တန်ဗ္တောန် Diploma in English သ္ဂောံဒှ်အရီုအဗၚ် ပရေၚ်ပညာအဆံၚ်သၠုၚ် သွက်သၟတ်မန်ဂမၠိုၚ်ဂှ်ဝွံ နူကဵုအန်လာၚ်မွဲတဆံၚ် သွက်ဂွံပံက်အာဂှ် ဇာနှိက်ကွးဘာမန်တက္ကသဵုဂမၠိုၚ်ပံၚ်ကောံ – ကၟိန်ဍုၚ်သေံ Mon University Students Network – Thailand, MUSN တံ စဳဇန်ဒၟံၚ်နွံရောၚ် ဂွံတီကေတ်ရ။
ပ္ဍဲဂိတုမာတ် စၟတ်တ္ၚဲ (၁၄) တုဲကၠုၚ်ဏံ နူဇာနှိက်ကွးဘာမန်တက္ကသဵုဂမၠိုၚ်ပံၚ်ကောံ – ကၟိန်ဍုၚ်သေံ Mon University Students Network – Thailand, MUSN ကဵု သၟတ်မန်ကတ်လ္ၚတ်ဒၟံၚ်ပညာ ပ္ဍဲတက္ကသဵုဍုၚ်သေံတံ ကၠောန်ဗဒှ် ပေဲါကောံဓရီုကၠောံသၞာံ ကေုာံ သဘၚ်ဒုၚ်တၠုၚ်ကွးဘာတၟိတုဲ သ္ဂုတ်သွာတ်ဏာလဝ် အစဳဇန်ပံက်တန်ဗ္တောန်ဂှ် ရောၚ် ဂွံတီကေတ်ရ။
“အပ္ဍဲသၞာံဏံ သွက်သၟတ်မန်တံ ဂွံပံက်ကဵု Diploma course ဂှ် စဳဇန်လဝ်နွံရ။ ပ္ဍဲကဵုပရေၚ်ဗ္တာန်ဏံဂှ် ရန်တၟံလဝ် 4 skill သက်သက် ဟွံသေၚ်ပုဟ်။ ပ္ဍဲအရာဒးပလေဝ်ပလေတ် သွက်ဂွံတိုန်တက္ကသဵုတံဂှ်တှ်ေ စဵုကဵုအဆံၚ် Diploma သွက်ဂွံဗ္တောန်ကဵုဂှ် စဳဇန်လဝ်ရ။ course ဏံဂှ်တှ်ေ ပံက်ကဵုအန်လာၚ်ရ။ လၟုဟ်ဏံ အခိၚ်လဵု တ္ၚဲလဵုပံက် ဗီုလဵုရောဂှ်တှ်ေ သဳကၠဳကဵု အ္စာ၊ အ္စာၝောံတံတုဲမှ အခိၚ်လဵု မုဗ္တောန်အာဂှ် ကဵုအာသမ္တီနူကဵု Page ဏောၚ်” သာ်ဝွံ ညးတာလျိုၚ် နူ MUSN မွဲတၠဂှ် ဟီုရ။
ဘာသာအေၚ်ကလိက်ဝွံ နူကဵုအဆံၚ်သဇိုၚ် စဵုကဵုအဆံၚ်စိုန်သကီုဂှ် ဗ္တောန်အာကဵုရောၚ်တုဲ အပ္ဍဲကၟိန်ဍုၚ်သေံ သွက်သ္ဂောံဂွံအခေါၚ် ဆေၚ်စပ်ကဵု ပရေၚ်ပညာအဆံၚ်သၠုၚ်ဂှ်လေဝ် ကဵုရီုဗၚ်ဆက်စၠောံအာရောၚ် ဂွံတီကေတ်ရ။
