ပေါဲရုဲမာဲကမ္မယှေန်ပၞာန်ဗၟာတံ ရန်လဝ် သွက်ဂွံကၠောန်ကၠာသၞာံ (၂၀၂၅) ဟွံအိုတ်ဏံဂှ် ပါ်ကၠောန်အာ မွဲဒေသတုဲမွဲဒေသ အဆံၚ်ဆံၚ်နွံရောၚ် ညးကြပ်ကဵု ကမ္မယှေန်ပေါဲရုဲမာဲ တွဵုရးဍုၚ်မန်မွဲတၠ ဟီုထ္ၜးရ။

ဒၞာဲဌာန်ဒေသၜိုဟ်ဩိုဟ်ဂှ် သွက်ဂွံစကၠောန်အာကၠာတုဲ မွဲဒေသတုဲမ္ဂး သွက်ဂွံဆက်ကၠောန်အာ မွဲဒေသတုဲမွဲဒေသရောၚ် ညးကြပ်ကဵု ကမ္မယှေန်ပေါဲရုဲမာဲဂှ် ဟီုသာ်ဝွံရ။

“ပေါဲရုဲမာဲဂှ် ဒၞာဲကၠောန်လောဲ ဒၞာဲၜိုဟ်ဩိုဟ် ဗီုကဵုလတူဍုၚ် ဗွိုၚ်ကြပ်ကဵုဍုၚ် ဍေံကၠောန်ကၠာ၊ တုဲတှေ် ဍေံဆက်ကၠောန်အာ မွဲဒေသတုဲမွဲဒေသ ကၠောန်တိတ်အာ ကဆံၚ်ဆံၚ် ရန်လဝ်နွံ” သာ်ဝွံ သ္ဂးရ။

အခိၚ်ကာလကမ္မယှေန်ပၞာန်ဗၟာတအ် ရန်လဝ် သွက်ဂွံကၠောန်ဗဒှ်အာ ပေါဲရုဲမာဲ ကၠာသၞာံ (၂၀၂၅) ဟွံအိုတ်ဏံဂှ် ၜိုန်ရပရေၚ်ဍုၚ်ကွာန်၊ ပရေၚ်ပၞာန်ဒှ်ဒၟံၚ်ထုဲထံၚ်ကီုလေဝ် နကဵုကမ္မယှေန်ပၞာန်တအ် ဟွံဒှ် ညံၚ်ဂွံဒှ်၊ ၜိုတ်ကၠောန်ဂွံဂှ် ကၠောန်အာတွဵုရောၚ်ဂှ်လေဝ် ညးကြပ်ကဵု ကမ္မယှေန်ပေါဲရုဲမာဲဂှ် ဆက်ဟီုဗီုဏံရ။

“ပေါဲရုဲမာဲဂှ် ဟွံဒှ် ညံၚ်ဂွံဒှ်ဂှ် ဍေံတအ် ဒးကၠောန်တွဵုရ၊ ဟိုတ်နူဂှ်ရ ဗီုကၠောန်ဂွံ ဒၞာဲကၠောန်ဂွံဂှ် ဍေံကၠောန်အာတွဵုရ၊ ဒၞာဲကၠောန်ဟွံဂွံဂှ် ဍေံစွံလဝ် မုဟွံဒှ်ပုဟ်၊ ညးဍုၚ်ကွာန်တအ် ကၠုၚ်ကဵုမာဲကီု ဟွံကၠုၚ်ကဵုမာဲကီု ဍေံဟွံတော်ပုဟ်၊ မၞိဟ်ဂအုံ ထံက်ဂလာန်ကဵုဍေံ ကၠုၚ်ကဵုမာဲကဵုဍေံတှ်ေ ကမၠောန်ဍေံ ဒှ်ရ ဍေံတော်လေဝ်” သာ်ဝွံ ညးဟီုရ။

ပေါဲရုဲမာဲ သၞာံ (၂၀၂၅) ဏံဂှ် စတမ်နူဂိတုဒဳဇြေန်ဗာသတ္တာဟလက္ကရဴအိုတ် စကၠောန်တုဲ ဒဵုကဵု သၞာံ (၂၀၂၆) ဂိတုဂျာန္နဝါရဳသတ္တာဟတတိယဂှ် ရန်လဝ်သွက်ဂွံပါ်ကၠောန်အာ ဒေသအဆံၚ်ဆံၚ်တုဲ ပွိုၚ် (၁) ဂိတု သွက်ကၠောန်အာနွံရ။

ပ္ဍဲတွဵုရးဍုၚ်မန်ဂှ် ဗော်ပရေၚ်ဍုၚ်ကွာန် ချဳဒရာၚ်ပံက်လဝ်ရုၚ် ဟွံအောန်နူ (၇) ဗော်နွံတုဲ သွက်ဂွံချဳဒရာၚ် စန်ဒက်လုပ်ပေါဲရုဲမာဲဂှ် မၚ်ဒၟံၚ်အခေါၚ် နူကမ္မယှေန်ပေါဲရုဲမာဲတအ် လလောၚ်ပ္တိတ်ရ။

မွဲလ္ပာ်ပၠန်ဂှ် ပေါဲရုဲမာဲ ညံၚ်ဂွံလီုဂှ် ဒစဵုဒစး ဗတိုက်အာရောၚ်တုဲ ညးစၞးအလံၚ်အမာတ် ဗော်ပရေၚ်ဍုၚ်ကွာန်တအ်ကီု ညးဍုၚ်ကွာန်တအ်ကီု ညံၚ်ဟွံဂွံကဵုဒးဇြဟတ်ကဵု ပေါဲရုဲမာဲပၞော်တိတ် ကမ္မယှေန်ပၞာန်ဗၟာဂှ်လေဝ် ဂကောံပၠန်ဂတးဂမၠိုၚ်တအ် ဖတိုက်ဖအောဝ်လဝ်နွံဂှ် ဂွံတီကေတ်ရ။