အခိၚ်ၚုဟ်ထ္ၜိုတ်ပရေံဏံဂှ် တၠကၠအ်တၞံဇၞော်ဇၞော်တအ် မိက်ဂွံသွံထဗိုၚ်ဆုထ္ၜိုတ်ကီုလေဝ် မၞိဟ်ရာန်ဟွံမွဲတုဲ တၠကၠအ်တအ် ဆိုအ်ဗမံၚ်ဖိုဟ်ရောၚ် တၠကၠအ်ထ္ၜိုတ်မွဲတၠ ဟီုရ။
ကၠအ်ထ္ၜိုတ်တၞံအရိုၚ်တဵုလဝ်တြေံတအ်ဂှ် အခိၚ်ၚုဟ်ထ္ၜိုတ်ပရေံမံၚ်ဏံ တၠကၠအ်တအ်မိက်ဂွံကုတ်ထဗိုၚ်တုဲ သွက်ဂွံတဵုတၟိဂှ် ကော်သွံမံၚ်ဆုထ္ၜိုတ်ကီုလေဝ် မၞိဟ်ရာန်ဟွံမွဲတုဲ ခက်ခုဲဆိုအ်ဗမံၚ်ဖိုဟ်ရောၚ် တၠကၠအ်နူဍုၚ်ဇြပ်ဗုမွဲတၠ ဟီုရ။
“အခိၚ်ၚုဟ်ထ္ၜိုတ်ပရေံဏံဂှ် မိက်ဂွံကုတ်ထဗိုၚ်သွံတၞံရာဗာ (ထ္ၜိုတ်) လေဝ် ၚုဟ်ဆုရာဘာဂှ် ၚုဟ်ပရေံမံၚ်တုဲတှေ် မၞိဟ်ရာန်ဟွံမွဲ၊ မၞိဟ်ရာန်နွံဂှ်လေဝ် ၚုဟ်ဇကုသွံဂှ် ဍေံဟွံရာန်၊ ၚုဟ်ဍေံရာန်ဂှ် တၠကၠအ်တအ်သွံဟွံမာန် ၚုဟ်စှေ်အာကဝက်ဒှ်မံၚ်တှေ် သွံဟွံမာန် အရၚ်ဂွံတဵုဂတာပ်တမ်သၞာံဏံဂှ်တှေ် ဆိုအ်ဗမံၚ်ဖိုဟ်” သာ်ဝွံ နာဲထောန်ကျဳ တၠကၠအ်ထ္ၜိုတ်နူဇြပ်ဗု ဟီုရ။
ဆုထ္ၜိုတ်ဂှ် သၞာံတုဲကၠုၚ်တေံမ္ဂး ဗွိုက်ဇၞော်အိုတ် (၃၀) ၝောံတဲပြၚ်ဂှ် မွဲတာန်နွံ (၄) ကိုဋ်ပြၚ်တုဲ လၟုဟ်မ္ဂး မွဲတာန် အကြာ (၂) ကိုဋ်ပြၚ်ဓဝ်ဂှ်ရ တၠကၠအ်မိက်ဂွံထဗိုၚ်သွံတအ် သွံဟွံမာန်အိုတ်ရ။
“ဍာံဍာံတေံတှေ် ၚုဟ်ကပေါတ်ဖျာဂှ် လ္ပာ်စှေ်ဟွံမွဲမွဲလှေ်ပုဟ်၊ ထ္ၜိုတ်ကဵု ဆုရာဗာဂှ် ၚုဟ်ပရေံစှေ် နူသၞာံတုဲကၠုၚ်တေံဏီဂှ် ပရေံလောန်အာ၊ တော်ကဵုသၞာံတုဲကၠုၚ်တေံတှေ် ၚုဟ်ဂှ် ဒးတိုန်ရ၊ ဣဏံဂှ် ၚုဟ်လ္ပာ်စှေ်တှေ် တၠကၠအ်တအ် ကျာတ်ရ၊ ထဗိုၚ်တုဲ ဂွံကလေၚ်တဵုတၟိဂှ် ဒးရာန်မတအ် စရိတ်ဝါဲတအ် ဒးရာန်ၚုဟ်လၟုဟ်ဖအိုတ်ရတှေ် ဠ ဆုရာဗာဇကုဂှ် ၚုဟ်အောန်စှေ်၊ ဠဒးရာန်ကပေါတ်တဵုလၟုဟ်ဂှ် ၚုဟ်တိုန်အာၜါဆ ပိဆ ဗီုလဵုဣပ ဖန်ဝါတ်ပိက်မံၚ်” သာ်ဝွံ တၠကၠအ်ကော်သွံမံၚ် ဆုထ္ၜိုတ် နာဲသိၚ်မိုၚ် နူဇြပ်ဗုဂှ် ဟီုပၠန်ရ။
