နာဲမာန် – နူကဵုခမဳသၚ်တအ် ပညဳပညပ်မံၚ် ဗော်ၜါ ဂွံဒှ်မွဲဗော်ဓဝ်ဂှ် အကာဲအရာဂွံပံၚ်ပြဟ်ဟ် ဟွံဒှ်ဏီ၊ ဟိုတ်ဂှ်ရ ဗော်ဍုၚ်မန်တၟိ ဒးဘိုၚ်ပညဳကဵုဇြဟတ်ဒရိုဟ်ကီုညိ သာ်ဏံ ညးဍုၚ်ကွာန်လ္ၚဵု အာတ်မိက် ပ္ဍဲကာလ ဂကောံပၠတရဴဗော်ဍုၚ်မန်တၟိ စှေ်သ္ပပေဲါသောၚ်ကလး ပ္ဍဲပွိုၚ်ဍုၚ်ဇြပ်ဗု စၟတ်တ္ၚဲ (၂၉) ဂိတုဂျောန်ဝွံရ။
“ဗော်မန်ပိုဲၜါ ယဝ်ဟွံဒှ်ပံၚ်တှေ် သၞာံ ၂၀၁၅ ပေဲါရုဲမာဲဂတတေံ မန်တံ ကျမာဲဍာံဍာံရောၚ် ပိုဲညးဍုၚ်ကွာန်တအ် ညာတ်ကေတ် သာ်ဏံရ၊ လၟုဟ် ခမဳသၚ်တအ်လေဝ် ၜိုတ်ညးတအ် ပညဳဂှ် ပညဳမံၚ်ဖိုဟ်ရ ဆဂး အကာဲအရာ ဂွံပံၚ်ပြဟ်ဟ်ဂှ် ဒှ်ဟွံမာန်ဏီပုဟ် ပိုဲတအ်မိၚ်မံၚ်၊ နကဵုဗော်ဍုၚ်မန်တၟိလေဝ် မိက်ဂွံကဵုဘိုၚ်ကဵုဇြဟတ်ဒရိုဟ် ဘိုၚ်ချပ်ကဵုကီုညိ စၞးညးဍုၚ်ကွာန်ပိုဲ အဲမိက်ဂွံဗ္တိုက်ဖၟောဝ် ဗော်ဍုၚ်မန်တၟိရ” ရဴဝွံ ညးက္ဍိုပ် ကၠောန်တ္ၚဲကောန်ဂကူပွိုၚ်ဍုၚ်ဇြပ်ဗုကဵု ပွိုၚ်တိုက်ကွာန်ဝါခရူလေဝ်ဒှ် နာဲအံၚ်ဇၞး သ္ပစၞးညးဍုၚ်ကွာန်ဂမၠိုၚ်တုဲ ပ္တိုန်ထ္ၜးကဵုဗော်ဍုၚ်မန်တၟိရ။
ညးတာလျိုၚ်ဗော်တံ ကၠောန်လဝ်ပေါဲသောၚ်ကလးပ္ဍဲကွာန်ဝါခရူ
စပ်ကဵု နာဲအံၚ်ဇၞး သ္ပစၞးညးဍုၚ်ကွာန်တုဲ ဟီုပ္တိုန်ထ္ၜးလဝ်ကဵု ဗော်ဍုၚ်မန်တၟိ ညံၚ်ဂွံဘိုၚ်ကဵုဇြဟတ်ဒရိုဟ် ကိစ္စဗော်ၜါဂှ် ဂကောံပၠတရဴ ကေၚ်ကာဗဟဵု နာဲဝေန်လှ ဟီုဂှ် “စပ်ကဵုကိစ္စဗော်မန်ၜါဗော် ဂွံဒှ်မွဲဗော်ဟီုဂှ် နကဵုဗော်ပိုဲလေဝ် စှေ်မံၚ် စိုတ်ရ ယဝ်ရညးဍုၚ်ကွာန်တအ် အာတ်မိက်ဗော်ပိုဲ ဘိုၚ်ပညဳကဵုကီု ဟီုတှေ် ဗော်ပိုဲ ဂစာန်ပညဳကဵုကီုရောၚ်” သာ်ဏံ ကေၚ်ကာဗဟဵု နာဲဝေန်လှ သှ်ကလးရ။
ပရေၚ်ဂကောံသၚ်တအ် ပညဳပညပ် လၟေၚ်ဂိတုဂှ် တုဲကၠုၚ် ဂျောန် (၁၈) ဇှေ် (၁၄) စွေက် တုဲကၠုၚ်ဂှ်မ္ဂး သဳကၠဳပညဳဂွံ ၜါဝါတုဲ ပ္ဍဲကဵုပရေၚ်သဳကၠဳအလန်လက္ကရဴဏံဂှ် ဂကောံပညဳပညပ်သၚ်တအ်ပ္တိုန်ထ္ၜးလဝ် လၟိဟ်ညးစၞး ဗော်သီုဗော်ၜါ နကဵု လၟိဟ်တုပ်ပ် ပ္ဍဲပွိုၚ်ကာလလဵု ဂွံသဳကၠဳဗီုပြၚ်ဂွံပံၚ်ဂှ် ညံၚ်ဂွံပ္တိုန်နၚ် ပ္ဍဲကဵုပေဲါသဳကၠဳအလန် (၃) ဝါ ဂတတေံဂှ် သၚ်တအ် ပ္တိုန်ထ္ၜးလဝ် သီုဗော်ဒဳမဝ်ကရေဇြဳအလုံရးမန် သီုဗော်ဒဳမဝ်ကရေဇြဳမန်နွံရ။
