သၞာံတုဲကၠုၚ်ဏံဝွံ ပ္ဍဲကဵုကမၠောန်ၜဵု တွဵုရးဍုၚ်မန်ဂှ် ဟိုတ်နူပြဿနာဝါတ်သၟာကမၠောန်ကဵု ဥတုရာသဳဟွံညိၚ်ဝတ်ဂှ်ရ ၜဵုတိတ်အောန်တုဲ ဒးကျဟောံဗြောံကီုလေဝ် ပ္ဍဲရာသဳၜဵုသၞာံဏံ သွက်ဂွံကၠောန်ပ္တိတ်ဂၠိုၚ်ဂၠိုၚ်မာန်ဂှ် ဂိုတ်ဂ္စာန်မံၚ်ရောၚ် တၠကမၠောန်ၜဵုတံ ဟီုရ။
ပ္ဍဲရာသဳၜဵုသၞာံဏံဝွံ သၟာကမၠောန်ရုံဂပ်မံၚ်တုဲ အကာဲအရာဥတုရာသဳ ညိၚ်ဝတ်မံၚ်ဂှ်ရ တၠကမၠောန်ၜဵုတံ သီဗၜေါဝ်ဂွံၜဵု စဵုကဵု (၆) ဝါနွံတုဲ တၠကမၠောန်ၜဵု နူဇြပ်ဗုကဵု ရေဝ် မွဲတၠမ္ဂး ကလိဂွံလျိုၚ်ၜဵု စဵုကဵု (၈) ဠက်ပဿာရ။
ဟိုတ်ဂှ်ရ ပရေၚ်ကျဟောံဗြောံသၞာံတုဲကၠုၚ်ဏံ က္လေၚ်လွဳလွတ် (ဗက်တံရိုဟ်) မာန်ရဂှ် ပတှေ်ကေတ်လဝ်ရောၚ် တၠကမၠောန်ၜဵု နူကွာန်ပလိုၚ်ကဳ၊ ပွိုၚ်ဍုၚ်ရေဝ်မွဲတၠဂှ် ဟီုရ။
“သၞာံဏံဂှ်တှေ် ဟွံဂွံဆဵုဂဗ ခက်ခုဲဇၞော်ဇၞော် ဗီုသၞာံတုဲကၠုၚ်တေံဏီပုဟ်။ သၟာကမၠောန်တံလေဝ် ရုံဂပ်မံၚ်ရ။ ဥတုရာသဳလေဝ် ပြေပြံၚ်မံၚ်ဂှ်ရ ပရေၚ်ကၠောန်ပ္တိတ်ၜဵု ညံၚ်ဂွံခိုဟ်ဂၠိုၚ်ကၠုၚ်ဂှ်ဟေၚ် ဂိုတ်ဂ္စာန်မံၚ်။ တၠပညာဗြဲကျာတံဂှ်တှေ် သၞာံဏံ ဗြဲဂူလဇုဲဏောၚ် ဂးရ။ ဟဂှ်တှေ် ၜိုတ် (၁၀) ဝါပြၚ်ပြၚ် သီဗၜေါဝ်မာန်ဏောၚ် စၟဳကေတ်လဝ်” သာ်ဝွံ ညးဟီုရ။
အခိၚ်လၟုဟ်ဝွံ ၜဵု (ဆားကြမ်း) မွဲပဿာဂှ် ကလိဂွံဒၟံၚ်ၚုဟ် (၅၀၀) ဒကေဝ်တုဲ ၚုဟ်မးပြေပြံၚ်ဒၟံၚ် ၜိုတ်ထေက်ကြိုက်ရဂှ်လေဝ် ညးဆက်ဟီုရ။
