ထ္ပက်စၟတ်တဲလိက်ကသုက် တုပ်စိုတ်ဒိုအ်ပန်ပှော် အလုံဍုၚ် NCA တုဲကီုလေဝ် အကြာ ဂကောံရပ်လွဟ် ကောန်ဍုၚ်အရၚ် EAO လ္ၚဵု ကဵု ဒပ်ပၞာန်ဂှ် ဂွံမိၚ်ဒၟံၚ်ဗရုလွဟ်ဖိုဟ်ဏီရောၚ် သာ်ဝွံ ပ္ဍဲပေါဲသဳကၠဳပရေၚ်ဍုၚ်ကွာန် ကောန်ဂကူမန် မကၠောန်သ္ပဒၟံၚ် ပ္ဍဲဍုၚ်ရေဝ် တ္ၚဲဏံဂှ် ဥက္ကဌဗော်ဍုၚ်မန်တၟိ နာဲထဝ်မန် ဟီုမြော်ဏာ ပ္ဍဲဂလာန်ပံက်အသေအဟာန်ရ။

“အကြာ ဂကောံရပ်လွဟ် ကောန်ဍုၚ်အရၚ် ထ္ပက်စၟတ်တဲတုဲ လ္ၚဵုလ္ၚဵု ကဵု ဒပ်ပၞာန်ဂှ် ဒးမိၚ်ဒၟံၚ်ဗရုလွဟ်ဏီဖိုဟ်၊ ဟွံပြေပြံၚ်တှေ် ဒးဆက်သဳကၠဳ ဒးဆက်ဂၠာဲသွဟ်ဏောၚ်၊ အလုံမွဲဍုၚ် ပရေၚ်ၜိုဟ်လလမ် ညံၚ်အဓာန်ဂွံဂၠိၚ်သ္ၚောဲဂှ် မွဲလ္ပာ်ကဵုမွဲလ္ပာ် သဳကၠဳတုဲ ဒးပ္တန်အာဓဝ်ပတှေ်ညးသ္ကံဏောၚ်၊ ပ္ဍဲအရာဒက်ပ္တန် ပရေၚ်ၜိုဟ်လလမ်ဂှ် စွံဓဝ်ပတှေ်ညးသ္ကံတုဲ ပရေၚ်ၜိုဟ်လလမ် ဂွံနွံအဓာန်လအ်အ်ဂှ် ဒးဆက်ဂၠာဲသွဟ်ဏောၚ်”သာ်ဝွံ ဥက္ကဌ နာဲထဝ်မန် ဟီုဏာ နဘာသာမန်ရ။

ဥက္ကဌ ဗော်ဍုၚ်မန်တၟိ နာဲထဝ်မန် (MNA)

နကဵုတရဴဂၠံၚ် NCA ဏံ ဒက်ပ္တန်ဖေဝ်ဒရေဝ်ဇေတ်တ် ကဵု ဒဳမဝ်ကရေဇြဳ မာန်မ္ဂး ဍုၚ်ဗၟာဏံ ဒှ်ဍုၚ်ဇၞော်မောဝ် ဖေါအ်ဗြေဝ်မွဲမာန်ဏောၚ် ညးဆက်ဟီုဏာရ။

သာ်ဂှ်ကီု သ္ကိုပ်ဝန်ဇၞော် တွဵုရးမန် ဒံက်တာအေဇြာန် လေဝ် “ဗော်ဍုၚ်မန်တၟိ ထ္ပက်စၟတ်တဲ NCA မာန်ဂှ် ဒှ်တမ် လၟေၚ်ဒဒှ်ပရေၚ်ၜိုဟ်လလမ်၊ ဒှ်တမ် ပေါဲသဳကၠဳပရေၚ်ဍုၚ်ကွာန်၊ ဒှ်တမ် ဖအောန်ဖျေံပဋိပက္ခလွဟ်၊ နူကဵုဆဵုဂဗသဳကၠဳမွဲတဆံၚ် ဒးပ္ညဳပ္ညပ်ဂၠာဲအာသွဟ် ပြသၞာပရေၚ်ဍုၚ်ကွာန်ဏောၚ်ဒှ်တုဲ သီုဒှ်တမ် လၟေၚ်ဒဒှ်ပရေၚ်ဍုၚ်ကွာန်ကီုရ” သာ်ဝွံ ဟီုဏာ ပ္ဍဲဂလာန်ပံက်ပေါဲသဳကၠဳပရေၚ်ဍုၚ်ကွာန် ကောန်ဂကူမန်ဂှ်ကီုရ။

