ပေါဲရုဲမာဲ (၂၀၂၅) သကုတ် (၁) တုဲကၠုၚ်ဏံဂှ် ဟိုတ်နူညးစၞးဗော်ညဳသၟဟ်မန် ဂွံဒုၚ်ရုဲစှ် အောန်လောန်အာဂှ်တုဲ ကောန်ဗော်ညဳသၟဟ်မန်တအ် ဓဝ်ပတှ်ေအောန်စှ်ေကၠုၚ် လတူပေါဲရုဲမာဲတုဲ ဂၠာဲမၞိဟ်စၞးမၚ်ရုၚ်မာဲ ဝါတ်ကၠုၚ်နွံရောၚ် ကောန်ဗော်တအ် ဟီုရ။
ပေါဲရုဲမာဲ (၂၀၂၅) သကုတ် (၂) သွက်ဂွံကၠောန်ဗဒှ် ပ္ဍဲဂျာန်နဝါရဳ(၁၁)ဏံဂှ် ညးစၞးအလံၚ်အမာတ် (၁) တၠမ္ဂး သွက်ဂွံမၚ်ရံၚ်ရုၚ်မာဲ (၂) တၠဂှ်တုဲ (၁) ရုၚ်မာဲမ္ဂး အောန်အိုတ်မၞိဟ်စၞး (၆) တၠ နူကဵုဗော်ညဳသၟဟ်မန်တအ် ဒးဂၠာဲစန်ဒက်မံၚ်မၞိဟ် သွက်ဂွံ မၚ်ရံၚ်ရုၚ်မာဲရ။
လတူသွဟ်ပေါဲရုဲမာဲ သကုတ် (၁) တိတ်ကၠုၚ်ဏံဂှ် ဟိုတ်နူညးစၞးဗော်ညဳသၟဟ်မန် ဂွံဒုၚ်ရုဲစှ် အောန်လောန်အာဂှ်တုဲ ဓဝ်ပတှေ်လတူပေါဲရုဲမာဲအောန်စှ်ေအာဂှ်ရ ဗက်ဂၠာဲမၞိဟ် မၚ်ရုၚ်မာဲဂှ် ဝါတ်ဂါတ်အာတၟာဂလိုၚ်ရောၚ် ကောန်ဗော်မွဲတၠဂှ် ဟီုရ။
“ပေါဲရုဲမာဲသကုတ် (၁) တုဲကၠုၚ်ဏံဂှ် ညးစၞးဗော်ညဳသၟဟ်မန် ဂွံဒုၚ်ရုဲစှ် အောန်လောန်အာ တၞဟ်ဟ်ဂှ် စွံလဝ်ကၠာရ ဗီုကဵုပွိုၚ်ဍုၚ်ကျာ်မြဟ်လေဝ် မွဲတၠလေဝ် ဟွံဂွံဟဂှ်၊ ရံၚ်အာပ္ဍဲခၟိုၚ်ပၠန်လေဝ် ဒၞာဲမန်ဇၞးမံၚ်တွဵု ပ္ဍဲကၠတ်ထဝ်တွဵုရးဂှ် ဇကုကျ၊ ဒၞာဲ ဟွံကေၚ်ဇၞးမွဲလှေ်ဏောၚ် ဇၞး၊ ဟီုအာတှ်ေ ဒၞာဲဍေံကဵုဇၞးမှ ဇၞး၊ ဒၞာဲဍေံဟွံကဵုဇၞးတှေ် ဟွံဇၞးမံၚ်ရရ မုဂွံတၟေၚ်” သာ်ဝွံ ကောန်ဗော်ညဳသၟဟ်မန်မွဲတၠ ဟီုရ။
ပေါဲရုဲမာဲ (၂၀၂၅) သွက်ဂွံကၠောန်သကုတ် (၂) ပ္ဍဲဂျာန်နဝါရဳ (၁၁) ဏံဂှ် သကုတ်လ္ပာ်လတူမတ်မလီုမ္ဂး ပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်ပံၚ်၊ သကုတ်သၟဝ်ဏံမ္ဂး ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်ရ။
လၟုဟ်မ္ဂး သွက်ဂွံမၚ်ရံၚ်ရုၚ်မာဲဂှ် နူကဵုဗော်ညဳသၟဟ်မန်တအ် ဒးပတိုန်စရၚ် ဒးပတိုန်ဝၚ်ပူဂဵု ကုကမ္မယှေန်တအ်ဂှ်တုဲ ဂွံဂၠာဲဗပေၚ်မၞိဟ်ဂှ် ဒေသလ္ၚဵု ဂၠာဲဟွံပေၚ်ရောၚ်ဂှ်လေဝ် ကောန်ဗော်ဂှ် ဆက်ဟီုထ္ၜးရ။
“အလံၚ်အမာတ် (၁) တၠတှေ် ဂွံအခေါၚ်မၞိဟ်မၚ်ရံၚ်ရုၚ်မာဲ (၂) တၠ အလံၚ်အမာတ် (၃) တၠတှေ် ဒးဂၠာဲမၞိဟ် (၆) တၠ ဇၟာပ်ရုၚ်မာဲရ ဗီုဏံ၊ ရုၚ်မာဲလ္ၚဵု ဂၠာဲမၞိဟ်ဂွံနွံ ရုၚ်မာဲဒေသလ္ၚဵု ဂၠာဲမၞိဟ်ဟွံဂွံ ဒးဗလးလဝ်အတိုၚ်ဂှ်လေဝ်နွံမံၚ် သ္ဇက်သ္ပဟွံမွဲရ” သာ်ဝွံ သ္ဂးရ။
ပ္ဍဲကဵု (၅) ပွိုၚ်ဍုၚ်ဂှ် သကုတ်ဒေသၜဳကလေၚ်ကဵု ဒေသရေဝ်ဂှ် ဒှ်ဒေသ ဂကောံပၠန်ဂတးဂမၠိုၚ်တအ် ချဳဒရာၚ်တုဲ က္တဵုဒှ်ဒၟံၚ် ပေါဲဗတိုက်လေဝ်နွံရ။
ကမ္မယှေန်ပၞာန်တအ်ဂှ် ထ္ၜးဟိုတ်ကဵု ပရေၚ်ဂီုကၠီုဟွံမွဲဂးတုဲ ဗီုကဵုဒေသပွိုၚ်ဍုၚ်ရေဝ် ညးစၞးဂကူမန် ဇၞးဂၠိုၚ်အိုတ်ဂှ် ၜိုတ်ဆလတူဍုၚ်ရေဝ်၊ လတူဍုၚ်ခေါဇာ၊ လတူဍုၚ်လၟိုၚ်ကဵု ကွာန်တ္ကအ်လ္ဂုတ် (၄) ဒၞာဲဂှ်ဟေၚ် ကၠောန်ကဵုပေါဲရုဲမာဲတုဲ အခေါၚ်အရာညးစၞး ဗော်ညဳသၟဟ်မန်တအ် ဂွံဒုၚ်ရုဲစှ်ဇၞးမာဲဂှ် နွံအောန်ဗွဲမလောန်ရောၚ်ဂှ်လေဝ် ညးဒေသတအ် ဟီုမံၚ်အိုတ်ရောၚ် ဂွံတီကေတ်ရ။
