ဝဏ္ဏမာန်၊ မာတ် ၂၈၊ ၂၀၂၂
ကောန်ဂကူမန် ပ္ဍဲကွာန်သၞေဟ်ထဝ် မၞုံပ္ဍဲပွိုၚ်ဍုၚ်သဓီုဂှ် မၞိဟ်ဗွဲမဂၠိုၚ် ဟီုအရေဝ်မန် ဟွံလေပ်အိုတ်ရတုဲ နွံပၟိက်ဒၟံၚ်ကဵု အ္စာဗ္တောန်ဟီုအရေဝ်မန်ရောၚ် တၠဂုဏ်အ္စာဗ္တောန်ဒၟံၚ်လိက်ဥတုကညၚ်ဂှ်ကီု အ္စာဗြဴမိစန္ဒဳဆာန်ကီု ဟီုရ။
ပ္ဍဲကဵုကွာန်သၞေဟ်ထဝ် ကော်ဗတ်ဗၟာ (ဒၚ်္ဂါးဆိပ်ရွာ) မၞုံပ္ဍဲပွိုၚ်ဍုၚ်သဓီုဂှ် လၟိဟ်သ္ၚိဂကူမန် ဗၞတ် (၂၅၀) သ္ၚိနွံတုဲ မၞိဟ်နွံ အာယုက် (၅၀) သၞာံလ္ပာ်လ္တူဟေၚ် ဟီုအရေဝ်မန်လေပ်တုဲ မၞိဟ်အာယုက် (၅၀) သၞာံလ္ပာ်သၟဝ်မ္ဂး ဟီုအရေဝ်မန် ဟွံ လေပ်အိုတ်ရ။
“အဓိကပိုဲနွံပၟိက်ဂှ်တှေ် မိက်ဂွံဂွံ အ္စာဘာဗ္တောန်ဟီုအရေဝ်မန် ကဵုမၞိဟ်ဍောတ်ဍောတ်တံ အဵုဗီုဏံ၊ ယဝ်ဗ္တောန်ကဵု အခိၚ်တှေ် ဂကူမန်ပ္ဍဲပိုဲ ကလေၚ်ဒှ်မံၚ်မန်ဏီ ပိုဲပတှေ်လဝ်ပေၚ်ပေၚ်၊ အဵု ယဝ်မၞိဟ်ကၠုၚ်ကဵုအရီုအဗၚ် ဟွံမွဲပုဟ် ယဝ်ဗလးလဝ်ပိုဲသၟး ဗ္တောန်မံၚ်အတိုၚ်ဏံရတှေ် ဟွံၜက် (၁၀) သၞာံဏံပုဟ်၊ ဂကူမန်ပ္ဍဲကွာန်ပိုဲ ကၠက်အိုတ် တးဏောၚ်” သာ်ဝွံ တၠဂုဏ်ကလျာဏကီု အ္စာဗြဴမိစန္ဒဳဆာန်ကီု ဟီုထ္ၜးရ။
ပ္ဍဲကဵုကွာန်သၞေဟ်ထဝ် ကော်ဗတ်ဗၟာ (ဒၚ်္ဂါးဆိပ်ရွာ) ဂှ် ဂကူမန်၊ ဂကူဗၟာ၊ ဂကူကရေၚ် စှေ်ဒၞာဲသ္ပအိန်ထံၚ် နှဴရဴညးသ္ကံ တုဲ အရေဝ်လေဝ်ပြံက်နှဴဂၠိုၚ်တုဲ မၞိဟ်အာယုက်ဇၞော်တံဟေၚ် ဟီုအရေဝ်မန် ဂွံမံၚ်ဏီရ။ ဆဂး အရေဝ်မန်၊ လိက်မန်၊ လမျီုဂကူမန်ဂှ် ကၠက်အိုတ်မံၚ်တုဲတုဲရရောၚ် တၠဂုဏ်အ္စာဂှ် ဆက်ဟီုထ္ၜးသာ်ဝွံရ။
