အခိၚ်ကြပ်ကၠုၚ်ကဵုပေါဲရုဲမာဲဏံ ပ္ဍဲပါၚ်လုပ်တိတ်ဍုၚ်ကီု၊ မ္ၚးဍုၚ်ဂမၠိုၚ်တအ်ကီု ဂကောံပံၚ်ကောံကမ္မယှေန်ပၞာန်တအ် ပတေၚ်လဝ် ပရေၚ်စၟဳစၟတ်ဂၠိုၚ်တိုန်မံၚ်ရောၚ် ဂကောံကမ္မတဳတ္ၚဲကောန်ဂကူမန်ဗဟဵု ဒၟံၚ်လတူဍုၚ်မတ်မလီုမွဲတၠ ဟီုထ္ၜးရ။
ပါၚ်လုပ်တိတ်ဍုၚ်တအ်ဂှ် နကဵုကွဳလိုန်ဓာတ်ကီု၊ နကဵုကွဳစက်ကီု စၟဳစၟတ်မံၚ် ကပေါတ်သက်သဳ စက်ယာန်ကီု၊ စၟဳစၟတ်မံၚ် ပူဂဵုကီုနွံရောၚ် သ္ဂးရ။
“လၟုဟ်တှ်ေ ကြပ်ကၠုၚ်ကဵု ပေါဲရုဲမာဲဟာ ကေတ်ဟွံဒး၊ ကွဳလိုန်ဓာတ်တှ်ေ သၟာန်လိုၚ်ဇြေန်၊ လိုၚ်ဇြေန်ဒဳ၊ လ္ပာ်မၞိဟ်တှ်ေ ဆဠမှာန်သီုကာတ်ကောန်ဍုၚ်၊ ကၠုၚ်အလဵု အာအလဵု သၟာန်စၟဳစၟတ်တိုန်သီုၜါ ဍေံတေၚ်တိုန်အရိုဟ်တဲ” သာ်ဝွံ ဂကောံကမ္မတဳတ္ၚဲကောန်ဂကူဂှ် ဟီုရ။
ဗွဲတၟေၚ်မ္ဂး လတူဍုၚ်မတ်မလီုဂှ် ဒၞာဲဂၠံၚ်ကရတ်၊ ဒၞာဲဂၠံၚ်ပန်သွာၚ် – ပိသွာၚ်ကီု၊ ဒၞာဲဂၠံၚ်ဆက်စၠောံကဵု လ္ဂုၚ်၊ ဘာအၚ်၊ ကျာ်မြဟ်တအ်လေဝ် ပတေၚ်လဝ်ပရေၚ်ဂီုကၠီုတုဲ ဂကောံပံၚ်ကောံဇဳတအ် မၚ်ရံၚ်စၟဳစၟတ်မံၚ် ရဲအာတရဴတအ် တေၚ်တိုန်မံၚ်ရ။
“လတူဍုၚ်မတ်မလီုတှေ် တေၚ်တိုန်ဂၠိုၚ် ဂၠံၚ်ပန်သွာၚ် ဇြေဂျဵု၊ ဂၠံၚ်တိတ်ကဵု ကျာ်မြဟ်၊ ဂၠံၚ်တိတ်ကဵု ဗြဝတဳ၊ ဂၠံၚ်အာလ္ဂုၚ်ဂှ် (၂၄) နာဍဳရ စၟဳစၟတ်မံၚ်၊ မၞိဟ်ကီု ကာကီု ကွဳလိုန်ဓာတ်ကီု စၟဳစၟတ်မံၚ်ပေၚ်ပေၚ်ရ၊ ဗတမ်ဒမၠုလေဝ် ကြတ်မၚ် စၟဳစၟတ်လေဝ်နွံ စၟဳစၟတ်ဒၞာဲဒတန်လေဝ်နွံ၊ လတူဂၠံၚ်ကီု သီုပ္ဍဲဒၞာဲတိက်ဇူ ဟိုဝ်တေဝ်ကီု ဂကောံမဆေၚ်စပ်တအ် အခိၚ်အခါဟွံရုဲ ဗက်စၟဳစၟတ်မံၚ်တေၚ်ကွေံကွေံ” သာ်ဝွံ ညးချဳဒရာၚ်စန်ဒက်မာဲ ကောန်ဗော်ညဳသၟဟ်မန် လတူဍုၚ်မတ်မလီုမွဲတၠဂှ် ထပ်ဟီုရ။
အခိၚ်ကြပ်ကဵုပေါဲရုဲမာဲ ပတေၚ်ပတိုန်လဝ်ပရေၚ်စၟဳစၟတ်လၟုဟ်ဂှ် ဂကောံစၟဳစၟတ် (ဂကောံပံၚ်ကောံ) တအ် ထ္ၜးဟိုတ်ဒုဟ်မွဲမွဲသာ်တုဲ တက်ဒါန်ဩန်ဟွံမွဲကဵု သၞောတ်ဗ္ၜတ်လေဝ်နွံ၊ မၞိဟ်အာယုက်ဍောတ်ဍောတ်လ္ၚဵုတအ်လေဝ် ဒးဒုၚ်ရပ် ဏာ နကဵုပၞုက်ကမၠေံလဝ်ပရိုၚ်လေဝ်နွံရောၚ် ဂွံတီကေတ်ရ။
