နာဲမာန်– လၟိဟ်စရၚ်ညးစုတ်မာဲကဵု နူကဵုရုၚ်ကမ္မယှေန်ကၟိန်ဍုၚ်စၟတ်သမ္တီလဝ် ပ္ဍဲကဵုဗွိုၚ်မွဲအရာပ်မ္ဂး လၟိဟ်ညးစုတ်မာဲ (၃၀၀) တၠမ္ဂး ဒးပ္တန်ရုၚ်မာဲမွဲဒၞာဲတုဲ ဗော်ပရေၚ်ဍုၚ်ကွာန်ဂမၠိုၚ်ကဵု ညးစိုတ်လုပ်စကဵုပေဲါရုဲမာဲလ္ၚဵုတအ် ဒှ်ဓဝိၚ် ဂွိၚ်ဖေက် အခိၚ်စုတ်မာဲ ဟွံရုမ် ပ္ဍဲတ္ၚဲစုတ်မာဲရ။
ပ္ဍဲတ္ၚဲစုတ်မာဲဂှ် စပ္တံနူဂယးအခိၚ် (၆းဝဝ) နာဍဳပြဟ်ဂှ် ဒဵုကဵုသဝ်တ္ၚဲ (၄းဝဝ) နာဍဳ ဒှ်အခိၚ်စုတ်မာဲရ။ နူ ကဵုရုၚ် ကမ္မယှေန်ကၟိန်ဍုၚ်ပ္တိတ်လဝ်သၞောဝ်ဂှ် လၟိဟ်စရၚ် ညးစုတ်မာဲ (၃၀၀) တၠမ္ဂး အခေါၚ်သိုၚ်ပ္တန်ရုၚ်မာဲမွဲဒၞာဲတုဲ ဒၞာဲလ္ၚဵု အရာပ်/ကွာန်လ္ၚဵု စရၚ်ညးစုတ်မာဲပဵုဂၠိုၚ်နူကဵု လၟိဟ်စရၚ် (၃၀၀) တၠဂှ် ဗွဲမဂၠိုၚ်ဂၠၚ်တုဲ ဒှ်ဓဝိၚ်ကဵုညးအာစုတ်မာဲ တအ် အခိၚ်စုတ်မာဲဟွံရုမ်ရ။
“ယဝ်ရဒှ်ဗီုဂှ်ကွေံ အတိုၚ်လိက်စၞောန်သ္ကိုပ်ရုၚ်မာဲ ကမ္မယှေန်ပ္တိတ်လဝ်ဂှ်တှေ် ရုၚ်ဗွဲမဂၠိုၚ်ဂှ် ညးစုတ်မာဲတအ် အခိၚ် အောန်လောန်တုဲ ဟွံဂွိုအ်စုတ်မာဲဒှ်အာမာန်မံၚ်ရောၚ်” သာ်ဏံ သ္ကိုပ်စန္ဒက်ဗော်ဒဳမဝ်ကရေဇြဳအလုံရးမန် ပွိုၚ်ဍုၚ် မုဟ်ဍုၚ်မွဲတၠ ဟီုရ။
ဂကောံက္ဍိုပ်သ္ကိုပ်ဗော်ဒဳမဝ်ကရေဇြဳအလုံရးမန်တအ် ဒှ်ဓဝိၚ်ကဵုအခိၚ်စုတ်မာဲဟွံရုမ်ဂှ် ကာလညးတအ်စှေ်စန္ဒက်မာဲ ပ္ဍဲဒေသပွိုၚ်ဍုၚ်နာနာဂှ် ညးအုပ်ကာနာနာ ညးမဒှ်အလံၚ်အမာတ်စၞးစၠတ်ထဝ်ညးဍုၚ်ကွာန် ပ္ဍဲပွိုၚ်ဍုၚ်မုဟ်ဍုၚ် သ္ကုတ် ရးမာဲလၟိဟ် (၂) အစာသဝ်နာဲနဲသိုဝ် ဟီုသောၚ်ကလးဒၟံၚ်ကုညးဍုၚ်ကွာန်ဂမၠိုၚ်တအ်သာ်ဝွံရ။
“ညးအာစုတ်မာဲတအ် မှံက်အခိၚ်ဟွံဂွိုအ်အိုတ်တှေ် နူကၠာဟွံစိုပ်တ္ၚဲစုတ်မာဲဂှ် လၟေၚ်ဂၞန်ဇကုဒးမူစိဂှ် ညံၚ်ဂွံအာ ကျောဝ်လဝ်ဟတုဲ ကာလဂှ်မှ ကာလဇကုအာစုတ်မာဲတှေ် ဇကုဟီုကဵုညးတာလျိုၚ်ပ္တိတ်ကဵုတၞးလိက်မာဲတအ် ဂွံဂွံ ပြဟ်ရ” သာ်ဏံ အစာသဝ် နာဲနဲသိုဝ် သောၚ်ကလးလဝ်ကဵုညးဍုၚ်ကွာန်တအ်ရ။