ပ္ဍဲရာသဳကၠောန်ၜဵုသၞာံတုဲကၠုၚ်ဏံဝွံ ဟိုတ်နူပရေၚ်ဆက်စၠောံဂၠံၚ်ဍာန် ဟွံဂီုကၠီုဂှ်ရ သၟာကမၠောန်ၜဵု နူရးဒေသဇၞော်လ္ဂုၚ်ကဵု ဨရာဝတဳတံ ကၠုၚ်စိုပ်ကၠောန်ကမၠောန်ၜဵု ပ္ဍဲတွဵုရးဍုၚ်မန်ဟွံမာန်တုဲ စပ္တံနူဂိတုအေဗရဴ ဗြဲဂူစှေ်ပၠန်ဂှ်ရ ဒးရုပ်သီထောံကမၠောန်ၜဵု ကၠာဟွံစိုပ်အခိၚ်ဏီဂှ်ရ။
ပ္ဍဲအရာကၠောန်ပ္တိတ်ၜဵုဂှ်လေဝ် လၟိဟ် (ပမာဏ) ရန်လဝ်ဂှ် ၜိုတ်ကဝက်ဟေၚ် ကၠောန်ပ္တိတ်မာန်တုဲ ဒးကျဟောံဗြောံအာ လၟိဟ်ကိုဋ်ကဵုလ္ၚီဒကေဝ်ရောၚ် တၠကမၠောန်ၜဵုတံ ဟီုရ။
“သၞာံတုဲကၠုၚ်ဏံ သၟာကမၠောန်ပိုဲလိၚ်လဝ်တံဂှ် ဟိုတ်နူအကာဲအရာဂီုကၠီုတုဲ ကၠုၚ်စိုပ်ဟွံမာန်ရ။ တုဲတှေ် စနူဂိတုအေဗရဴ (၁၁) တုဲ ဗြဲဂူစှေ်ဂှ်ရ အတးဟွံစိုပ်ပုဟ်ဂှ် ဒးရုပ်သီထောံကမၠောန်ၜဵုရ။ ဟိုတ်ဂှ်ရ ပ္ဍဲအဲ (၃၀) ဨကဂှ် ၜဵု ၜိုတ် (၁) ကိုဋ် (၈) ဠက်ပဿာဟေၚ် ပ္တိတ်မာန်ရ” သာ်ဝွံ တၠကမၠောန်ၜဵု နူဇြပ်ဗုမွဲတၠဂှ် ဟီုရ။
ပ္ဍဲသၞာံ (၂၀၂၅) လျိုၚ်ၜဵုဆောံလေၚ်ကျဗြောံအာ လၟိဟ်ကဵုဠက်ပဿာဂှ်ဝွံ ၜဵု (ဆားကြမ်း) မွဲပဿာမ္ဂး ကလိဂွံဒၟံၚ်ၚုဟ် စဵုကဵု (၁၀၀၀) ဒကေဝ်ကီုလေဝ် ပ္ဍဲကဵုတၠကမၠောန်ၜဵုတံ ၜဵုသှေ်သၟေဟ်ဟွံမွဲဂှ်ရ ဃံၚ်စအကြာကဵု သၟာဗၞိက်တံဟေၚ် ကလိဂွံဖဵုပရဲရ။
ပ္ဍဲရာသဳၜဵုမွဲကာလဂှ်ဝွံ နလၟေၚ်ဓမ္မတာမ္ဂး တၠကမၠောန်ၜဵု (၃၀) ဨကမွဲတၠဂှ် ကၠောန်ပ္တိတ်ၜဵု အကြာ (၃) ကိုဋ် (၈) ဠက်ပဿာမာန်ကီုလေဝ် သၞာံတုဲကၠုၚ်ဏံ ၜိုတ် (၅၀) တၟံကၠံဟေၚ် ကၠောန်ပ္တိတ်မာန်ရောၚ် ဂွံတီကေတ်ရ။
ကမၠောန်ၜဵုဝွံ သွက်ညးဒေသတွဵုရးဍုၚ်မန်ဂှ် ဒှ်ကမၠောန်ဂယိုၚ်လမျီုမွဲသာ်ကီုတုဲ ပ္ဍဲပွိုၚ်ဍုၚ်ဇြပ်ဗု၊ ရေဝ် ကေုာံ ပွိုၚ်ဍုၚ်ပံၚ်ဂှ် ဒှ်ဒေသၜဵုတိတ်ဂၠိုၚ်အိုတ်ရ။
