ပ္ဍဲဆေင်သွံကၠေင်စက်ဂမၠိုင် ပံက်လဝ်ဆေင်လေဝ် တၠဆေင်တအ် ဟွံသွကဵုကၠေင်တုဲ ညးဍုင်ကွာန်တအ် ဒှ်မံင်ခက်ခုဲကဵု ကၠေင်သုင်စောဲစက်ရောင် တၠကွဳစက်နူဍုင်ဇြပ်ဗုမွဲတၠ ဟီုရ။
ကၠေင်သုင်စောဲစက်ဂှ် စတမ်နူၜါပိတ္ၚဲတုဲကၠုင်ဏံတုဲ ပ္ဍဲဆေင်သွံကၠေင်တအ် ကၠေင်ပိုတ်မံင်သ္ဂးတုဲ တၠကွဳစက်ယာန် တအ်ကီု၊ တၠရုင်ကမၠောန်နာနာသာ်တအ်ကီု ဒှ်မံင်ခက်ခုဲကဵု ပရေင်သုင်စောဲကၠေင်စက်ရ။
“ကၠေင်ပိုတ်မံင်ၜါပိတ္ၚဲဒှ်ရ ဆေင်လ္ၚဵုဂှ်တှ်ေ ဗဂါပ်နူဂယးမွဲလစုတ်ဂှ် အာရာန်ဂွံ ဆဂး ဍင်ညိ၊ တုဲတှ်ေ ကၠေင်ဓာတ် 92 ဂှ်ဟွံမွဲရ ကၠေင်ဓာတ် 95 ရနွံ၊ တ္ၚဲသၠုင်တိုန်ညိတှ်ေ ဆေင်သွံကၠေင်တအ်ဂှ် ဟွံကၟာတ်လဝ်ပုဟ် ပံက်လဝ်အတိုင်ဂှ်ရ ဆ ဂးလုပ်အာရာန်ကၠေင်တှ်ေ ဍေံတာကဵုတဲ ကၠေင်ဟွံမွဲရ ဍေံဟီု” တၠကွဳစက် ဒမြိပ်လာင်ဇြပ်ဗု မတ်မလီုမွဲတၠ ဟီုထ္ၜးရ။
တၠဆေင်သွံကၠေင်စက်ဗွဲမဂၠိုင်ဂှ် မွဲကာလဏံ ရာန်ကၠေင်ဝါတ်မံင်သ္ဂးတုဲ ကၠေင်ဓာတ် 92 ကီု၊ ကၠေင်ဓာတ် 95 ကီု၊ ကၠေင်ဒဳဇြေဝ်ပရဳမဳယာန်ကီု ကၠေင်ပိုတ်မံင်သ္ဂးရ။
ကၠေင်စက်သွက်ဍုင်မန်ဂှ် တုဲတုဲတေံဒးအာရာန်ကေတ်မံင် နူကဵုသၞေဟ်(သီလဝါ)လ္ဂုင်ဂှ် မွဲကာလဏံ ဒးအာရာန်မံင် ပ္ဍဲ သၞေဟ်ဍုင်မုဟ်ဍုင်တုဲ ဟိုတ်ဖဵုသာ်လဵုဟွံတီတုဲ တၠဆေင်သွံရာန်ကၠေင်တအ် အတိုင်ပၟိက်စိုတ် ရာန်ကေတ်ကၠေင်ဟွံဂွံ ကတဵုဒှ်မံင်ရ။
“ကၠေင်ပိုတ်အာအိုတ်တးဂှ်ဟွံသေင် ဆဂး ညံင်ဟွံပိုတ်အိုတ်တးမွဲတဲဓဝ်ဂှ်တှ်ေ မွဲမွဲတ္ၚဲချိင်တုဲ ဒးသွံကဵုမံင်၊ ဖာနူဂယး တှ်ေ သွံကဵုမံင်ဇၟာပ်ဆေင်ရ၊ တ္ၚဲသၠုင်တိုန်ညိတှ်ေ ဗဒေါံထောံ ဖေက်ကၠေင်ပိုတ်အာမွဲတဲဓဝ်တုဲတှ်ေ ဒးချိင်တုဲ ဒးသွံကဵု မံင်” တၠဆေင်ကၠေင် ပွိုင်ဍုင်မုဟ်ဍုင်မွဲတၠ ဟီုရ။
လ္ပာ်တၠဆေင်တအ်ဂှ် ညံင်ကၠေင်ဟွံဂွံပိုတ်အာမွဲအလန်ဓဝ် ချိင်တုဲသွံမံင်ရောင် ဟီုကီုလေဝ် လ္ပာ်ညးဍုင်ကွာန်ညာတ်ဂှ် တၠဆေင်သွံကၠေင်တအ် ကေတ်အခေါင်ခိုဟ်လတူရာန်ကၠေင်ဝါတ်ဂှ်တုဲ ကၠေင်ဓာတ် 92 ဂှ် သ္ပကၠေင် 95 တုဲ သွံသၠုင်ပ တိုန်ဒၟံင်ၚုဟ်အိုတ်ရ။
ၚုဟ်ကၠေင်လုပ်သၞောဝ်ဂှ် ကၠေင်ဓာတ် 92 မွဲလဳတာဂှ် နွံအကြာ ၂၉၀၀ ဒ္ကေဝ်၊ ကၠေင် 95 မွဲလဳတာဂှ် နွံအကြာ ၃၀၀၀ ဒ္ကေဝ်၊ ကၠေင်ဒဳဇြေဝ်ပရဳမဳယာန် မွဲလဳတာဂှ် နွံအကြာ ၃၂၀၀ ဒ္ကေဝ် ၜိုန်ရပတိတ်စၟတ်လဝ်ကီုလေဝ် ဆေင်သွံကၠေင်ဗွဲမ ဂၠိုင်ဂှ် ထ္ၜးဟိုတ်ကဵု ကၠေင်ပိုတ်သ္ဂးတုဲ ဗပဵုပတိုန်လဝ်ၚုဟ် ဗီုညးကဵုညးအိုတ်ရောင် ဂွံတီကေတ်ရ။
