ကျာ်ဇၞော်အာစာပါလိတ မဟာထေရ် ဟီုမြော်ဗတိုက်ဖအောဝ်ဏာ ပ္ဍဲတ္ၚဲကောန်ဂကူမန် ၆၄ ဝါ ဗော်ဍုၚ်မန်တၟိ

မိလျးထဝ်၊ အာကာ-ဒှ်ဍိက်ဂကူဗၟာဂှ် တုပ်တဴညံၚ်ရဴ ဒးမံၚ်နရက်ဂျိုၚ်ဂျိုၚ်တုဲ လေဲပရေခတှ် ဂကူအိုတ်ညိဂှ် ကျာ်ဇၞော်အာစာပါလိတ မဟာထေရ် ဟီုမြော်ဗတိုက်ဖအောဝ်ဏာ ပ္ဍဲတ္ၚဲကောန်ဂကူမန် ၆၄ ဝါ ဗော်ဍုၚ်မန်တၟိ မကၠောန်ဗဒှ် ပ္ဍဲကွာန်ပၞၚ်ဗိုန် ဒၞာဲတိဍာ်သြဇာဗော်တဴရ။

“ယဝ်ခါရ ဒှ်ဍိက်ပၠက် ဂကူမန်ဂှ် ဒုၚ်ဂွံမံၚ်ညိဏီ၊ ဒှ်ဍိက်ပၠက် ဂကူဗၟာတှေ် တုပ်တဴညံၚ်ရဴ ဒးနရက်ကီုဏောၚ်၊ ဂိလ္တူဂိရ၊ ဟိုတ်ဂှ်ရ ညံၚ်ဂွံဗၠး နူဘဝဍိက်ပၠက်ဂှ်တှေ် ဂစာန်လေဲပရေခတှ် ဂကူအိုတ်ညိ” သာ်ဝွံ ညးမဒှ်သဘာပတိ ကျာ်ဇၞော်အာစာ ဗတိုက်ဖအောဝ်ဏာ ကောန်ဂကူမန် မတိုန်စိုပ် သဘၚ်ကၞာအိုတ်ရ။

ပရေၚ်ဂကူ၊ ပရေၚ်သာသနာ၊ ပရေၚ်ပညာ၊ ပရေၚ်ဍုၚ်ကွာန် ကေုာံ ပရေၚ်ပၞာန် အပ္ဍဲဂကူမန် ၅ သာ်ဂှ် ယဝ်ကၠောန်တဴမ္ဂး တုပ်တဴညံၚ်ရဴ လေဲပရေခတှ် ကောန်ဂကူတုဲ ယဝ်ဟွံကၠောန်တဴမ္ဂး ဒှ်ဍိက်ပၠက်ရောၚ် ကျာ်ဇၞော်အာစာ မမိက်သ္ဂးရ။

သၟိၚ်ဗၟာအံၚ်ဇေယျဂှ် ဓဇန်ဂစိုတ်ကၠုၚ် ကောန်ဂကူမန်၊ ခမဳသၚ် ကေုာံ ကောန်ၚာ်အပ္ဍဲခရေၚ်တံဂှ်လေဝ် ကောန်ဂကူမန်တံ သွက်သ္ဂောံကလေၚ်ဂွံသတိဂှ် ကျာ်ဇၞော်အာစာ ဟီုမြော်ဏာ လတူစၚ်သဘၚ်ကၞာကီုရ။

ပ္ဍဲတ္ၚဲကောန်ဂကူမန်ဂှ်ဝွံ နူတမ်ဒပ် ၅၊ တမ်ဒပ် ၂၊ တမ်ဒပ် ၉ ကေုာံ ဒပ်သ္ဂံၚ်ဗြဴ ဇြဟတ်ပၞာန် ၁၃၅ တၠ ပၠဒပ်တုဲ ညးဍုၚ်ကွာန် နူဒေသနာနာ ၜိုတ် ၃၀၀၀ တၠပြၚ် တိုန်စိုပ်ရ။ နူဍုၚ်သေံ ဂကူမန်၊ ဂကူသေံတံကီု၊ ဌာန်ပရိုၚ်သေံ Channel 3 ကီု နကဵုကွဳစက်ကာ ၄၆ ဖဍိုက် တိုန်စိုပ်အိုတ်ရ။

ကြဴနူ သၞာံ ၁၉၉၅ ဒေံါပန်ပှော်ကဵု အလဵုအသဳပၞာန်တုဲဂှ် ဗော်ဍုၚ်မန်တၟိ ကၠောန်ဗဒှ်ကၠုၚ် တ္ၚဲကောန်ဂကူ ပ္ဍဲခရိုၚ်ထဝဲါ၊ ခရိုၚ်သဓီု၊ ဒေသပွဳပွူဗဟဵု တိဍာ်ပယျဵုကီုလေဝ် သၞာံဏံဂှ် ဟိုတ်နူဒေံါပန်ပှော် လီုကၠုၚ်တုဲ ဗော်ဍုၚ်မန်တၟိ ပြံၚ်ဆုဲကၠောန်ကၠုၚ် ပ္ဍဲတိဍာ်ဗၠးၜးရ။