ကွးဘာမန် ပလေဝ်ပလေတ်ဒၟံၚ် သွက်ဂွံတိုန်ဘာတက္ကသဵု ပ္ဍဲကၟိန်ဍုၚ်သေံမွဲတၠဂှ် “ပံက်တန်ဗ္တောန် ဗီုလၟုဟ်ဏံဂှ်တှ်ေ သွက်ကွးဘာစဳဇန်လဝ် တိုန်တက္ကသဵု ဗီုအဲဏံ ဒှ်အထံက်အရီုရ။ မုဒှ်ရောဟီုတှ်ေ နူကဵုတန်ဗ္တောန်ဏံ သၠုၚ်ပ္တိုန်အစောန်စရာဲ ဍာ်ဒကေဝ် အေၚ်ကလိက်မာန်ရ။ တုဲတှ်ေ ပ္ဍဲတက္ကသဵုလဵုဂှ် မုတၚ်နွံပၟိက်နွံ တီကၠုၚ်တှ်ေ သွက်ပိုဲတံ သက်သာမွဲလ္ဂာံရ” သာ်ဝွံ ဟီုရ။
ပ္ဍဲကဵုပေဲါကောံဓရီု မကၠောန်ဗဒှ် ဂိတုမာတ် စၟတ်တ္ၚဲ (၁၄) ဏံဝွံ အစဳဇန်သၠာဲဂတးလညာတ် ဆေၚ်စပ်ကဵုပရေၚ်ပညာ နကဵုအန်လာၚ် အကြာကွးဘာ ကတ်လ္ၚတ်မံၚ်ပညာ ပ္ဍဲတက္ကသဵုနာနာ ကၟိန်ဍုၚ်သေံဏံ မွဲဂိတုမွဲဝါ သွက်ဂွံဆဵုဂဗသဳကၠဳမာန်ဂှ်လေဝ် စဳဇန်လဝ်နွံရောၚ် ဂွံတီကေတ်ရ။
ဆေၚ်စပ်ကဵု အစဳဇန်ဂှ်တုဲ “ပ္ဍဲကဵုအစဳဇန် သၠာဲဂတးလညာတ် ဆေၚ်စပ်ကဵု ပရေၚ်ပညာဏံဂှ်တှ်ေ ပရူပရာ ပရေၚ်ပညာကဵု ဂကူဂှ် သ္ပအဓိကတုဲ ကၠောန်အာဏောၚ်။ တုဲတှ်ေ တၠကမၠောန်ဇၞော်ဇၞော် ပ္ဍဲဂကူမန်တံလေဝ် ကော်ဘိက်တုဲ သွက်ဂွံသၠာဲဂတးအာ လညာတ်နွံရ” သာ်ဝွံ ညးတာလျိုၚ် နူ MUSN ဂှ် ဆက်ဟီုလဝ်ရ။
ဇာနှိက် MUSN ဏံဝွံ အကြာသၟတ်မန် မကတ်လ္ၚတ်မံၚ်ပညာ အပ္ဍဲကၟိန်ဍုၚ်သေံတံ ဇြဟတ်ဆက်စၠောံဂွံခိုဟ်ကီု၊ သွက်ဂွံဇၞော်သၠဲပ္တိုန် အခေါၚ်အရာ ပရေၚ်ပညာကီု ရန်တၟံတုဲ ဒက်ပ္တန်လဝ်ဇာနှိက်ဏံရ။
MUSN ဝွံ စဒက်ပ္တန်လဝ် ပ္ဍဲသၞာံ (၂၀၂၃) ဂှ်ကီုလေဝ် ဟိုတ်နူခက်ခုဲ ပရေၚ်ပါ်ပရအ်အခိၚ် ကေုာံ ကိစ္စပရေၚ်ပညာကွးဘာတံဂှ်ရ အစဳဇန်ပရေၚ်ချဳဓရာၚ်ဂကောံဂမၠိုၚ်ဂှ် ဒးဒေံါဇူလဝ် ဗွဲယာယဳတုဲ ပ္ဍဲသၞာံ (၂၀၂၅) တုဲကၠုၚ်ဏံ ကၠောန်သ္ပရေၚ်တၠုၚ် သၠုၚ်ပ္တိုန်လဝ်အသိၚ်ရောၚ် ဂွံတီကေတ်ရ။