တၚ်နၚ် သွက်ဂွံဒက်ပ္တန်သၞောတ်ကၟိန်ဍုၚ်ဒဳမဝ်ကရေဇြဳဖေဝ်ဒရေဝ်ကီု၊ သွက်ဂွံချူမူပၞောန် ပေါဲသဳကၠဳပရေၚ်ဍုၚ်ကွာန်ကီု၊ သ္ဂောံဖျေံရိုဟ်ကၞက်ဖေဝ်ဒရေဝ် သွက်ကၟိန်ဍုၚ်ကီုဂှ် နူပေါဲသဳကၠဳပရေၚ်ဍုၚ်ကွာန်လၟုဟ်ဏံ က္လိဂွံမာန်ဏောၚ် စၟဳတဴ သာ်ဝွံ ညးဆက်ဟီုရ။

ပ္ဍဲပယျာံဖါနူဂယးဂှ် ပံက်အသေအဟာန်တုဲ သွက်က္ဍိုပ်လိက် ကဏ္ဍဇၞော် (၄ ) ပရေၚ်ဍုၚ်ကွာန်၊ ပရေၚ်ပိုန်ဂြပ်၊ ပရေၚ်မၞိဟ်၊ ပရေၚ်တိဍာ်ကေုာံသယံဇာတ တံဂှ် ညးစၞးတိုန်စိုပ်တံ နအလိုက်ကဏ္ဍညးကဵုညး ပါ် ၄ က္ဍိုပ်တုဲ ဆက်သဳကၠဳအာ ပွိုၚ် ၃ တ္ၚဲရောၚ် ဂွံတီကေတ် နူအစဳဇန် အသေအဟာန်ရ။

ပေါဲသဳကၠဳပရေၚ်ဍုၚ်ကွာန် ကောန်ဂကူမန်ဝွံ တ္ၚဲဏံ ဖါနူဂယး စနူအခိၚ် ၉ နာဍဳ ကၠောန်သ္ပကၠုၚ် ပ္ဍဲရုၚ်ဝေၚ်ဇြဟတ်ဍုၚ်ရေဝ် တွဵုရးမန်ဂှ်တုဲ ခမဳသၚ်မန်ဂမၠိုၚ် မဒှ်အဓိကာရတံကီု၊ ဒံက်တာတေန်မျဵုဝေန် ဒုဥက္ကဌ ကေုာံညးတာလျိုၚ် နူဌာနဗဟဵု NRPC တေံကီု၊ ဥက္ကဌဗော်ဍုၚ်မန်တၟိ နာဲထဝ်မန် ကေုာံဂကောံတံကီု၊ သ္ကိုပ်ဝန်ဇၞော်တွဵုရးမန် ဒံက်တာအေဇြာန် ကေုာံဝန်ဇၞော်ဂကောံအလဵုအသဳရးမန်ကီု၊ ပ္ဍဲကမ္မတဳပံၚ်တောဲ သဳကၠဳပရေၚ်ၜိုဟ်လလမ်ကၟိန်ဍုၚ် UPDJC ဂှ် ညးစၞး လ္ပာ်အလဵုအသဳ၊ လ္ပာ်ဂကောံရပ်လွဟ် ကောန်ဍုၚ်အရၚ်၊လ္ပာ်ဂကောံဗော်ပရေၚ်ဍုၚ်ကွာန်တံကီု၊ ညးစၞး နူဗော်ကောန်ဂကူမန် MNP ကဵု ဗော်ဒဳမဝ်ကရေဇြဳ အလုံရးမန် AMDP တံကီု၊ ဂကောံမဟာဇန်မန်တံကီု၊ ညးဘိက်ထေက်တံကီု၊ ညးဇၞော်ဌာနနာနာ လ္တူဍုၚ်ရေဝ်ကီု၊ မှာဇန်လ္တူဍုၚ်ရေဝ်တံကီု တိုန်စိုပ်တုဲ သီုဖအိုတ် နွံၜိုတ် ၈၀၀ တၠ ဂွံဆဵုညာတ်လဝ်ရ။