နူဂယးပြဟ်ဏံ ကရပ်ကွာန်တၟိ တၟံကၞေင်ဂှ် ပေါဲဗတိုက်ကလေင်စဒှ်ပၠန်တုဲ ညးဍုင်ကွာန်တံ အာကၠုင် စွံသတိညိ ညးဒေသမွဲတၠ ဟီုရ။

ပေါဲဗတိုက်ဝွံ က္တဵုဒှ်ဒၟံင် ကရပ်ကွာန်တၟိ တၟံကၞေင် ပွိုင်ဍုင်ရေဝ်သၟဝ်ကျာတုဲ စနူအခိင်နူဂယးပြဟ် ၅ နာဍဳပြင်ဂှ် သီုမၠံက် ဇၞော် မၠံက်ဍောတ် ဗြုမံင်ကွေံကွေံရောင် သ္ဂးရ။

“ဗဒါဲကွာန်တၟိ တၟံကၞေင်ဂှ် ပေါဲဗတိုက်ဒှ်မံင်ဖိုဟ်၊ သီုလွဟ်ဇၞော် လွဟ်ဍောတ်ဍောတ် ဗြုဆက်ကွေံကွေံ၊ နူကဵုဂယးပြဟ် စဵုကဵုလၟုဟ်ဂှ် ဗြုမံင်ဖိုဟ်၊ ညးဍုင်ကွာန်တံ အာကၠုင်ဂၠံင်ဇၞော် ဒးစွံသတိတုဲ တတ်အာကၠုင်၊ ကလင်ပရိုင်တုဲ အာကၠုင်ညိ” သာ်ဝွံ ညးဒေသကွာန်တၟိဂှ်မွဲတၠ ဟီုရ။

ဒေသဒှ်ပေါဲဗတိုက် ကရပ်ကွာန်တၟိ တၟံကၞေင်ဂှ် ဒပ်ကံင်ဇြဳပၞာန်တံ ချဳဒရာင်မံင်နွံတုဲ ဂကောံပၠန်ဂတးပံင်တောဲတံလေဝ် ချဳဒရာင်အာကၠုင်မံင်နွံရ။

“ဒေသဏံတှ်ေ ဗော်ဍုင်မန်တၟိ(အေဒဳ)၊ ဒပ်ပၠန်ဂတးကရေင်၊ ဒပ်စဵုဒၞာညးဍုင်ကွာန် ဒပ်ဂမၠိုင်ရ ပံၚ်တောဲတုဲ ချဳဒရာင်မံင်နွံ၊ မုမုဒှ်အာကီုဂှ် ဟွံတီဏီ ပေါဲဗတိုက်အလန်ဏံ ဇၞော်ပိက်မံင်” သာ်ဝွံ ညးဆက်ဟီုရ။

မွဲဒမြိပ်ဂၠံင်ဇၞော်ရေဝ်-ဇြပ်ဗု ဂှ် ဗွဲကြဴနူကဵု အခိင်လိုက်ဝှ်ဏံတုဲ ဒပ်ကံင်ဇြဳပၞာန်တံ ချဳဒရာင်ကၠုင်မ္ရးတမ်ဒပ်တုဲ ဂကောံ ပၠန်ဂတးတံလေဝ် ချဳဒရာင်မင်မံင်ဂွန်ပန်ဗတိုက်နွံရ။

ဒေသဝွံ ဒှ်မံင်သဇိုင်တိဍာ် ဂကေံာပၠန်ဂတးတံတုဲ လတူဒပ်ကံင်ဇြဳပၞာန်တံ ချဳဒရာင်ကၠုင်အာမံင်ဂှ် ဂွံအခေါင်ခိုဟ်မ္ဂး ဂကောံပၠန်ဂတးဂမၠိုင်တံ မင်ကြတ်ပန်ဗတိုက်ကၠုင်မံင် ဒပ်ကံင်ဇြဳပၞာန်တံ မွဲဏှမွဲဏှနွံကၠုင်ရောင် ဂွံတီကေတ်ရ။