မာံသုတ – ဂကောံရပ်လွဟ် ဟွံတီယၟုမွဲဂကောံ နူတနေံအခိၚ်နူဂယးပြဟ် (ၜိုတ် ၅ နာဍဳ) ဂှ် လုပ်ပန်ထောံ ဗဒိုပ်ကုမ္ပဏဳသိုၚ်ခၞံ အေကဝ် (AK) ကေတ်လဝ် ကာန်ထရာ် ဂၠံၚ်ကွဳစက် မတ်မလီု-ရေဝ်-ဒဵုဒလဲဂှ်တုဲ သီုရပ်ကော်ဏာ ကောန်ကမၠောန် ၄ တၠရ။

ဃောလုပ်ပန် ဗဒိုပ်ကမၠောန် မၞုံဇရေၚ်ကွာန်ကၟာဝက်ဂှ် သီုစံၚ်ထောံ တာဲကောန်ကမၠောန်တံ ဇူဒီုရောၚ် ဒါယကာကျာ် နူကွာန်ကၟာဝက်မွဲတၠ ဟီုရ။

“သဘၚ်ကျာ် ပ္ဍဲကွာန်ကၟာဝက်ဏံလေဝ် ဒှ်ဗတံလက္ကရဴအိုတ်။ အခိၚ်မၞိဟ်တံ ဒကုဲမံၚ်ပေဲါတုဲ တီဟွံဂၠိုၚ်အှေ်ပုဟ်။ ဟီုမံၚ်အိုတ်ဂှ် ရဲရပ်လွဟ်တံ ရပ်ကော်ဏာ သီုကောန်ကမၠောန်ကၠောန်ဂၠံၚ်ဏောၚ်” သာ်ဝွံ ညးဆက်ဟီုရ။

ဂိတုဝှ် (၆-၇-၈) စွေက်ဂှ် ဒှ်သဘၚ်ကျာ်တၟံကၟာဝက်တုဲ ကၠောန်သ္ပသဘၚ်ဇၞော်ဇၞော် ဇၟာပ်ဇၟာပ်သၞာံဂှ်ရ ပ္ဍဲဍုၚ်မန်မ္ဂး ဒှ်သဘၚ်ကျာ် ဒယှ်တှ်မွဲရ။

“ကၠာသဘၚ်ကျာ်ဏံ ဟွံဒှ်ဏီဂှ် ဂကောံရပ်လွဟ်မွဲဂကောံ ဗက်အာတ်မံၚ်လှုဲ ပ္ဍဲကွာန် ပွိုၚ်ဍုၚ်မုဟ်ဍုၚ်ဏံကီု၊ တၠကၠအ်လ္ၚဵုတံဂှ် သီုဒးကဵုဏာလှုဲလေဝ် နွံမံၚ်” သာ်ဝွံ တၠကၠအ်ဗ္ၜိုတ် နူကွာန်ကၟာဝက်မွဲတၠ ဟီုရ။

တုပ်တဴသာ်ဂှ်ကီု ပ္ဍဲဂိတုဂျူလာၚ် ၁၁ ဂှ် ဂကောံရပ်လွဟ် မန်၊ ကရေၚ် ပံၚ်တောဲတံ ရပ်တံၚ်ဏာ ကောန်ကမၠောန်ကၠောန်ဂၠံၚ် နူကုမ္ပဏဳ (AK) ဂှ် မွဲတၠတုဲ အာတ်လဝ်လှုဲ (၁၅၀) ရောၚ်ဂှ် ဓမံက်ထ္ၜးလဝ် ပ္ဍဲပရိုၚ်ကၠာတေံရ။

ပ္ဍဲဂိတုဂျူလာၚ် ၂၇ ဂှ်လေဝ် ဂကောံရပ်လွဟ်မန် က္ဍိုပ်ထပိုဲတာန်လွေန်တံ အာတ်လဝ်လှုဲ ပ္ဍဲကၠအ်ဗ္ၜိုတ်အလဵုအသဳ ကွာန်ကြုၚ်ဖာ်၊ ပွိုၚ်ဍုၚ်မုဟ်ဍုၚ်ရောၚ်ဂှ် ဓမံက်ထ္ၜးလဝ် ပ္ဍဲပရိုၚ်ကၠာတေံကီုရ။

သွက်သ္ဂောံထိၚ်ဒဝ် ပလေဝ်အာဂၠံၚ်ဒဒန် သကုတ် မတ်မလီု-ရေဝ်-ဒဵုအလဲ မၞုံဇမၠိၚ် ၁၁၂ တိုၚ်၊ ၆ ဖာလုၚ်ဂှ် သ္ပပတံနူ ၁၆-၃-၂၀၁၁တုဲ နကဵုသၞောဝ် ဗဳအဝ်ဒဳ (BOT) ကဵုလဝ်အခေါၚ် ကုကုမ္ပဏဳ သိုၚ်ခၞံ အေကဝ် (AK) ရောၚ်ဂှ် ဝန်ဇၞော်သိုၚ်ခၞံ ကၟိန်ဍုၚ် ဟီုကၠုၚ်လဝ် နွံရ။

ကုမ္ပဏဳဝွံ ပ္ဍဲအခိၚ်ကသီု ဒေံါဇူလဝ် ပရေၚ်ပလေဝ်ဂၠံၚ်ဂှ်ရ ကွဳစက်တံ အာကၠုၚ်ဝါတ်ဂါတ် ဒှ်အခက်အခုဲ ဗွဲမလောန်တုဲ ဗက်မံၚ်အကံက်ဂၠံၚ် ဇၟာပ်ဇၟာပ်တ္ၚဲရောၚ်ဂှ် ဂွံတီကေတ် နူညးအာတရဴတံရ။

ဂကောံရပ်လွဟ်တံ ဗက်မံၚ်အကံက်၊ ရပ်တံၚ်ဒၞံၚ်မၞိဟ် ပ္ဍဲဒေသမန်သာ်ဏံဂှ် ကြဴနူ သၞာံ ၂၀၁၀ ဗော်ဍုၚ်မန်တၟိ ဒေံါပန်ပှော် လီုကၠုၚ်ကဵု အလဵုအသဳပၞာန်ဗၟာတုဲဂှ် ကတဵုဒှ်ကၠုၚ် ဂၠိုၚ်ရောၚ် ညးမလ္ၚတ်တံ သ္ၚဳဂၠိပ်အိုတ်ရ။

ပရေၚ်ကတဵုဒှ် နူတနေံဏံဂှ် နူကဵုဌာန်ဂအုပ် ခရိုၚ်မတ်မလီု ဗော်ဍုၚ်မန်တၟိ ဆက်လ္ၚတ်မံၚ်ဖိုဟ်ရောၚ်ဂှ် ညးတာလျိုၚ် ဗော်ဍုၚ်မန်တၟိမွဲတၠ ဟီုရ။