ကြဴနူကဵုပၞာန်သီအဝဵုတုဲ ဇၟာပ်စိုပ်သဘၚ်အတးဂှ် အခိုက်ကၞာဖာပ်ဗ္စပုၚ်အတး အောန်စှေ်ကၠုၚ်ဒၟံၚ် လၟေၚ်လၟေၚ်သၞာံတုဲ အတးသၞာံဏံလေဝ် ကၞာထပ်ဖာပ်ဗ္စပုၚ်အတး အောန်စှေ်အာကွေံကွေံရောၚ် ညးကြေဝ်အတးဍုၚ်မန်မွဲတၠ ဟီုထ္ၜးရ။
သဘၚ်အတးသၞာံဏံ ၜိုန်ရကြေပ်ဂြတ်ကဵုကၠေၚ်စက်ကီုလေဝ် မၞိဟ်တိတ်ကြေဝ်ဝေၚ်အတး ဟွံအောန်စှေ်အာ နူသၞာံတုဲကၠုၚ်တေံတုဲ အခိုက်ကၞာဖာပ်ဗ္စပုၚ်အတးဂှ်ရ ကြပ်ဟွံဆဵုရရောၚ် နာဲဌေလောန် နူဍုၚ်ကၟာဝက်ဂှ် ဟီုရ။
“ရဲကြေဝ်ဝေၚ်အတးဂှ် တော်ကဵုသၞာံတုဲတုဲကၠုၚ်တေံတှေ် ဂၠိုၚ်ပိက်မံၚ်ရ၊ ဆဂး ပ္ဍဲအကြာဂၠံၚ်ကွာန်တအ် အခိုက်ကၞာ ဗီုကဵုကၞာထး ဖာပ်ဗ္စပုၚ်အတးဂှ် ကြပ်ဟွံဆဵုရ၊ အောန်စှေ်အာကွေံကွေံရ” သာ်ဝွံ ညးဟီုရ။
နူကၠာပၞာန်ဟွံသီအဝဵု (၂၀၂၁) လ္ပာ်တေံ စိုပ်သဘၚ်အတးမ္ဂး ဒေသကွာန်မန်ဗွဲမဂၠိုၚ်ဂှ် တက်လဝ်ကၞာထးတုဲ ဂကောံသၟတ်တအ် ဒုၚ်တၠုၚ်ဖာပ်ဗ္စဒၟံၚ်ပုၚ်အတး ဂၠိုၚ်ကဵုကၞာထး နွံကၠုၚ်ဒၟံၚ်ရ။
ကြဴနူကဵုပၞာန်သီအဝဵုတုဲဂှ် အကာဲအရာ ပရေၚ်ဍုၚ်ကွာန်ရုသံၚ်တုဲ စိုပ်သဘၚ်အတးလေဝ် မၞိဟ်ဝေၚ်အတးအောန်၊ ပကောံမၞိဟ်ဒက်ဂကောံတုဲ ဂွံဖာပ်ဗ္စပုၚ်အတး ကုရဲကြေဝ်ဝေၚ်အတးဂှ်လေဝ် အောန်စှေ်ကၠုၚ်လၟေၚ်သၞာံရ။
“စိုပ်သဘၚ်အတးတှေ် အခိုက်ကၞာဖာပ်ဗ္စပုၚ်အတးဂှ် ဒေသကွာန်မန်ပိုဲဏံ ပွိုၚ်ဍုၚ်ဗွဲမဂၠိုၚ် ပိုဲကြေဝ်ဝေၚ်ဍာ်အတးတှေ် ဂွံဆဵုကေတ်မံၚ်ဂၠိုၚ်ကွေံကွေံ၊ ကၠာတေံဏံ (၂၀၂၁) သၚ်လ္ပာ်တေံဟီုတှေ် ပိုဲကြေဝ်ဝေၚ်အတးတှေ် မွဲဒမြိပ်ဂၠံၚ် စိုပ်တဝ်ကဵုကွာန်မန်ပိုဲတှေ် ဂကောံသၟတ်တအ် ဖာပ်ဗ္စပုၚ်အတး မွဲကွာန်တုဲမွဲကွာန် စဟွံမာန်ဒှ်အာ၊ ကၞာထးဖာပ်ဗ္စပုၚ်အတး နွံကၠးကၠးဏောၚ်၊ လၟုဟ်ရ အခိုက်ကၞာဖာပ်ဗ္စပုၚ်အတးဂှ် ကြပ်ဟွံဆဵုရ၊ ပိုဲစှေ်ကၠုၚ်နူမတ်မလီု အာကျာ်ခၟဳ စက်စာဲမှဂှ် ကုသိုလ်ခိုဟ်ကွေံကွေံမှ ဂွံဆဵုကေတ်မွဲဒၞာဲ” သာ်ဝွံ ညးကြေဝ်ဝေၚ်ဍာ်အတး နာဲသာန်လောန် နူဍုၚ်မတ်မလီုဂှ် ဟီုရ။
စိုပ်ကၠုၚ်သဘၚ်အတးမ္ဂး ဇၟာပ်ဒေသဍုၚ်ကွာန်မန်ဂှ် ကၠောန်တဴပုၚ်အတး နကဵုခၞာက္ၜၚ်၊ ခၞာကြုက်၊ ခၞာတဵု၊ ခၞာလသိုန် ခၞာနာနာတုဲ ပလံၚ်ပုၚ်ခွက်၊ ပုၚ်ဂဥုပ် ပ္ဍဲကျာ်ဘာကီု၊ ပလံၚ်ပုၚ်ခွက်၊ ပုၚ်ဂဥုပ် ပ္ဍဲသ္ၚိမၞိဟ်ဇမၞော်ဂမၠိုၚ်ကီု၊ ဂကောံသၟတ်တအ် သိုၚ် လဝ်ကၞာထးဇိုၚ်ဂၠံၚ်တုဲ ဒုၚ်တၠုၚ်ဖာပ်ဗ္စပုၚ်အတးကီုနွံရ။
ကြဴနူကဵုအကာဲအရာ ပရေၚ်ဍုၚ်ကွာန်ဒှ်ရုသံၚ် (၂၀၂၁) တေံ ဒက်ဂကောံတုဲ အခိုက်ကၞာ သိုၚ်ကၞာထးဇိုၚ်ဂၠံၚ် ဖာပ်ဗ္စပုၚ်အတးဂှ် အောန်စှေ်ညောန်ကဵုကြပ်ကၠေံအာရ။