“လညာတ်ဂုဏ်တှေ် ဆေၚ်ကဵုအရေဝ်မန်၊ လိက်မန်၊ လမျီုဂကူမန်ဟီုတှေ် ဍေံကၠက်မံၚ်တုဲတုဲရဏောၚ်၊ ဆဂး ဘာ မန်တၠဂုဏ်တံသှေ်မံၚ်ဏီတှေ် ညံၚ်ဂွံလ္ၚောဝ်ကျာ်ဗတ်မန်၊ ညံၚ်ဂွံဒ္ဂိုန်သဳဗတ်မန်ဂှ် ဂုဏ်တံဂစာန်မံၚ်ကီုလေဝ် ဆဂး ဒါယကာတံလေဝ် နကဵုလ္ၚောဝ်ကျာ်ဗတ်မန် ဒ္ဂိုန်သဳဗတ်မန်ဂှ် ဒါယကာတံလေဝ် ပၟိက်ဟွံမွဲကၠုၚ်ရပုဟ် ဒှ်အာဗီုဂှ်ယျ တှေ် ကၠက်မံၚ်တုဲတုဲရဏောၚ်” ဂှ် တၠဂုဏ်ကလျာဏ ဆက်ဟီုမြော်ရ။
ကောန်ဂကူမန် ဒေသပွိုၚ်ဍုၚ်သဓီုဝွံ တုဲကၠုၚ်ဗၞတ်ပွိုၚ်ၜိုတ် (၁၀၀) သၞာံတေံဂှ် ဂကူမန် နူကဵုကွာန်ကံဗိန်၊ ကွာန် ကြေဝ်ဏာတံ သွက်ဂွံကၠောန်စပရေၚ်ပိုန်ဒြပ် ပ္ဍဲဒေသတံဂှ်တုဲ စပြံၚ်စိုပ်ကၠုၚ်ဒေသဝွံရ၊ ဗွဲကြဴဏံ ဂကူမန်နူပွိုၚ်ဍုၚ်ပံၚ် တံလေဝ် ကောံဇက်ကၠုၚ်ဂၠိုၚ်တုဲ ဒှ်တိုန်သ္ၚိ ဗၞတ် (၂၀၀) သ္ၚိပြၚ်ပြၚ်ရ။
ပ္ဍဲကွာန်သၞေဟ်ထဝ်ဂှ် ၜိုန်ရဒှ်သ္ၚိမန်လၟိဟ်ဂၠိုၚ်အိုတ်ကီုလေဝ် ဒေသပိုတ်သကုတ်ဒၟံၚ်ကဵု ဒေသဍုၚ်ကွာန်မန်ကီု၊ ဂကူ ဗၟာ၊ ဂကူဂလာ၊ ဂကူကရေၚ် ပြံက်နှဴဂၠိုၚ်ဂှ်ကီု၊ ဂကောံအာဂတပၠတရဴ စပ်ကဵုထိၚ်ဒဝ်မၚ်မွဲဂကူဟွံမွဲကီု၊ ဗၞတ်အကြာ ၜိုတ် (၁၀၀) သၞာံပြၚ်ဏံ ယဝ်ရအရီုအဗၚ်နူတၞဟ်ဟွံဂွံမ္ဂး ဂကူမန်ပ္ဍဲကွာန်သၞေဟ်ထဝ်ဂှ် သွက်ဂွံကၠက်အာရောၚ်ဂှ် လေဝ် ခမဳသၚ်ပ္ဍဲကွာန်ဂှ်ကီု၊ အ္စာဘာရေၚ်တၠုၚ်ဗ္တောန်ဒၟံၚ် လိက်မန်၊ အရေဝ်မန် ဥတုကညၚ် ပ္ဍဲကွာန်ဂှ်ကီု သ္ၚဳဂၠိပ်လဝ်ရ။
0 Comments