သွက်ဂွံဂလိုင်ပ္တိုန်လၟိဟ်မၞိဟ် ညးမလုပ်ယိုက်ဝန်ပၞာန် အတိုင်သၞောဝ်ဥပဒေ လုပ်ယိုက်ဝန်ပၞာန် (ပြည်သူ့စစ်မှုထမ်းဥပဒေ) မာန်ဂှ် နူကဵုညးစၞးဗော်ပရေင်ဍုင်ကွာန်တအ် ကဵုလဝ်ကသပ်နွံရောင် တ္ရဲဏအ် (ဂျာန္နဝါရဳ ၂၅) ဂှ် ကံင်ဇြဳပၞာန်တအ် ချူဓမံက်ကၠုင် ပ္ဍဲမုက်လိက်ပရိုင်ညးတအ် (မျာန်မာအလေန် စတမ်တအ်) ရ။

ဂကောံကမၠောန် သွာင်ဗော်ပရေင်ဍုင်ကွာန်ကဵု ကဝ်မတဳပရေင်ၜိုဟ်လလမ် ကံင်ဇြဳပၞာန်တအ် ဆဵုဂဗသဳကၠဳညးသ္ကအ် ပ္ဍဲနေပျဳတဝ် နူဂျာန္နဝါရဳ စၟတ်တ္ရဲ ၂၃ ကဵု၂၄ ပွိုင် ၂ တ္ရဲတုဲ နူကဵုညးစၞး ဗော်ပရေင်ဍုင်ကွာန်တအ် ပ္တိုန်ထ္ၜးကဵုလဝ်ကသပ်ဂှ်ရောင် သ္ဂးရ။

တုဲပၠန် ညးမဒှ် PDF တအ် ညံင်ဂွံက္လေင်လုပ်ဍုင် (ဝါ) ဖျေံလွဟ်ဂၠိုင်င်မာန်ဂှ်လေဝ် နူကဵုဗော်ပရေင်ဍုင်ကွာန်တအ် ပ္တိုန်ထ္ၜး သဳကၠဳလဝ်ကဵု ကံင်ဇြဳပၞာန်တအ်ကီုရ။

လဂွံကဵုသၞောဝ်ဥပဒေ လုပ်ယိုက်ဝန်ပၞာန် ကံင်ဇြဳပၞာန်တအ် သ္ပလဝ်ဒ္တန်ဂှ်ဝွံ ယဝ်မၞိဟ်တြုံမ္ဂး အာယုက် အကြာ ၁၈ သၞာံကဵု ၃၅ သၞာံကီု၊ ယဝ်ဒှ်မၞိဟ်ဗြဴမ္ဂး အာယုက် အကြာ ၁၈ သၞာံကဵု ၂၇ သၞာံကီုတအ်ဂှ် သ္ဒးလုပ်ယိုက်ဝန်ပၞာန် စဵုကဵုပွိုင် ၂ သၞာံဏောင် ချူဓမံက်လဝ်ရ။

သ္အာင်နူဂှ် ယဝ်ဒှ်ညးတၠကွတ်၊ တၠပညာမွဲမွဲမ္ဂး ယဝ်မၞိဟ်တြုံ အာယုက်အကြာ ၁၈ ကဵု ၄၅ သၞာံ၊ ယဝ်မၞိဟ်ဗြဴ အာယုက်အကြာ ၁၈ ကဵု ၃၅ သၞာံ မပ္တံသာ်ဏအ် ပိုင်ခြာလဝ်ကဵုအာယုက်နွံတုဲ ယဝ်ဒှ်အကာဲအရာကာမံက်တိုန် (ကာတၟေင်) ဏောင်မ္ဂး စဵုကဵုပွိုင် ၅ သၞာံ နူကံင်ဇြဳပၞာန်ဗမာတအ် အခေါင်ဂလိုင်ပ္တိုန် ကာလအပိုင်အခြာ ဒးယိုက်ဝန်ပၞာန်ဂှ်နွံရ။

ပ္ဍဲကဵုပွိုင်သၞာံ ၂၀၂၄ မွဲသၞာံဂှ် နူဒပ်ပၞာန်ဗမာတအ် ပံက်ဂွံလဝ်ဘာတန်ဗ္တောန်ကွတ်ပၞာန် စိုပ်မံင်လၟေင် ၉ ဝါတုဲ ဘာမွဲလၟေင်မ္ဂး ဒးကေတ် လၟိဟ်ကောန်ပၞာန်တၟိ ဗၞတ် ၅၀၀၀ တၠရောင် ကံင်ဇြဳပၞာန်တအ် ဖျေံလဝ်နွံရ။

ဒုင်သ္ဇိုင်ကဵု ဘာပၞာန် မပံက်လဝ် ဂွံ ၉ လၟေင်ဂှ်တုဲ စဵုကဵုတ္ရဲဏအ်မ္ဂး ဒပ်ကံင်ဇြဳပၞာန်ဗမာတအ် ပ္ကောံပ္ကေဝ်ဂွံလဝ်ဇြဟတ်ကောန်ပၞာန်တၟိ ဗၞတ် ၄ ဠက်ဘာ်ဒှ်ရောင် ချိင်ဆကေတ်ရ။

ပ္ဍဲဂကောံကမၠောန် သွာင်ဗော်ပရေင်ဍုင်ကွာန် မဂွံလဝ်အခေါင် နူကံင်ဇြဳပၞာန်တအ်ဂှ်ဝွံ က္ဍိုပ်သ္ကိုပ်ကွးဘာ ၈၈ တြေံ ဥုကိုဝ်ကိုဝ်ကျဳ (ဥက္ကဌ ဗော်ညးဍုင်ကွာန်) ဒှ်ညးက္ဍိုပ်တုဲ သှ်ေနူဂှ်မ္ဂး သၟာပရေင်ဍုင်ကွာန် ဂကူရခေင် ဒံက်တာဨမံင် ကေုာံ က္ဍိုပ်သ္ကိုပ်နူဗော်ကျဖောတ်တအ်လ္ရဵု ပါလုပ်ရောင် ဂွံတီကေတ်ရ။