အခိၚ်ညးဍုၚ်ကွာန်တအ် ခက်ခုဲကြေပ်ဂြတ်ဒၟံၚ်ကဵု သ္ဂောံသုၚ်စောဲကၠေၚ်ဂှ် နူကဵုဆေၚ်သွံကၠေၚ်ဗွဲမဂၠိုၚ်တအ် ထပ်ကၟာတ်မတ်ညးဍုၚ်ကွာန်တအ်တုဲ သွံဒၟံၚ်ကၠေၚ်အိုတ်ရောၚ် ညးရာန်ကၠေၚ်တအ် ဟီုရ။
ၚုဟ်ကၠေၚ်ဂှ် နူကဵုဆေၚ်သွံကၠေၚ်တအ် တေဝ်(ဗာန်)ကာတ်လဝ်ၚုဟ်မွဲဗီု၊ သွံဒၟံၚ်ကဵု ညးဍုၚ်ကွာန်တအ်ဂှ် ၚုဟ်မွဲဗီုတုဲ နကဵုညးဍုၚ်ကွာန်တအ် ယဝ်ဟီုဓမံက်ဒးမ္ဂး ဖေက်ဟွံဂွံကၠေၚ်တုဲ ဆဵုမံၚ်ဗၠေတ်လေဝ် ဟွံဂံၚ်ဟီုအိုတ်ရောၚ် ညးရာန်ကၠေၚ်နူဇြပ်ဗုမွဲတၠ ဟီုရ။
“ၚုဟ်ကၠေၚ်ဓာတ်ဂှ် မွဲလဳတာ (၅၄၀၀-၅၃၀၀) ၊ ကၠေၚ်ဒဳဇြေဝ်တှေ် (၇၀၀၀) ပြၚ် ကာတ်လဝ်ပ္ဍဲဆေၚ်၊ ဠ သွံကဵုညးဍုၚ်ကွာန်တအ်တှေ် ၚုဟ်ဂှ် ဟွံဂွံပုဟ်၊ ကွဳလိုန်ဓာတ်ကဵုမံၚ် (၁၀၀၀၀) ဂှ် မွဲလဳတာပြၚ်ညိဓဝ်ရ၊ ကွဳစက်လေဝ်ဗီုဂှ်ရ ကဵုမံၚ်သွက် (၃၀၀၀၀) ဂှ် ဂွံဆၜိုတ် (၃) လဳတာဓဝ်ရ၊ ယဝ်တော်ထောံၜိုတ်ကဵုမံၚ်ဂှ်တှေ် ဍေံတအ်သွံမံၚ်မွဲလဳတာ အကြာ (၁) လက်မွဲတဲ” သာ်ဝွံ နာဲမျေအ်ဥူ (ဗလေတ်လဝ်ယၟု) ညးၜေတ်ရေၚ်ရာန်ကၠေၚ်နူဇြပ်ဗုဂှ် ဟီုရ။
တုပ်သာ်ဂှ်ကီု ညးဍုၚ်ကွာန်တၠကမၠောန်ရုၚ်စက်/ရုၚ်ကမၠောန်ကီု၊ တၠကမၠောန်သၟာတဵုလွဳတအ်ကီု သွက်ဂွံသုၚ်စောဲကၠေၚ်စက်ဂှ်တုဲ ကၠောန်လဝ်လိက်ထံက်ဂလာန် နူကဵုညးတာလျိုၚ်အုပ်ဓုပ်ဍုၚ် ပွိုၚ်ဍုၚ်တအ်နွံရ။
ညးဍုၚ်ကွာန်ရာန်ကၠေၚ် နကဵုလိက်ထံက်ဂလာန်တအ်ဂှ်လေဝ် ခ္ဍၚ်လဝ်ၚုဟ်ကၠေၚ် ၜိုတ်ၜါဆတုဲ သွံကဵုဒၟံၚ်ရောၚ် ညးရာန်ကၠေၚ် နကဵုလိက်ထံက်ဂလာန် နူမုဟ်ဍုၚ်မွဲတၠပၠန်ဂှ် ထပ်ဟီုပၠန်ရ။
“ရုၚ်ကမၠောန်ရုၚ်စက် (စတီး-သံပန်း) ပိုဲဂှ် ရာန်မွဲတဲတှေ် ဂွံ (၁၀) ဂါလာန်၊ ၚုဟ်ကၠေၚ်ဂှ် (၅၀၀၀) ပြၚ်ညိရ၊ ဍေံသွံကဵုဂၠိုၚ်ဂၠိုၚ် (၁၀) ဂါလာန်ဂှ်တှေ် (၄၀၀၀၀၀)၊ ဒတုံမံၚ် မွဲလဳတာတှေ် (၁၀၀၀၀) မွဲတဲ၊ ဠ ၚုဟ်ဍေံကာတ်လဝ်တေံဂှ် မွဲလဳတာ (၅၀၀၀) ဍေံသွံကဵု ဂါလာန်တှေ် မွဲလဳတာ (၁၀၀၀၀) မွဲတဲ၊ ဂွံဟီုဂှ်လေဝ် ဂတဏံ ဖေက်ဍေံဟွံသွံကဵုတုဲတှေ် မွဲ လေဝ်ဟွံဂံၚ်ဟီုပုဟ်” သာ်ဝွံ နာဲမိုၚ်မိုၚ် ဟီုရ။
ကၠေၚ်ဓာတ်ကီု ကၠေၚ်ဒဳဇြေဝ်ကီုဂှ် ကာလကွဳလိုန်ဓာတ်၊ ကွဳစက်ဂှ် ၚုဟ်မွဲဗီု၊ ကာလညးဍုၚ်ကွာန် ရာန်နကဵုလိက်ထံက်ဂလာန်၊ နကဵုဂါလာန်ဂှ် သၠုၚ်လဝ်ၚုဟ်မွဲဗီု ဆေၚ်သွံကၠေၚ်တအ် သွံခ္ဍၚ်လဝ်ၚုဟ်အိုတ်ရ။
နူကဵုဌာနထိၚ်ဒဝ်ကၠေၚ် (စွမ်းအၚ်) ဝွံ ဆေၚ်သွံကၠေၚ်တအ် ယဝ်သွံကၠေၚ် ဗၠေတ်ကဵုသၞောဝ်မ္ဂး ညံၚ်ဂွံပတိုန်ထ္ၜးညိ ပတိတ်လဝ်လိက်နွံကီုလေဝ် နကဵုညးဍုၚ်ကွာန်တအ်ဂှ် ယဝ်ရပတိုန်ထ္ၜးမ္ဂး ဖေက်ရာန်ကၠေၚ်ဟွံဂွံတုဲ ညးမွဲလေဝ် ဟွံ ဂံၚ်ပတိုန်ထ္ၜးရောၚ် ရဲရာန်ကၠေၚ်တအ်ဟီုထ္ၜးဂှ် ဂွံတီကေတ်ရ။
