ဌာန်ပရိုၚ်ဗၠးၜးမန်-တ္ၚဲကောန်ဂကူမန် ဍုၚ်သေၚ်ကပေါဝ်ဂှ် မကၠောန်ဗဒှ်ကၠုၚ်မံၚ် ပ္ဍဲဘာလကျာ်ဗၟာ နူသၞာံ ၂၀၀၆ တေံကီုလေဝ် ဟိုတ်နူအခေါၚ်ဟီုဂး ထ္ၜးပျးယေန်သၞာၚ် ဟွံသၠးပွးတုဲ ပ္ဍဲမရနုက်ကဵု ၆၄ ဝါ သၞာံဏံဂှ် ပြံၚ်ဆုဲကၠောန်ဗဒှ် လပါ် ဇရေၚ် Informatics Campus တေံရ။
“ကၠောန်ကၠုၚ်မံၚ် ဇရေၚ်ဘာလကျာ်ဂှ် ဟိုတ်နူကဵု အခေါၚ်ထ္ၜးပျး အာဲကၟာဲယေန်သၞာၚ်မန်ဇကု ဟွံမွဲဂှ်လေဝ်ကီု၊ အခေါၚ်ဟီုဂး အောန်မံၚ်လေဝ်ကီုတုဲ ပိုဲဒးဆုဲပြံၚ်တိတ် ဒၞာဲဗၠးၜးဏံ” သာ်ဝွံ ညးတာလျိုၚ် ကၠောန်ဗဒှ် သဘၚ်ကၞာမွဲတၠ ဟီုရ။
ပ္ဍဲဂိတုဖေဖဝ်ဝါရဳ ၁၉ သၞာံဂှ် ဒှ်တ္ၚဲကောန်ဂကူမန် မရနုက်ကဵု ၆၄ ဝါကီုလေဝ် ဟိုတ်နူအကာဲအရာ သၟာကမၠောန် ဍုၚ်သေၚ်ကပေါတ်တံတုဲ ပ္ဍဲတ္ၚဲ ၂၀ ဂှ်မှ ကၠောန်ဗဒှ် သဘၚ်တ္ၚဲကောန်ဂကူမာန်ရ။ ပုရိသာတ် လၟိဟ် ရ၀၀ တၠ တိုန်စိုပ်အိုတ်ရောၚ် ညးမတိုန်စိုပ်သဘၚ်ကၞာမွဲတၠ ဟီုရ။
အခိၚ်နူဂယး ၜိုတ် ၁၀ နာဍဳပြၚ်ဂှ် စအသေအဟာန်တုဲ ကၠောန်ဗဒှ် အတိုၚ်အသေအဟာန် မကၠောန်ဗဒှ် အပ္ဍဲဍုၚ်မန်တေံကီုရ။ ရှေ်သှေ်အလာံၜိုပ်ထဝ်၊ နာယက နာဲထဝ်ရတ်မန် ဗှ်လိက်သဝဏ် တ္ၚဲကောန်ဂကူမန် ဗဟဵု (ဍုၚ်ဇြပ်ဗု) တုဲ ဖါပ်သၚ်ကဵုဒါန် ကုခမဳသၚ်တံရ။
အခိၚ်ဒေါဝ်တ္ၚဲ ၁၂ နာဍဳဂှ် လှေ်ထ္ၜးပျး ကွိၚ်ကွိုက်အခိုက်ကၞာမန်တုဲ လက္ကရဴအိုတ်ဂှ် ဖံက်ကဵုမာဲ လာဘ် ၃၇ လာဘ် ကုညးမတိုန်စိုပ် အသေအဟာန်ရ။ အခိၚ်တ္ၚဲစေၚ် ၂ နာဍဳဂှ် အစဳအဇန် တ္ၚဲကောန်ဂကူမန် တုဲဒှ်အာရ။
“သၞာံဏံ တ္ၚဲဏံ ဂွံဆဵုကေတ်ဗီုဏံဂှ် ပ္ဍဲစိုတ်အဲ မိပ်သၠောၚ်ကွေံကွေံ၊ ယးသၞာံတှေ် ညံၚ်ဂွံကၠောန်အာ ခိုဟ်နူဏံဂှ် ကမ္မတဳ ကၠောန်ဗဒှ် တ္ၚဲကောန်ဂကူကီု ပုရိသာတ် တိုန်စိုပ်တ္ၚဲကောန်ဂကူကီု ကေတ်လဝ် တၚ်တုပ်စိုတ်တုဲ ဖျေံလဝ်သ္ဂုတ်သွာတ်တုဲယျ” သာ်ဝွံ နာဲအံၚ်မန် ညးမပါလုပ် ပ္ဍဲအရာစဒက်ပတန်ကၠုၚ်လဝ် ဂကောံကၠောန်ဗဒှ် တ္ၚဲကောန်ဂကူမန် ဍုၚ်သေၚ်ကာပေါဝ်ဂှ် ဟီုရ။