နကဵုတၚ်ရန်တၟံ သွက်ဂွံကဵုဒြဟတ်ဓရိုဟ် သၠုၚ်ပ္တိုန်အသိၚ်ဗှ်လိက်တုဲ ကၠောန်ဗဒှ်ဝိုၚ်သဳကၠဳ လိက်ပတ်မန်ရောၚ် ညးတာလျိုၚ်ဂကောံအ္စာကၞေဟ်မန်မွဲတၠ ဟီုရ။
ပ္ဍဲတ္ၚဲအ္စာကဝိမန် မရနုက်ကဵု (၁၀) ဝါဏံမ္ဂး ဂကောံအ္စာကၞေဟ်တအ် ဖန်ဇန်လဝ် ဝိုၚ်သဳကၠဳလိက်ပတ်မန် နကဵုက္ဍိုပ်လိက် “လိက်ပတ်မန် ကေုာံ ယေန်သၞာၚ်ဗှ်လိက်” နွံတုဲ ရုဲစှ်လဝ် အ္စာသဳကၠဳတအ် တုဲဒှ်အာရရောၚ်ဂှ် ညးအုပ်ကာ ဂကောံအ္စာကၞေဟ်မန် နာဲဝဏ္ဏမာန် ဟီုရ။
“ဝိုၚ်သဳကၠဳလိက်ပတ်မန် သွက်တ္ၚဲအ္စာကဝိမန် မရနုက်ကဵု (၁၀) ဝါဏံဂှ် ရုဲစှ်လဝ် အ္စာသဳကၠဳဂမၠိုၚ်တအ်တုဲအိုတ်ရ၊ အဓိက ဝိုၚ်သဳကၠဳဏံဂှ် နကဵုတၚ်ရန်တၟံ သွက်ဂွံကဵုအာဒြဟတ်ဓရိုဟ် သၠုၚ်အသိၚ်ဗှ်လိက်ရ” သာ်ဝွံ သ္ဂးရ။
ပ္ဍဲကဵုဝိုၚ်သဳကၠဳလိက်ပတ်မန်ဝွံ ကၠောန်ဗဒှ်အာ ပ္ဍဲကဵုသၠာတ်ဥဒျာန်မှာထေရ်ပါလိတ ဍုၚ်ကၟာဝက် (ရးဇြာ) တုဲ အ္စာသဳကၠဳဂမၠိုၚ်ဂှ် တၠဂုဏ်အ္စာ ဒံက်တာသဳလတေဇ၊ ကျာ်ဇၞော်အ္စာဘဒ္ဒန္တ အတုလ (သာသနဓဇဓမ္မာစရိယ)၊ နာဲရတ်ဂကူ (အ္စာဇြေ) တအ်ရ။
“တ္ၚဲအ္စာကဝိမန်ဂှ် ဂကောံအ္စာကၞေဟ်တအ် ကၠောန်ကၠုၚ်မံၚ်လၟေၚ်သၞာံအဆက်ဆက်ရ၊ ဝိုၚ်သဳကၠဳလိက်ပတ်ဂှ်လေဝ် ကၠောန်ကၠုၚ်မံၚ်ရရ၊ သၞာံဏံဂှ် ရံၚ်ကေတ် ပ္ဍဲကဵုအကာဲအရာဂကူမန်ပိုဲ စပ်ကဵုပရေၚ်ဗှ်လိက်အသိၚ်ဍိုန်စှေ်မံၚ်ဂှ်တုဲတှေ် သီုကဵုဒှ် ပရေၚ်ဂၠာဲသွဟ်ကီု သီုဂွံဒှ်ပရေၚ်ဖတိုက်ဖအောဝ်ဆဝ်ဗ္ၚုဟ် ပရေၚ်ဗှ်လိက်ကီုတုဲတှေ် တၚ်လဝ်က္ဍိုပ်လိက် ‘လိက်ပတ်မန် ကေုာံ ယေန်သၞာၚ်ဗှ်လိက်’ ရောၚ် ညးအုပ်ကာ ဂကောံအ္စာကၞေဟ်ဂှ် ထပ်ဟီုရ။
တ္ၚဲအ္စာကဝိမန်ဂှ် သ္ပအစာံကဵု ကျာ်ဇၞော်စွောံ (ဥတ္တမာရမ္ဘ) စချူခၞံပြကိုဟ်လောကသိဒ္ဓိ ပ္ဍဲသက္ကရာဇ်ဍုၚ် (၁၁၀၂)၊ ဂိတုမာ် (၃) မံက်ဂှ်တုဲ စတမ်နူသၞာံ (၁၃၇၈) သၞာံ (ခရေတ်-၂၀၁၆) တေံ ဂကောံအ္စာကၞေဟ်တန်ဒှ်တုဲ စကၠောန်ကၠုၚ် လၟေၚ်သၞာံအဆက်ဆက်ဂှ် သီုသၞာံဏံမ္ဂး ပေၚ်ကၠုၚ် မရနုက်ကဵု (၁၀) ဝါရ။
