အကြာတ္ၚဲတဏံဝွံ ပ္ဍဲကဵုဂိတုဖဝ်ရဂိုန်မံက်ဏံ နူကဵုဗၠာဲသၟိင်သေံ သၚ်္ခဠဗူရဳ (ကွာန်ဝၚ်္က)တံ ထပ်ရပ်ဂွံကောန်ဍုင်ဗၟာ ရဲကၠတ်လုပ်ဍုင်သေံ လၟိဟ် (၅၅) တၠပၠန်ရောင် ဂွံတီကေတ်ရ။
မရပ်ဂွံလဝ်ကောန်ဍုင်ဗၟာတဏံဂှ် မၞုံအာယုက်အကြာ ၁၆ သၞာံ ကဵု ၃၀ သၞာံနွံရောင် ဂးလဝ်ရ။
ဂိတုမာတ် စၟတ်တ္ၚဲ (၅) အခိင်ဗ္တံ ၈ နာဍဳသေံဂှ် နူကဵုဗၠာဲသၟိင်သေံ (ကွာန်ဝၚ်္က)တံ ထပ်ကလေင်ရပ်ဂွံ ရဲကၠတ်လုပ်ဍုင်သေံ လၟိဟ် (၃၁) တၠဂှ်ကဵု ပၞော်ဍာန်ဍာ် နကဵုဂၠုင်ဂှ် (၁၀) တၠပၠန်ရောင် ဂွံဆဵုကေတ်ရ။
ဒှ်သာ်ဂှ်ရ အခိင်ဗ္တံတ္ၚဲဟွံရုဲ ဗၠာဲသၟိင်သေံတံ ပတေင်ကၠုင်ဂီုကၠီု အကြာဂၠံင်ပိသွာင်တုဲ သီုကဵုစၟဳစၟတ် ဂေတ်ဂီုကၠီုကဵုဂၠုင် ဒၞါဲကြုင်ဒဒန်ဆုကွာန်ဝၚ်္ကတုဲ ဗက်စၟဳစၟတ် ကုညးမကၠတ်လုပ်ဍုင်သေံဂမၠိုင်တံနွံရ။
အကြာတ္ၚဲဏံဝွံ ဂိတုမာတ် စၟတ်တ္ၚဲ ၄ ဂှ် ရပ်ဂွံမၞိဟ် (၁၄) တၠ၊ ပ္ဍဲဂိတုမာတ် စၟတ်တ္ၚဲ ၅ တ္ၚဲဏံပၠန်ဂှ် (၄၁) တၠ ဗၠာဲသၟိင်သေံသၚ်္ခဠဗူရဳ ကဵု ဗၠာဲသၟိင်သေံဍုင်ကမ္မရဳတံ ရပ်ဂွံမံင်မၞိဟ်ကၠတ်လုပ်ဍုင်သေံအဆက်က်နွံကၠုင်လဝ်ရ။
ဒၞါဲမရပ်ဂွံလဝ်ကောန်ဍုင်ဗၟာ (၅၀) တၠပြင်ဏံဂှ်ဝွံ နွံအကြာကွာန်ထံက်ခၞောန် ကဵု ကွာန်ဝၚ်္က၊ ဒှ်ပၞော်ဂၠံင်လုပ် ဒေသပယျဵုဍုင်ကျာ်ပိတုဲ သွက်ဂွံလုပ်စိုပ်အာကၠောန်စကမၠောန်ပ္ဍဲဍုင်သေံသာ်ဏံမာန်ဂှ် ဒးကဵုကၠုင်လဝ်သြန် ကုညးပၠုပ်မၞိဟ် ဃံင်စအကြာတံ ညးမွဲတၠမ္ဂး သြန်သေံ ၁၃၀၀၀ ၝာတ် ကဵု ၁၆၀၀၀ ၝတ်နွံရောင် ဂွံတီကေတ်ရ။
ကောန်ဍုင်ဗၟာကၠတ်လုပ်ဍုင်သေံတဏံဂှ် ကၠုင်နူရးဒေသဇၞော်လ္ဂုင်၊ ရးအင်ဝ၊ ရးဗဂေါဝ်တေံရောင်ဂးတုဲ သွက်ဂွံအာကၠောန်ကမၠောန် အပ္ဍဲကဵုဍုင်သေံ ဍုင်ၜင်ကံက်၊ ခရိုင်သမုတ်သဃန်တေံရောင် ဂွံတီကေတ်ရ။
ဟိုတ်နူကၠတ်လုပ်ကၠုင် နကဵုဂၠံင်ဟွံလုပ်သၞောဝ်သာ်ဏံဂှ်ရ နူကဵုဗၠာဲသၟိင်သေံရပ်ထိင်လဝ် ပ္ဍဲကဵုရုင်ဗၠာဲသၟိင်သၚ်္ခဠဗူရဳဂှ်တုဲ စၟဳစၟတ်ကေတ်ဒၟံင်တၞးလိက်သက်သဳတုဲမ္ဂးတှေ် ကလေင်ပလံင်ဏာ ဒၞါဲဌာန်ဇကုတေံပၠန်ရောင် ဂးလဝ်ရ။
ပ္ဍဲကဵုဂိတုမာတ်ဏံမံက် ပွိုင်ၜါတ္ၚဲဓဝ်ဂှ် ဗၠာဲသၟိင်သေံ၊ ဒပ်ပၞာန်၊ ဒပ်ဂီုကၠီု အလဵုအသဳသေံ မဖျေံသ္ဇိုင်ဒေသပယျဵုတံ ပတေင်လဝ်ပရေင်ဂီုကၠီုဂှ်ရ ရပ်ဂွံမံင် ကောန်ဍုင်မန်ဗၟာ ရဲကၠတ်လုပ်ဍုင်သေံတံ အဆက်က်နွံကၠုင်ဒၟံင်ရောင် ဂွံတီကေတ်ရ။