ညးဍုၚ်ကွာန်တံ ဇက်ကၠောဲတိုန်စိုပ် သ္ဘၚ်တ္ၚဲကောန်ဂကူမန် မရနုက်ကဵု ၆၄ ဝါ ဗော်ဍုၚ်မန်တၟိ

ရန်ကဵု သောၚ်ကလး ပရေၚ်ဍုၚ်ကွာန်တုဲ ဒေံါကၠုၚ်ပန်ပှော်ရောၚ်။ ၜိုန်ဂှ်လေဝ် အခေါၚ်သှ်ကလး ပရေၚ်ဍုၚ်ကွာန် ဟွံမွဲကၠုၚ်သၟးဟွံက အလဵုအသဳပၞာန်တံ ကရေပ်ဓရတ်ကၠုၚ် သွက်ဂွံသၠာဲဗီုပြၚ်ဒပ် နဒပ်မၚ်ပယျဵု (ဝါ) ဒပ်စဵုဒၞာကွာန်တုဲ ကၞောတ်တဲ ထပ်ကရေပ်ဓရတ်ကၠုၚ် သွက်ဂွံအပ်လွဟ်ပၠန်ရောၚ်။ လတူအလဵုအသဳပၞာန် အာတ်မိက်ကရေပ်ဓရတ်ကၠုၚ်ဂှ် ဟွံဒုၚ်တဲတုဲ သွက်ဂကူသ္ဂောံဗၠးၜးမာန် ဆက်ဇက်တိုန်အာရောၚ်ဂှ် ဗော်ဍုၚ်မန်တၟိ ဟီုဓမံက်လဝ် ပ္ဍဲလိက်လလောၚ်တြး တ္ၚဲကောန်ဂကူမန်ရ။

သွက်သ္ဂောံပံၚ်ကောံစဵုဒၞာအာ ဇြဟတ်ဓရိုဟ် ပရေၚ်ပၞာန်၊ ပရေၚ်ဍုၚ်ကွာန် အလဵုအသဳပၞာန်ဂှ် ကိုပ်ကၠာနူ ဟွံစိုပ်တ္ၚဲကောန်ဂကူမန်က္ဍၚ် ပ္ဍဲဂိတုဖေဖဝ်ဝါရဳ ၁၆ (မာ် ၁၃ မံက်) ဏံ ဂကောံရပ်လွဟ် ကောန်ဍုၚ်အရၚ် ၁၂ ဂကောံတံ ပံၚ်တောဲတုဲ ဒက်ပတန်ကၠုၚ် “ကံၚ်ဇြဳဖေတ်ဒရာ ဂကူကောန်ဍုၚ်အရၚ် မညဳသၟဟ်” မွဲရ။ အပ္ဍဲဂှ် ဗော်ဍုၚ်မန်တၟိ ပါလုပ်တုဲ နာဲဟံသာ မဒှ်ညးအုပ်ကာနာနာ ဗော်ဍုၚ်မန်တၟိဂှ် ဒှ်ညးအုပ်ကာနာနာ ပ္ဍဲကံၚ်ဇြဳဂှ်ရ။

လၟုဟ် ဗော်ဍုၚ်မန်တၟိ ပလေဝ်ပလေတ်လဝ် သွက်သ္ဂောံဝေၚ်ပၞာန်ဒလုက်တုဲ ကဵုလဝ်ဘာ ကုကောန်သ္ဂံၚ်တံ နဲကဲဝေၚ်ပၞာန်၊ နဲကဲစကာလွဟ်ဇၞော်နာနာရ။ ယဝ်ရပၞာန်ဗၟာတံ လုပ်ကၠုၚ် အပ္ဍဲတိဍာ်ဗော်ဍုၚ်မန်တၟိမ္ဂး သွက်သ္ဂောံပန်ဂှ်လေဝ် က္ဍိုပ်သကိုပ်ဗော်တံ ကဵုလဝ်စၞောန်ကဵု ကောန်သ္ဂံၚ်တံရ။

သ္ပအစာံကဵု သမလ၊ ဝိမလ ကောဒေံညးၜါ ပတန်ကၠုၚ်ဍုၚ်ဟံသာဝတဳ ပ္ဍဲသက္ကရာဇ်သာသနာ ၁၁၁၆ မာ်မွဲစွေက်တေံတုဲ နူသက္ကရာဇ်ဍုၚ် ၁၃၀၉ တေံဂှ် စကၠောန်ကၠုၚ် တ္ၚဲကောန်ဂကူမန်ရ။[zanmantou type=”audio” file=”http://mon.monnews.org/wp-content/uploads/2011/02/ajar-Palita.mp3″ title=”ကျာ်ဇၞော်အစာတၠ ပါလိတ”]