နူတနေံဏအ် ဂိတုမာတ် စၟတ်တ္ၚဲ (၁၀) အခိၚ်သဝ်တ္ၚဲ (၄) နာဍဳဂှ်ဝွံ ပ္ဍဲပယျဵုသေံ-ဗၟာ ခရိုၚ်တက်၊ ဒေသမာဲဆံက်ဂှ် ညးတာလျိုၚ်ဗၠာဲသၟိၚ်သေံတအ် လုပ်အာစိုပ်စၟဳစၟတ်တုဲ ရပ်စပ်သီဂွံ ညးကၠတ်သွံတြးကၠေၚ်စက် လ္ပာ်ကၟိန်ဍုၚ်ဗၟာနွံရောၚ် ပရိုၚ်သေံဂမၠိုၚ် ချူဓမံက်လဝ်ရ။
ပ္ဍဲဒေသမာဲဆံက် ဍုၚ်မဟာဝါန် ပ္ဍဲရုၚ်ခြိုၚ်စွံကၠေၚ်စက်ဂှ်ဝွံ ကၠေၚ်စက်ဗၞတ် (၃၀,၀၀၀) လဳတာပြၚ်နွံတုဲ နူညးဒေသတအ် ကၠုၚ်တေၚ်စိုပ်ဂှ်ရ ညးလျိုၚ်အုပ်ဓုပ်ပွိုၚ်ဍုၚ်မာဲဆံက်တအ် ပံၚ်တောဲ ကုဗၠာဲသၟိၚ်သေံတအ်တုဲ လုပ်အာစိုပ်စၟဳစၟတ် ရပ်စပ်သီဂွံလဝ်ရ။
ပ္ဍဲရုၚ်ခြိုၚ်စွံကၠေၚ်စက်ဂှ်ဝွံ ရပ်စပ်သီဂွံ တိုၚ်ကဳကၠေၚ်စက် ဗၞတ် (၄၆) မနွံတုဲ အပ္ဍဲကဵုဂှ်မ္ဂး ဒဳဇြေဝ်/ကၠေၚ်ပ္ဍေန် (၉၂၀၀) လဳတာ၊ ကၠေၚ်ဓါတ် (၂၆,၈၀၀) လဳတာ၊ အပံၚ်ဖအိုတ် ဗၞတ် (၃၀,၀၀၀) လဳတာပြၚ်ရ။
ကၠေၚ်စက်တဏံဖအိုတ်ဂှ်ဝွံ သွက်သ္ဂောံကၠတ်သွံတြးဏာ လ္ပာ်ကၟိန်ဍုၚ်ဗၟာတေံ ဗွဲဟွံလုပ်ကဵုသၞောဝ်တုဲ အတိုၚ်အလဵုအသဳသေံတအ် ဖျေံကၠုၚ်လဝ်သၞောဝ်ဂှ်ရ။
အကြာဏအ် ကိစ္စသၠုၚ်ပ္တိုန်ၚုဟ်ကၠေၚ်စက်ကီု ကိစ္စကၠတ်သွံတြးကၠေၚ်စက် ဇရေၚ်ဍုၚ်ဝုတ်ဒိုဟ် ဗွဲဟွံလုပ်သၞောဝ်ကီုဂှ် ဟွံကဵုလဝ်အခေါၚ်ရ။
စပ်ကဵုကိစ္စကၠတ်သွံတြးမံၚ်ကၠေၚ်စက် ဗွဲဟွံလုပ်ကဵုသၞောဝ်ဏအ်ဝွံ အတိုၚ်စၞောန်အလဵုအသဳသေံတအ်ဂှ်ရ ညးတာလျိုၚ်ဗၠာဲသၟိၚ်သေံတအ် ကဵုဒုဟ်ဒဏ် ရပ်စပ်ကေတ်အာ အရေဝ်ပေၚ်ပေၚ်ရောၚ်ဂှ် ဂွံတီကေတ်ရ။
ဂိတုမာတ် စၟတ်တ္ၚဲ (၉) တုဲကၠုၚ်ဏံဂှ်လေဝ် ပ္ဍဲသၚ်္ခဠၜုရဳ (ဝၚ်္က) ကောန်ဍုၚ်မန်ဗၟာ ဂေတ်သွံမံၚ်ဖျာကဵု ကွဳလိုန်ဓါတ်သၠာပိမွဲတၠဂှ် ဟိုတ်နူကၠတ်သွံမံၚ်ကၠေၚ်စက် နဂၠံၚ်ဟွံလုပ်သၞောဝ် လ္ပာ်ဍုၚ်ဗၟာတေံဂှ်ရ ဗၠာဲသၟိၚ်သေံတအ် ရပ်စပ်ကေတ်လဝ်အရေဝ်နွံကီုရ။
ဟိုတ်နူပဋိပက္ခပေါဲဗ္တိုက် အဳရာန်ကဵု အေဿရေ၊ အမေရိကာန်တအ်ဂှ်တုဲ ကိစ္စတၟာတ်ဒၞါတာလဝ် ပ္ၚံက်ၜဳဟဝ်မုဇ် ပလံၚ်ဗစိုပ်ကၠေၚ်စက်ဟွံဂွံဂှ်ရ ပ္ဍဲကၟိန်ဍုၚ်သေံဝွံ အကြာသတ္တဟဏံ သၞောတ်ဗ္ၜတ်ကၠုၚ် ပရေၚ်သွံရာန်တြးကၠေၚ်စက်ကီု သီုကဵုလလောၚ်ပ္တိတ်လဝ် သၞောတ်သၞောဝ်ရပ်စပ် ညးကၠတ်သွံတြးကၠေၚ်စက် တအ်ဂှ်ရောၚ် ဂွံတီကေတ်ရ။
အကြာမွဲၜါတ္ၚဲဏံဝွံ အလုံကၟိန်ဍုၚ်သေံ ညးလျိုၚ်အုပ်ဓုပ်ပွိုၚ်ဍုၚ်ဒေသပယျဵု၊ ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီုတအ် ပတေၚ်လဝ်ပရေၚ်စၟဳစၟတ် ကုညးကၠတ်ထပၠုပ်ပ္တိတ်ကၠေၚ်စက် သီုကဵုကပေါတ်ဟွံလုပ်သၞောဝ်တအ်တုဲ အကြာဂှ်မ္ဂး သၞောတ်ဗ္ၜတ်ကၠုၚ်လဝ် ပရေၚ်သွံရာန်တြးကၠေၚ်စက်ကီုရောၚ် ဂွံတီကေတ်ရ။
