နာဲသာၚ် – ပ္ဍဲကဵုသၞာံဏအ် ပ္ဍဲကဵုဍုၚ်သေံ ဟို်တ်နူကဵုဗြဲဇၞော် အဆက်က်တုဲ ကွာန်မန်ဍုၚ်သေံ (ဝါ) မန်ဍုၚ်ဗၟံက် နွံဇိုၚ်ၜဳမေဝ်ဃောၚ် ဗွဲမဂၠိုၚ် ဍာ်ဗၠိုက်အာတုဲ ကွာန်မန်ပက်ကရေတ်ကဵု ကွာန်မန်ဂမၠိုၚ် ပ္ဍဲဒေသခရိုၚ်ပထုံဌာနဳတအ် ဒးဘဲဍာ်ဂၠိုၚ်ရောၚ် ညးဒေသတအ် ကဵုပရိုၚ်ရ။
‘’လၟုဟ် ပ္ဍဲကဵုကွာန်ပိုဲတအ်ဂှ်တှေ် ဍာ်စိုပ်အာ ဗၞတ်ပိမေတ် (၆ ဟတ်) ကီုရ။ ဘာလကျာ်တအ်လေဝ် ဗၠိုက် ကပေါတ်တြေံတြဟ်တအ် ဆောံလေၚ်အာ တၟာဂလိုၚ်’’ ရဴဝွံ ညးက္ဍိုပ်ဂကောံသၟတ် နာဲဖာဲရာတ် နူကွာန်သာံခေါ် ပ္ဍဲခရိုၚ်ပထုံဌာနဳ လဴထၜးရရ။
အတိုၚ်မွဲခရိုၚ် နန်ထပူရဳမွဲဂှ် ဍာ်ဗၠိုက်အာတုဲ ကွာန်မွဲဒယှ်တှ် ကၠောန်ဒၟံၚ်ထၟာဲတိ ‘ကွာန်ပက်ကရေတ်’ (မဇညးတအ် နူကဵုကွာန်ဟပဠၚ်) လေဝ် ဗၠိုက်အာဍာ်ကီုတုဲ ဘာမန်နွံဒၟၚ် ဗၞတ် (၅) ဘာ မွဲဒမြိပ်ၜဳလေဝ် ဗၠိုက်အာရောၚ် ညးဒေသ နန်ထပူရဳ နာဲမန်ဨ ဝံဇြဳရာမည် လဴထ္ၜးစရ။
‘’ကွာန်ပက်ကရေတ်ဂှ် သဝ်မံၚ်တှေ် ဗၠိုက်ကၠာအိုတ်ရ။ ကမၠောန်ကၠောန်ထၟာဲ သွံထၟာဲ ဒေံါအာ အိုဿီုရ။ ကၟုဲတအ်လေဝ် အာကၠုၚ်ဟွံဂွံ’’ ရဴဝွံ သောၚ်ထၜးကဵု အကာဲအရာရ။
ကွာန်မန်ဇိုၚ်ဍုၚ်ၜၚ်ကံက်ဂှ် နွံပ္ဍဲခရိုၚ် ၜါခရိုၚ်ဏအ်တုဲ ဂကူသေံတအ်လေဝ် လုပ်နှဴရဴကၠုၚ်ဗွဲမဂၠိုၚ်ရ။
‘’ပ္ဍဲကဵုခရိုၚ်ပထုံဌာနဳဏအ်တှေ် ပွိုၚ်ဍုၚ်နွံ (၇) ပွိုၚ်ဍုၚ် မန်ပိုဲဖအို်တ်ရ တန်တဴဒၟံၚ်၊ ဂကူမန်ပိုဲတအ်ဂှ် ဒှ်က္ဍိုပ်ညးဂြိပ်ဒဴကၠုၚ် ဘဲဗၟာအလန်ကၠာအိုတ် အဃောဍုၚ်ဟံသာဝတဳ ဒးဒုၚ်ဗတိုက်ကဵုဗၟာတအ်ရ’’ ရဴဝွံ နာဲဖာဲရာတ် လဴထၜး ဝၚ်ကွာန်ညးရ၊
ကွာန်မန်ပက်ကရေတ်ဂှ် ဟိုတ်နူကၠောန်ထၟာဲတိ အခိုက်မန်နာနာသာ်တုဲ ဒှ်ကွာန်ထိ်ၚ်ဒဝ်ယေန်သၞာၚ်မန်မွဲရောၚ် သၟိၚ်သေံတအ် စွံအထိုၚ်အသး ကဵုအရီုအဗၚ် သွက်ဂွံဆက်ထိၚ်ဒဝ်အာ ကွာန်ဝွံရ။
ပ္ဍဲကဵုအခိၚ်ဗြဲသၞာံဏအ်ဂှ် ပ္ဍဲဍုၚ်သေံဏအ် ဗြဲဂူဒၟံၚ် ဗၞတ် ပိဂိတုအဆက်က်တုဲ ဍာ်ဗၠိုက်အာ ဒၞာဲဗွဲမဂၠိုၚ်ရ။ နူကဵုသ္ကုတ်သၟဝ်ကျာဍုၚ်သေံ ဍာ်ဗၠိုက်ကၠာတုဲ ဍာ်တအ်ဂှ် ဆက်ဟဳစှေ်ကၠုၚ် လ္ပာ်သၟဝ်ဝွံတုဲ ပါၚ်တြၚ်ဍာ်လ္ၚဵု လီုလာ်တုဲ ဍာ်ဂှ် ဇိုန်ကပိုက်လုပ်အာ ဍုၚ်ၜၚ်ကံက်ရ။
ဒၞာဲပထဝဳဍုၚ်ၜၚ်ကံက်ဂှ် သဝ်နူကဵုဍာ်မဟာသမိဒ်တုဲ ဂကူမန်ပိုဲ နွံကဵုယေန်သၞာၚ် မံၚ်တန်တဴအာ ဇိုၚ်ၜဳဇိုၚ်ကြုၚ်တအ်ဂှ် ဒးဘဲရ။