သၟတ် ခံၚ်ပ္ဍဲကမၠောန်တံ ညံၚ်ဂွံဂၠိုၚ်တိုန်ကီု၊ ပ္ဍဲဂြောဝ်ဂတာ သ္ၚိကၟိန်တံလေဝ် သြန်လုပ်သ္ဂောံဂၠိုၚ်တိုန်ကီု ရန်တၟံသာ်ဂှ်တုဲ ပ္ဍဲဂိတုမေ (၂) မံက်ဂှ် စပံက်ကၠုၚ် တန်ဗ္တောန်ကွတ်ပလေဝ်စက် အဆံၚ်သဇိုၚ် ပွိုၚ် (၁) ဂိတု ပ္ဍဲ ဘာဗ္တောန်ကွတ် ပညာဂယိုၚ်လမျီုဒေသ၊ဍုၚ်မတ်မလီု၊ တွဵုရးမန်ရ။
အရီုဗၚ် နူအစဳဇန်(နည်းပညာအသက်မွေးဝမ်းကျောၚ်းမှုနှၚ့် စားနပ်ရိက္ခာဖူလုံရေး LIFT ) ကီု နူဂကောံမဟာမိတ်ညးဗြဴမန်၊ ဘာတန်သၠုၚ်နဲကဲပညာ(အလဵုအသဳ) ကေုာံ ဂကောံသ္ပဒတဴအာကၠုၚ် ဍုၚ်သၟာၚ် (IOM) တံကီု ပံၚ်တောဲတုဲ ပံက်လဝ်ရောၚ် ရဴဝွံ ဂွံတီကေတ် နူမိအီပကဴ ညးက္ဍိုက်ပ် ဆန်ၜန်ပရေၚ်တန်ဗ္တောန်ဂှ်ကီုရ။
“ပ္ဍဲဏံ စွံအဓိကကဵု သၟာကမၠောန်ဆုဲပြံၚ်တံတုဲ ရုဲစှ်ကောန်တန်ဗ္တောန်၊ တုဲပၠန် လ္ပာ်ကွာန်ရး သ္ၚောဲနူဍုၚ်တံလေဝ် ဟိုတ်နူအဆံၚ်ပညာဟွံစိုပ်တုဲ အောန်ဒၟံၚ်ကဵု အခေါၚ်အရာ ကမၠောန်တံ သ္ဂောံဂွံဂွံကွတ်ပညာမွဲမွဲသာ်ကီုဂှ်လေဝ် စဳဇန်ကီုဏောၚ်” မိအီပကဴ ဂး။ 
စှေ်နူတန်ဗ္တောန်ဏံတုဲ သွက်ဂွံစဴပံက်ကမၠောန် ပ္ဍဲဒေသဇကုဂှ် ထံက်ပၚ်ကဵု ကပေါတ်စက်ဏောၚ်၊ ညံၚ်ဂွံဂွံကမၠောန်ကၟိတ်ဂှ်လေဝ် သီုဆက်ကဵုတၠကမၠောန်တံကီုဏောၚ် မိအီပကဴ ဂး။
နဲကဲကွတ်ပညာ ဂွံဏာလဝ် နူတန်ဗ္တောန်ဏံဂှ်လေဝ် သွက်ဇကုကီု သွက်ညးဟွံမွဲကဵု တမ်ကမၠောန် ပ္ဍဲဒေသဇကုဂှ်ကီု မိက်ဂွံဆက်ပရးအာ သာ်ဝွံ ကောန်တန်ဗ္တောန်မွဲတၠ မိုၚ်အံၚ်ကျဝ်ဝ် နူကွာန် (သၚ်္ကန်းတော) ပွိုၚ်ဍုၚ်ဍာ်ဗု ဟီုဂးတိုန်ကီုရ။
“သွက်ဂွံဂယိုၚ်လမျီုဇကုကီု၊ သွက်ကောန်ဒေသ ဒှ်ဒၟံၚ် အခက်ကဵုကမၠောန်တံကီု မိက်ဂွံဆက်ပရးအာ ပညာတံဏံ” မိုၚ်အံၚ်ကျဝ်ဝ် ဂး။
မၞိဟ်ကၠုၚ်တိုန်တန်ဗ္တောန်တံဂှ် ဗွဲမဂၠိုၚ် ၜိုန်ဒှ်မၞိဟ်တြုံသၟးကီုလေဝ် မၞိဟ်ဗြဴတံလေဝ် ကၠုၚ်တိုန်တန်ဗ္တောန် ကွတ်စက်ဏံ ဂွံဒၟံၚ်ကီုဏောၚ် အ္စာန်ဗ္တောန်ထ္ၜးနဲကဲ (ဒေါ်ကြည်ကြည်စိမ်႔) ဂးရ။
“ဗွဲမဂၠိုၚ်ဂှ် ပလေဝ်စက်တှေ် မၞိဟ်တြုံတံရ ကၠောန်မာန်ဏောၚ် ထေၚ်လဝ်ဗီုဂှ်၊ အဲဟီုတှေ် မၞိဟ်ဗြဴရလေဝ် လၟုဟ်ကၠုၚ်ဗ္တောန်ထ္ၜးဒၟံၚ်ပ္ဍဲဏံ၊ မၞိဟ်ဗြဴမွဲ လုပ်ဗ္တောန်ထ္ၜး လုပ်သ္ပအ္စာ ဂွံယျတှေ် မၞိဟ်ဗြဴတံလေဝ် ကၠုၚ်တိုန်ဂွံကီုဏောၚ်၊ မိက်ဂွံပလေဝ်စက်တှေ် ၜိုတ်ညိညဇြိုၚ်သာ ပလေဝ်အာဂွံဏောၚ်၊ အေဇှ်ရ မၞိဟ်ဗြဴတံလေဝ် မိက်ဂွံကဵုကၠုၚ်တိုန်ကီု” ဒေါ်ကြည်ကြည်စိမ့် ဂး။
ပ္ဍဲတန်ဗ္တောန်ဏံ ကောန်တန်ဗ္တောန် နူ ပွိုၚ်ဍုၚ်ဍာ်ဗု ရးတနၚ်သဳကီု၊ ပ္ဍဲတွဵုရးမန်မ္ဂး နူပွိုၚ်ဍုၚ်ရေဝ်၊ ဇြပ်ဗု၊ မတ်မလီု၊ တ္ကံခၟိုၚ်၊ ပံၚ်၊ ကျာ်မြဟ်၊ ကျာ်ထဝ်တံကီု၊ ပ္ဍဲတွဵုရးကရေၚ်မ္ဂး နူပွိုၚ်ဍုၚ်လှာဒကှ် ကဵု ပွိုၚ်ဍုၚ်ကအ်ကြိက်တံကီု ကၠုၚ်တိုန်စိုပ်တုဲ သီုဖအိုတ် ကောန်တန်ဗ္တောန် နွံၜိုတ် (၂၀) တၠ ဂွံဆဵုကေတ်။