လ္တူဂကောံသၚ်တအ် အာတ်မိက်လဝ် ညးစၞးတုပ်ပ် သီုဗော်ၜါဂှ် “ ပိုဲရံၚ်ကေတ် ပရေၚ်ပံၚ်ဗစပ်ဂှ် ဟိုတ်နူဂၠိၚ်ဂှ်ရ ကာလသဳကၠဳ မရနုက်ပိအလန်တေံတှေ် သဳကၠဳတုဲကၠုၚ်ဂှ် ပိုဲအာတ်မိက်လဝ် သီုဗော်ၜါ ညးစၞးဗော်မွဲတှေ် ဥပမာ-၂၀ တၠဟာ တန်တဴကဵု ပရေၚ်တုပ်စိုတ် လ္တူဗော်ၜါဂှ်ရ၊ တ္ၚဲလေဝ်ဟဂှ်ရ တ္ၚဲကာလလဵု သ္ပပေဲါသဳကၠဳ ကဵုညးတအ် ချိၚ်ရုဲကေတ်တ်၊ အဵုဂှ်တုဲတှေ် ပိုဲချပ်လဝ်တှေ် ဂွံညးစၞးဗော်ၜါလ္ပာ်ဂှ်တုဲတှေ် ပကောံထောံကဵုဒှ်မွဲ က္ဍိုပ်သ္ကိုပ်ဗော်ကီု သ္ဇိုၚ်သၞောဝ်ဒက်ပ္တန်ဗော်ကီု လက္ကရဴအိုတ် ယၟုဗော်ကီု ကဵုညးဂွံရုဲလဝ် နကဵုဆန္ဒမာဲ ညးတအ် (သီုၜါဗော်) ဂှ်ရ ကဵုအဝဵုရောၚ်” သာ်ဏံ တၠဂုဏ်ပုပ္ဖဟံသာ ပ္ဍဲဂကောံပညဳပညပ်ဂှ် ဟီုလဴထ္ၜးရ။
ကိစ္စဗော်ၜါဂှ် ဟိုတ်နူပရေၚ်ပညဳပညပ် ဂွံဒှ်ပံၚ်ပြဟ်ဟ်ဂှ် အကာဲအရာ ဟွံကဵုဏီတုဲ ဂကောံဗော်ကဆံၚ်သၟဝ် သီုၜါဗော် ဟွံပေၚ်စိုတ်ကဵု ဗဟဵု သီုဗော်ၜါ ဒှ်ကၠုၚ်ရ။
“သီုဗော်ၜါလေဝ် ယဝ်ရ ဟွံပံၚ် သ္ပထောံမွဲဗော်တှေ် ပ္ဍဲကဵုတွဵုရးဍုၚ်မန်ဂှ် ဂကောံဗော်တၞဟ်ဟ်တအ် စန္ဒက်ဏာ ညးဍုၚ်ကွာန်တအ် အိုတ်ရောၚ် အဃောဇကုကဵုဇကု ဒးကေတ်မံၚ်အခိၚ် ပရေၚ်ပံၚ်ဗစပ်ဂှ် သွက်ပေဲါရုဲမာဲဂတတေံ အခိၚ်စန္ဒက်လဇုဲလောန်ရောၚ်” သာ်ဏံ စၠတ်ထဝ်တွဵုရးမန် နာဲနာၚ်ဥူ ဟီုရ။
စပ်ကဵုကိစ္စပံၚ်ဗစပ်ဗော်ၜါ ဂွံဒှ်ပြဟ်ဟ်မာန်ဂှ် နူကဵု ဂကောံသၟတ်ပွိုၚ်ဍုၚ်ရေဝ် ချူပလံၚ်ဗစိုပ်လဝ်လိက် ကဵုဂကောံ ပညဳပညပ်သၚ်တအ် လိက်ပံက်ထိုၚ် နွံရ။ ဂကောံသၟတ်ပွိုၚ်ဍုၚ်ဇြပ်ဗု ဂကောံသၟတ်ပွိုၚ်ဍုၚ်မုဟ်ဍုၚ် ဂကောံသၟတ် ပွိုၚ်ဍုၚ်တၞဟ်ဟ်ဂမၠိုၚ် သွက်ဂွံချူပလံၚ်ဗစိုပ်ကဵုဇြဟတ်ဒရိုဟ် ကုဗော်ၜါ ညံၚ်ဂွံဒှ်ပံၚ်ပြဟ်ဟ် နွံမံၚ်ရောၚ်။
0 Comments