ပ္ဍဲတ္ၚဲဂှ် ညးစုတ်မာဲတအ် ယဝ်ရဇကုဒးလက္ကရဴလေဝ် ပ္ဍဲကဵုရုၚ်မာဲဂှ် အခိၚ်စုတ်မာဲအိုတ်အာ တက် (၄းဝဝ) နာဍဳလေဝ် ညးသှေ်နူဂှ် ညံၚ်ဂွံလုပ်မံၚ်ဒၟံၚ် ပ္ဍဲကဵုခဒမ်ရုၚ်မာဲ ဥပမာ-ဘာတန်ဟာ ဟွံသေၚ်ရုၚ်ဟာ ဖအိုတ် ညံၚ်ဂွံလုပ်မံၚ်ထောံ အပ္ဍဲဂှ်ဟတုဲ ကမ္မယှေန်တအ် ကၟာတ်ရုၚ်လေဝ် ညးသှေ်အပ္ဍဲရုၚ်ဂှ် အခေါၚ်စုတ်မာဲနွံမံၚ်ရောၚ် သာ်ဏံ ညးအုပ်ကာ နာနာဂှ် ဆက်သောၚ်လဝ်နွံရ။
လၟိဟ်စရၚ်ညးစုတ်မာဲ ပ္ဍဲပွိုၚ်ဍုၚ်မုဟ်ဍုၚ်ဂှ် ဖၟိုတ်စရၚ်နွံလၟိဟ် (၁) ကိုဋ်ပြၚ် နွံဒၟံၚ်တုဲ ရုၚ်မာဲဖၟိုတ် (၉၆) ရုၚ်နွံရ။ ဗီုကဵု ကွာန်လ္ၚဵု ကွာန်ကအ်ခပဳထဝ်ဂှ် လၟိဟ်စရၚ်ညးစုတ်မာဲ နွံ (၂၆၀၀) တၠပြၚ်ဂှ် ကမ္မယှေန်တအ် ကဵုအခေါၚ်သိုၚ်ရုၚ်မာဲ (၁) မ၊ ဗီုကဵုကွာန်ကျာ်ရဲ လၟိဟ်ညးစုတ်မာဲ နွံ (၂၅၅၅) တၠဂှ် ရုၚ်မာဲ (၁) မ၊ တုဲပၠန် ဗီုကဵုကွာန်ကၠအ်သတ်မၞိဟ်ညးစုတ်မာဲ နွံ (၄၅၀၀) ဂှ် ရုၚ်မာဲ (၂) မနွံတုဲ ဗီုကဵုကမ္မယှေန်တအ်စၟတ်သမ္တီလဝ် လၟိဟ်စရၚ်ညးစုတ်မာဲ နွံ (၃၀၀) တၠမ္ဂး ဒးဖန်ကဵုရုၚ် မာဲမွဲဒၞာဲရောၚ်ဂှ် အကာဲအရာလၟုဟ်ဏံ စရၚ်ညးစုတ်မာဲ ပဵုၜက်မံၚ်ဂၠိုၚ်နူကဵု ကမ္မယှေန်ခုတ်လဝ်ဂှ်ဟွံအောန်ပုဟ်” သာ်ဏံ သၟတ်ညးမကေတ်ဒၟံၚ်တာလျိုၚ် စန္ဒက်မာဲဒေသမုဟ်ဍုၚ်သ္ကုတ်သၠုၚ်ကျာမွဲတၠ ဟီုရ။
“လ္ပာ်ဒေသပိုဲတေံလေဝ် စရၚ်ညးစုတ်မာဲမွဲမွဲရုၚ်မာဲတှေ် နွံကဵုလ္ၚီကီု အဵုဂှ်တှေ် အာဆိုအ်ဝေၚ် ရုၚ်မာဲရဂွံ၊ သွက်ဂွံအာ စုတ်မာဲဂှ် ဒှ်ဟွံမာန်၊ ပ္ဍဲကဵုမၞိဟ်မွဲတၠတှေ် ဒးစုတ်ဏောဝ် ပိဝါ လဆောဝ်ဒေသလ္ၚဵုတှေ် ပူဂဵုလေဝ်နွံမံၚ်ဏီ သီုဒှ်ပန်ဝါ လေဝ်နွံ ဗီုလဵုေလေဝ် အခိၚ်ဟွံရုမ်” သာ်ဏံ အစာဘာ ညးချဳဒရာၚ် ဒၟံၚ်သွာၚ်လိက်ပတ်မန် မွဲတၠဟီုပၠန်ရ။