ပ္ဍဲကွာန်စောဝ်ဇဗၠု ပွိုင်ဍုင်ကျာ်ပိဂှ် ကောန်ကွာန်မၞုံလွဟ်မွဲတၠကဵု ကောန်ပၞာန် နူက္ဍိုပ် သ္ကိုပ်ဗိုလ်မံင်ဖျူ ဂကောံရပ်လွဟ် DKBA တအ်ၜါလ္ပာ် ဒှ်ပန်ပှော်ညးသ္ကအ် ဒၞါဲသ္ရိကမ္မဌာန်မွဲတုဲ ညးမဒှ်ကောန်ကွာန်ဂှ် ဒးချိုတ်အာရောင် ညးဒေသတအ် ကဵုနင်ပရိုင်ရ။
ပရူပရာဏအ်ဂှ် က္တဵုဒှ်ကၠုင်လဝ် ပ္ဍဲဂိတုမာတ် စၟတ်တ္ရဲ (၃)၊ အခိင်ဗ္တံ (၇) နာဍဳပြင်တုဲ ညးမချိုတ်အာဂှ် ဒှ်ကောန်ကွာန်စောဝ်ဇဗၠု မၞုံယၟုနာဲမန်ဆာန် အာယုက် (၅၅) သၞာံရောင် ဂွံတီကေတ်ရ။
ပ္ဍဲကဵုအခိင်ဗ္တံဂှ်ဝွံ ဂိတုဂြးစပ်ဒၟံင်ဂးတုဲ ညးမၞုံကဵုလွဟ်ဇမၠေံ နာဲမန်ဆာန် ပန်ပစူလွဟ် (၄) တဲဂှ်ရ ညးမဒှ် ဥက္ကဌကွာန်စောဝ်ဇဗၠု နာဲရေင် အာစိုပ်တေင်ကဵု ဂကောံရပ်လွဟ် DKBA က္ဍိုပ် သ္ကိုပ်ဗိုလ်မံင်ဖျူတအ်ရ။
“လဝါဲဂှ်ရဏောင်၊ ကောန်ပၞာန်ကရေင် ၄ တၠ စိုပ်ကၠုင်ကဵုကွဳစက်ရ၊ အခိင်ဂှ်ဂှ် နာဲမန်ဆာန် နွံဒၟံင်လ္တူသ္ရိကမ္မဌာန်၊ ဥက္ကဌကွာန်ဂှ်ရ တိုန်တုဲ ကော်ဖျေံနင်၊ တုဲတှ်ေ တက်ကျာဂွံမွဲစုတ် ဂ္စာန်ရပ်ကၠေင်ညးတေံဂှ်ရ ညးတေံ တံင်ပ္တိတ်လွဟ်နူဂၞိင်တုဲ ပန်ဏာကၠာ၊ ကောန်ပၞာန်ကရေင်တံ က္လေင်ပန်ဏာညးဂှ် ဒးအာပ္ဍဲဇုတ်သ္ကဲကဵု ပ္ဍဲက္ဍိုပ်တုဲ ချိုတ်အာဒၞါဲဂှ်ရ” သာ်ဝွံ ညးဆဵုနမတ်မွဲတၠ ဟီုရ။
ပ္ဍဲကဵုပရေင်ပန်ပှော်ဂှ်ဝွံ လ္ပာ်ကောန်ပၞာန် DKBA ဒးအာပ္ဍဲဒဳမွဲတၠ၊ ပ္ဍဲဇိုင်မွဲတၠတုဲ ကောန်ကွာန်စောဝ်ဇဗၠု မၞုံယၟုနာဲထူဂှ်လေဝ် ဒးအာလဝ်ဘဲလွဟ် ပ္ဍဲတဲနွံကီုရောင် ညးဆက်ဟီုရ။
ညးမ္ဒးလဝ်ဘဲဝပ် ကောန်ပၞာန် DKBA (၂) တၠကဵု ကောန်ကွာန် (၁) တၠတံဂှ် ဓရိပ်ပလံင်ဏာလဝ် ဇရေင်ရုၚ်ဂဥုဲဇၞော် ကွာန်ကြုင်ၜဝ်ရောင် ဂးရ။
ညးမချိုတ်အာ နာဲမန်ဆာန်ဂှ်ဝွံ ဒှ်ညးမဒေါံဇူလဝ် နူကောန်ဒပ်အရန် ဗော်ဍုင်မန်တၟိ ပွိုင်ဍုင်ကျာ်ပိမွဲတၠသၟးဟွံက သီုကဵုကေင်ကေတ်ကၠုင်လဝ်တာလျိုင် နဒဒှ်ညးအုပ်ကာ ကွာန်စောဝ်ဇဗၠုနွံကၠုင်တုဲ အခိင်ညးဒးချိုတ်အာဏအ်ဂှ် ဒှ်မံင်ကောန်ကွာန်ဓမ္မတာမွဲရောင် ဂွံတီကေတ်ရ။
“ပါဲနူဂကောံရပ်လွဟ်တအ်တုဲတှ်ေ ကောန်ကွာန်တအ်ဂှ် အခေါင်ရပ်လွဟ်ဟွံမွဲဟီုဂွံကၠာလေဝ် ပ္ဍဲဒေသကျာ်ပိဏအ်ဂှ် လှုဲနွံတှ်ေ ရာန်လွဟ် ရပ်လွဟ်ဂွံ စိုပ်မံင်အဓိပ္ပါယ်ဂှ်ရ” သာ်ဝွံ ညးဒေသမွဲတၠဂှ် ဟီုရ။
ပ္ဍဲဒေသကျာ်ပိဂှ် ဂကောံရပ်လွဟ်ဂမၠိုင် မပ္တံကဵု ဗော်ဍုင်မန်တၟိ၊ ကေအေန်ယူ၊ ဒဳကေဗဳအေ၊ ဗဳဂျဳအေပ်၊ ဒပ်ပၞာန်ဗၟာတအ် ချဳဒရာင်နွံမံင်ရောင် ဂွံတီကေတ်ရ။
