နူတနေံဏအ် အခိၚ်နူဂယး (၁၀) နာဍဳဂှ်ဝွံ ပ္ဍဲသၚ်္ခဠၜုရဳ (ဝၚ်္က) ကောန်ဍုၚ်ကြုက်ၜါတၠ လိၚ်ကော်ညးဒဳကွဳစက် ပ္ဍဲကဵုဒေသဂှ်မွဲတၠတုဲ ကၠတ်ပလံၚ်ထပၠုပ်ပ္တိတ်မံၚ်ဂဥုဲၜူမာဲနွံရောၚ် ဂွံဆဵုကေတ်ပရိုၚ်သေံဂမၠိုၚ်ရ။
ညးဒဳကွဳစက် ပ္ဍဲဒေသကမ္မရဳ၊ သၚ်္ခဠၜုရဳ နာဲပေတ်တဳနာန် အာယုက် (၆၉) သၞာံဝွံ နူကဵုထံၚ်ခၞောန်မွဲတဆံၚ် နကဵုၚုဟ်မး ဩန်သေံ (၃၀၀၀) ၝာတ်ဂှ် ကြုက်ၜါတၠ လိၚ်ကော်ကဵုပလံၚ်ဏာ ပ္ဍဲသၚ်္ခဠၜုရဳ (ဝၚ်္က) တုဲ ဗၠာဲသၟိၚ်သေံတအ် ရပ်ဂွံဏာလဝ်ညးတအ် ပ္ဍဲဆေၚ်ကၠေၚ် အရာပ်နံၚ်လု၊ နွံဗဒဲါဝၚ်္ကဂှ်ရ။
အပ္ဍဲကဵုမရပ်ဂွံလဝ် ကပေါတ်ဟွံလုပ်သၞောဝ်ဂမၠိုၚ်ဂှ်ဝွံ မပ္တံ ဂဥုဲၜူမာဲ၊ ဘိၚ်ဗု၊ ဂဥုဲမ၊ ဂဥုဲဍာ်၊ ဂဥုဲၜူမာဲဗီုပြၚ်နာနာသာ်ကဵု ဩန်ဒဝ်လာ (၁) လ္ၚီ တၟော်ဩန်သေံမ္ဂး ဗၞတ် (၃၂၀၀၀) ၝာတ်နွံတုဲ သီုကဵုဖုၚ်တအ်ကီု စၟဳစၟတ်ရပ်စပ်သီဂွံလဝ်ရ။
ကပေါတ်ဂဥုဲၜူမာဲတဏအ်ဂမၠိုၚ်ဂှ် ရန်လဝ် သွက်သ္ဂောံပလံၚ်ဏာ ဇရေၚ်ဒေသပယျဵုသေံ – ဗၟာ ဍုၚ်ကျာ်ပိတေံရောၚ် ဂွံတီကေတ်ရ။
ကောန်ဍုၚ်ကြုက်ၜါတၠဏအ်ဝွံ “နူကဵုဍုၚ်ကြုက်ဂှ် လုပ်စိုပ်အာကဵုက္ၜၚ်ကျာ ပ္ဍဲဍုၚ်ဂါမ္ဗဝ်ဒဳယျာတေံတုဲ နူကဵုဂှ်မွဲကဆံၚ် ကၠတ်လုပ်ကၠုၚ်ဍုၚ်သေံ အကြာဒဵု အကြာဂြိုပ် နဂၠံၚ်ဟွံလုပ်သၞောဝ်တုဲ စိုပ်ဇရေၚ်ဍုၚ်သေံ ကမ္မရဳ၊ ထံၚ်ခၞောန်ဂှ် လိၚ်ကော်ညးဒဳကွဳစက်သေံမွဲတၠတုဲ ကဵုပလံၚ်ဏာ ပ္ဍဲသၚ်္ခဠၜုရဳ (ဝၚ်္က)၊ ဇရေၚ်ဒေသပယျဵုသေံ-ဗၟာ ကျာ်ပိတေံရောၚ်” သာ်ဝွံ ကြုက်ၜါတၠဂှ် ဂးရ။
ညး (၃) တၠဏအ်ဝွံ နကဵုအမှုညးကၠတ်လုပ်ဍုၚ်ကီု အမှုညးကၠတ်ထပၠုပ်ကပေါတ် ဟွံလုပ်သၞောဝ်ကီုဂှ်ရ ဗၠာဲသၟိၚ်သေံ မၞုံဒေသသၚ်္ခဠၜုရဳ (ဝၚ်္က) တအ် ရပ်ထိၚ်လဝ် ပ္ဍဲကဵုရုၚ်ဗၠာဲသၟိၚ်တုဲ စၟဳစၟတ်ကေတ်မံၚ်အရေဝ်ရ။
ပ္ဍဲပယျဵုသေံ-ဗၟာ လ္ပါ်ဒေသကျာ်ပိ၊ သၚ်္ခဠၜုရဳ ၊ ကမ္မရဳဏအ် ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီု ဒေသပယျဵုတအ် ဟိုတ်မပတၚ်လဝ်ပရေၚ်ဂီုကၠီုဂှ်ရ အကြာမွဲၜါတ္ၚဲဏံ ရပ်ဂွံကောန်ဍုၚ်ကြုက် ကၠတ်လုပ်ဍုၚ်သေံတအ် အဆက်က်နွံတုဲ ညးကၠတ်လုပ်ဍုၚ်သေံကီု ညးထပၠုပ်ပ္တိတ်ကပေါတ်ဟွံလုပ်ကဵုသၞောဝ်တအ်ကီုဂှ် စၟဳစၟတ်ရပ်ဂွံမံၚ် မွဲနှေံမွဲနှေံနွံရောၚ် ဂွံတီကေတ်ရ။