ပ္ဍဲဍုၚ်မန်ဝွံ ကၠအ်ထ္ၜိုတ်တၞံမအရိုၚ်တြေံတြေံ တဵုကၠုၚ်လဝ် လအ်ကဵုစှော်သၞာံတအ်ဂှ် ကုတ်ထဗိုၚ်တုဲ ကလေၚ်တဵုတၞံမဆက်မိတ်ဂၠိုၚ်ကၠုၚ်ဒၟံၚ် လၟေၚ်လၟေၚ်သၞာံရ။
တၞံထ္ၜိုတ်တၞံမအရိုၚ်တြေံတအ်ဂှ် သွက်ဂွံကလေၚ်တဵုတၞံ မဆက်မတ်တၟိတအ်ဂှ် ကၠအ်ထ္ၜိုတ်တၞံမအရိုၚ်ဂမၠိုၚ်တအ် ကော်သွံမံၚ်ဆုထ္ၜိုတ် သွက်ဂွံထဗိုၚ်ကီုလေဝ် ရဲရာန်ကုတ်ထဗိုၚ်တအ် ရာန်ၚုဟ်အောန်မံၚ်ဂှ်တုဲ တၠကၠအ်တအ် ခက်ဂၚ်မံၚ်ဗွဲမဂၠိုၚ်ရ။
“ကၠအ်တၞံအရိုၚ် ဘိုအ်ဂွံထဗိုၚ်သွံဂှ် နွံမံၚ်ကၠးကၠး၊ ကုတ်ထဗိုၚ်တုဲတှေ် ဂွံပလေဝ်စ အရၚ်ဂွံတဵုမဆက်မတ်တၟိဂှ်၊ ဆဂး ကော်သွံမံၚ်ဟွံတိတ် ၚုဟ်ကော်လဝ်ကဵု ၚုဟ်ရဲရာန်တအ်ကေတ်ဂှ် ခြာမံၚ်ကဝက်ကဝက် ဒှ်မံၚ်ဗီုဂှ်၊ ရံၚ်ကေတ် သၞာံဏံဂှ်တှေ် ရဲညးခက်ခုဲကွေံကွေံဂှ်မှ သွံကဵုရဲထဗိုၚ်တအ်၊ ရဲညးဟွံခက်ခုဲကွေံကွေံဂှ်တှေ် ဂွံဒှ်ကုတ်ထဗိုၚ်တုဲ ဂွံတဵုတၟိဂှ်တှေ် ခက်အာနွံဂၠိုၚ်” သာ်ဝွံ တၠကၠအ်ထ္ၜိုတ် နာဲပါ ပွိုၚ်ဍုၚ်မုဟ်ဍုၚ်ဂှ် ထပ်ဟီုပၠန်ရ။
ပ္ဍဲဍုၚ်မန်ဝွံ ကၠအ်ထ္ၜိုတ်နွံ (၅) ကိုဋ်ဨကပြၚ်တုဲ အပ္ဍဲဂှ်မ္ဂး ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ဇြပ်ဗုသၟးဂှ် (၅) လက်ဨကပြၚ်နွံရ။ တော်ကဵု အလုံမွဲကၟိန်ဍုၚ်မ္ဂး ကၠအ်ထ္ၜိုတ်ပ္ဍဲဍုၚ်မန် နွံ (၃၇.၆ %) လၟိဟ်ဂၠိုၚ်အိုတ်ရောၚ် ဂွံတီကေတ်ရ။
