ဌာန်ပရိုၚ်ဗၠးၜးမန်– ကဝးရုပ် အာဲကၟာဲယေန်သၞာၚ်လၟေၚ် (၄) အကြာသတ္တဟဏံ မွဲအခိၚ်ဓဝ်သွက်ဂွံတြးပ္တိတ် အလုံလိုက်မွဲရောၚ် ညး ဖန်ဇန်ကၠောန်ကဝးရုပ်အာဲကၟာဲ နာဲပါန်အံၚ် ဟီုလဴကဵုရ။

“ကဝးအာဲကၟာဲယေန်သၞာၚ်လၟေၚ် (၄) ဏံ ဂွံတုဲဒှ်ဂှ် ဆဵုတၚ်ခက်ခုဲတၟာဂလိုၚ်၊ ဂွံကၠောန်ဒွက်ကီု ဒယှေ်တုဲလေဝ် ဂွံ တက်ရုပ်ကီု ယဝ်ကေတ်ခိုဟ်ဟ်တှေ် ဒးသုၚ်စောဲသြန်တၟာဂလိုၚ်ဏေါဝ် ၜိုတ်ပ္တိတ်လဝ်ဇြဟတ်ဂှ် ယဝ်ရကောန် ဂကူတအ်ဟွံကဵုဇြဟတ် ဒးဟီုတှေ် ယဝ်ရကဝးအာဲကၟာဲလၟေၚ် (၄) ဏံ ၜိုတ်ပ္တိတ်လဝ်တမ် ဟွံကလေၚ်ဂွံတမ်တှေ် ဂတလၟေၚ် (၅) ဂွံဆက်ပ္တိတ်ပၠန်ဂှ် ဒှ်ဟွံမာန်ရ” သာ်ဏံ နာဲပါန်အံၚ် သောၚ်ကလးကဵုရ။

ညးတၠရမျှာၚ် ဒယှေ်လဝ်ပ္ဍဲကဵုကဝးရုပ်အာဲကၟာဲလၟေၚ် (၄) ဂှ် ညးတၠရမျှာၚ်ဒယှ် လျးဟံမန်၊ ညးတၠရမျှာၚ်ဒယှ် ဇြဟာန်မန်၊ ညးတၠရမျှာၚ်ဒယှ် မိမြဟ်သြန် ကေုာံ ညးတၠရမျှာၚ် ကောန်သၟိၚ်မန်ထဝ်ကျာၚ်တအ်မဒှ်ရ။

ညးချဳဒရာၚ်ထ္ၜးရုပ် ဂမၠိုၚ်ဂှ် ကောန်သၟိၚ်ထ္ၜးဇါတ် ရတ်ပေၚ်၊ ညးတၠရမျှာၚ် သာၚ်ဝဏ်၊ ညးတၠရမျှာၚ် သစ္စံ၊ ညးက္တဵုဟရိုၚ် မပၞဟ်၊ ကောန်ဂကောံအာဲကၟာဲယေန်သၞာၚ်မန်ဂမၠိုၚ်ကဵု ဂကောံကွးဘာမန်ဥတုကညၚ်ဂမၠိုၚ်ပါလုပ်ရ။

ကဝးရုပ်အာဲကၟာဲလၟေၚ် (၄) ဏံဝွံ ပရေၚ်တ္ၚဲကာတၟေၚ်တ္ၚဲကောန်ဂကူကီု တ္ၚဲသဘၚ်ကၞာမွဲမွဲသာ်ကီု အပ္ဍဲဍုၚ်ကီု မ္ၚး ဍုၚ်ကီု ဒှ်သွက်ဂွံထ္ၜးပျးသက်သဳသာဓက ယေန်သၞာၚ်အခိုက်ကၞာဂကူမန်မွဲတုဲ ပ္ဍဲအရာသၟတ်မန်တအ် ဂွံထိၚ်ဒဝ် ယေန်သၞာၚ်မန်ကီု ဂွံလှေ်ထ္ၜးပျးကဵု ကောန်ဂကူမန်ကီု သီုကဵုဂကူညးဟလိုၚ်ကီု ဒှ်အစာံတၟေၚ်မွဲဟီုမာန်ရ။