အကြာပွိုင်မွဲၜါတ္ရဲဏအ်ဝွံ ပ္ဍဲဍုင်မတ်မလီု ဒၞါဲပါင်လုပ် တိတ်ဍုင်ကီု၊ အဒေါဝ်ဍုင်ကီု နကဵုကိုန်စဳဇန်တၟေင်တုဲ စၟဳစၟတ်ရပ်ဒၟံင် ကွဳစက်ယာန်၊ ကွဳလိုန် ဓာတ်တံ ဇၞော်ကဵုဇြတဟ်နွံရောင် ညးဒးဒုင်ရပ်စၟဳစၟတ်လဝ် လတူဍုင်မတ်မလီုမွဲတၠ ဟီုလဴထ္ၜးရ။

စၟဳစၟတ်ရပ် ကွဳစက်ယာန် မပ္တံကဵု ကွဳစက်၊ ကွဳလိုန်ဓာတ်အလန်ဏံဂှ် ဟွံဓမံက်ပရိုင်မွဲသာ် ဗက်ကြတ်စၟဳစၟတ်ရပ်မံင်တုဲ ဖျေံဒုဟ်ဒဏ်လေဝ် ဇၞော်ကွေံကွေံရောင် သ္ဂးရ။

“ဍေံရပ်အလန်ဏံဂှ် တၟေင်မံၚ် အရိုဟ်ဟ်အလန်တှ်ေ ဍေံလလောင်မံၚ် ဍေံလဴမံင်၊ ဍေံရပ်အလန်ဏံဂှ် ဗီုကဵု ကိုန်စဳ ဇန်တၟေင်တုဲ ဗီုကဵုကၠာတေံ ဂကောံပံင်ကောံဇဳ ဟွံသေင်ရ၊ ၜိုတ်ဆ ဗၠာဲသၟိင်ထိၚ်ဒဝ်စက်ယာန် (ကထုပ်ဗု) တံသၟးရ၊ ကွဳလိုန်ဓာတ် ဒုဟ်အောန်န်ညိတှ်ေ ဍေံတပ်ဒါန်ဩန် တုဲဍေံဗလးဏာ၊ ဗီုကဵု ဒုဟ်ဒန်ဇၞော်ဇၞော် လိုင်ဇြေန်ဟွံမွဲ စဂှ်တှ်ေ ဍေံကေတ်ဏာရုင်ဍေံ ဒဵုကဵုသီ၊ ကာ(ကွဳစက်)လေဝ် ဗီုဂှ်ရ ဒုဟ်အောန်န်တှ်ေ ဍေံတပ်ဒါန်ဩန် အဃောဂှ်နွံ၊ ဒုဟ်ဇၞော်ဇၞော် ဍေံသီပတိုန်ဏာရုင် (ဒပ်ဗၠာဲသၟိၚ်ထိၚ်ဒဝ်စက်ယာန်) တုဲ ပတိုန်အမှု ဒဵုကဵုဒးဒုင်သီ၊ သီုကဵုဒး ဒုင်ထံင်နွံမံင် အလန်ဏံ အစဳဇန်ဍေံတၟေင်ကွေံ” မၞိဟ်ကေင်ဒးဒုၚ်စၟဳစၟတ်တုဲ ဒးဒုင်တပ်ဒါန်ဩန် လတူဍုင်မတ်မလီု မွဲတၠ ဟီုထ္ၜးရ။

ဒပ်ဗၠာဲသၟိင်ထိင်ကောပ်ကာဲကွဳစက်ယာန် စၟဳစၟတ်ကွဳလိုန်ဓာတ် ကွဳစက်ကာတံဂှ် ပ္ဍဲပါင်လုပ် တိတ်ဍုင်မတ်မလီုကီု၊ အဒေါဝ်ဍုင် မတ်မလီု ဒၞာဲဂၠံင်ပန်သွာင်လ္ၚဵုဂှ်ကီု ကြတ်မံင်ဒၟံင်တုဲ ဇၟာပ်ကွဳလိုန်ဓာတ်၊ ကွဳစက်ကာတံဂှ် ရပ်စၟဳစၟတ်မံင် ဇၞော်ကဵုဇြဟတ်ရောင် ဂးရ။

“အဓိကဂှ်တှ်ေ လိုင်ဇြေန်၊ လိုင်ဇြေန်မၞိဟ်ဒဳ၊ လတုဲတှ်ေ ဂၞန်ဂတှ်ေ နွံဟွံမွဲ ကွဳကီု ကာကီု အတိုင်ပ္ဍဲလိုင်ဇြေန်ဂှ်ကဵု ကွဳ ကာဂှ် ကိတ်ညဳ ဟွံကိတ်ညဳ၊ လိုင်ဇြေန်မၞိဟ်ဒဳလေဝ် ဗီုဂှ်ရ ကိတ်ညဳနွံဟွံမွဲ ဗၠေတ်မွဲမွဲသာ်တှ်ေ ဒးဒုင်ထိင်ရပ်ရ၊ စိုပ်ရုင်တှ်ေ ကပေါတ်ဇကု ဒးဒုင်သီနွံ၊ သီုမၞိဟ် သီုကပေါတ် ဍေံသ္ပဒုဟ်တုဲတှ်ေ သီုဒးဒုင်သီ မၞိဟ်ဂှ် သီုဒးဒဏ်ထံင် ဆဂး ပ္ဍဲကဵုဒဏ်ထံင်ဂှ်တှ်ေ ဗွဲမဂၠိုင် ပညဳကေတ်ကဵုဩန် နွံဂၠိုင်၊ ဟီုဟဏံတှ်ေ ဍေံတံ (ကံင်ဇြဳပၞာန်) ဂၠာဲစပၞော်ဩန်ရ” ညးဆက်လဴကဵုရ။

ပ္ဍဲကဵုဒပ်ဗၠာဲသၟိင်ထိင်ဒဝ်ကောပ်ကာဲစက်ယာန်(ယဉ်ထိန်းရဲ)တံ စၟဳစၟတ်ရပ်ဒၟံင် ကွဳလိုန်ဓာတ် ကွဳစက်ယာန်တံဂှ် ထ္ၜး ဟိုတ်ဗၠေတ်ကဵုသၞောဝ် သ္ပဒုဟ်မွဲမွဲသာ်တုဲ ယဝ်ကွဳလိုန်ဓာတ်မ္ဂး အောန်အိုတ် အကြာ ၃ ကိုဋ် ကဵု ၄ ကိုဋ် ဒဵုစိုပ် ၇ ကိုဋ် ၁၀ ကိုဋ်ကီု ယဝ်ခါရကွဳစက်ကာမ္ဂး အောန်အိုတ် ၈ ကိုဋ် ၁၀ ကိုဋ် ဒဵုကဵုသီကၠေံထောံကာ သီုထိင်ရပ်မၞိဟ်တုဲ ဒးနုက်စဵုကဵု အကြာ ၁၀၀ ကိုဋ်လေဝ်နွံရောင် ဂွံတီကေတ်ရ။