တွဵုရးဍုၚ်မန်ဏံ ၜိုဟ်လလံမံၚ်ရ ဟီုမံၚ်အိုတ်ကီုလေဝ် ပ္ဍဲသ္ကုတ်ပွိုၚ်ဍုၚ်ရေဝ်သမၠုၚ်ကျာ ဂတှေ်ပွဳပွူဍုၚ်ခေါဇာတေံ ဟွံၜိုဟ်သြိုဟ်ဏီ ခမဳသၚ်မန် မၞုံဒေသပွိုၚ်ဍုၚ်ရေဝ်ဂမၠိုၚ် ဂးတဴအိုတ်ရ။
“စိုပ်မံၚ်ခေတ်ၜိုဟ်လလံ တၟာလံရ။ ဒေသ ကျာ်ဇၞော်တံ၊ဒေသ တွဵုရးမန် လ္ပာ်လ္တူတေံဟီုတှေ် ၜိုဟ်သြိုဟ်မံၚ်တၟာလံရ။ ဆ္ဂး လ္ပာ်ဒေသ ရေဝ်သမၠုၚ်တေံ ဒဵုလၟုဟ် ဂွိုအ်ဒုၚ်စ ရှ်သာ ၜိုဟ်လလံဏီဖိုဟ်” ဘဒန္တသဳလ ကျာ်ဇၞော်ဘာကွာန်အၚ်ဒၚ် ဟီုဂးကဵု ဌာန်ပရိုၚ်ဗၠးၜးမန်ရ။
ကွာန်ပါၚ်မၚ်ဂၠန် ပွိုၚ်ဍုၚ်ပါ် ခေါဇာ ရေဝ်သမၠုၚ်ကျာဂှ် မဏှေံမဏှေံ ဂကောံဒမၠတံ ဗ္တိုက်အာတ်မိက်မံၚ်သြန်ရ။ ပါဲနူဂှ် ပ္ဍဲဂိတုမာတ် (၈) ဂှ်လေဝ် သၞာဲဒါ နူဒပ်ပၞာန်ဗၟာ ခလရ ၂၈၀ မထ္ၜးဟိုတ်ဗက်ဒမၠဂှ် လုပ်စိုပ်ကၠုၚ်ကွာန်တုဲ ပန်ဂစိုတ်ထောံ ရဲကွာန် ၜါတလဂှ်လေဝ် နွံကၠုၚ်မံၚ်ဂှ် ကျာ်ဇၞော် ဟီုထံက်ထ္ၜးရ။
လိက်စရၚ်လ္ၚဵု ဗီုကောန်ကွာန်တံ ဒးကဵုလဝ်သြန် ကုဂကောံဒမၠ ရေဝ်သမၠုၚ်ကျာ (copy)
ပူဂဵု ဂကောံ မချဳဒၟံၚ်ပရေၚ်မၞိဟ် ဇရေၚ်ဇရေၚ်တံ ရီုဗၚ်ထံက်ပၚ် ကုသ္ၚိကၟိန်အိန်ထံၚ် ကောန်ပါၚ်မၚ်ဂၠန် ၂ တလ ဒးချိုတ်အာဂှ်လေဝ် နူဒပ်ပၞာန် စၟဳစၟတ် သၟာန်သၟုက်မံၚ်တုဲ ဒှ်ဒၟံၚ်ဓဝိၚ်အိုတ်ရ။ အခက်ခုဲ ပရေၚ်သ္ၚိကၟိန်အိန်ထံၚ် မသှေ်တဴမံၚ်ဏံ သ္ဂောံပြေပြံၚ်ဂှ် နကဵုကျာ်ဇၞော် ကေုာံ ဂကောံပရေၚ်မၞိဟ်တံ ထေက်ကဵု သ္ဒး ဗိုၚ်ပရေပရံၚ်ကဵု ရောၚ် ကျာ်ဇၞော်ဂးရ။
“ပ္ဍဲအမှုဂစိုတ်မၞိဟ် ပါၚ်မၚ်ဂၠန်ဏံဂှ် စောဲလဝ်ဂဗုတ် ကုဗိုလ်ဇၞော် ပန်မှာလဝ်ဂှ် နကဵုအမှုဂစိုတ်မၞိဟ်ဖိုဟ်ရ။ အမှုဂစိုတ်မၞိဟ်ဏံ ပွဒဒှ်ဍာံဍာံ ညံၚ်ဂွံမံက်ဂှ် ပိုဲဆက်ရၚ်တၠုၚ်အာ သွက်အိန်ထံၚ် ဒးဒုၚ်လဝ်တံဂှ်ဏောၚ်” ဥူချေတ်တေန် ညးစၞးကၠတ်ထဝ်တွဵုရး ဒေသမာဲဆန္ဒ လၟိဟ်(၂) ပွိုၚ်ဍုၚ်ရေဝ် ဂးကဵု ဌာန်ပရိုၚ်ဗၠးၜးမန်ရ။
ဗော် NLD ပိုဲလေဝ် ပရေၚ်ၜိုဟ်လလံဍုၚ်ကီု ပရေၚ်အုပ်လ္ဒံသၞောဝ်ကီု ညံၚ်ဂွံနွံဂှ် ကၠောန်အာ ချိုတ်တ်ပၠိုတ်တ် ကၠးကၠးမးမးဏောၚ်ရန်လဝ်တုဲ ကိစ္စပရေၚ်ဖေါအ်ဗြေဝ်ဒေသ ကိစ္စပရေၚ်မၞိဟ်တံဂှ်လေဝ် ကၠောန်အာကီုဏောၚ် ဆက်ဟီုရ။
ဂကောံပရေၚ်မၞိဟ်မန်တံလေဝ် ရီုဗၚ်ထံက်ပၚ်သြန်တုဲ ပရေၚ်ဒဒှ်ဍာံ အမှုဂစိုတ်မၞိဟ် ကွာန်ပါၚ်မၚ်ဂၠန် ရေဝ်သမၠုၚ်ကျာဏံ ညံၚ်ဂွံမံက်ဂှ် ရၚ်တၠုၚ်အာကီုဏောၚ်တုဲ သွက်ပူဂဵု မချိုတ်အာ (၂) တလဂှ်လေဝ် ကၠောန်သ္ပအာ ပေါဲရာဒနာမိက် စၟတ်သမ္တီအောန်စိုတ်ကီုဏောၚ် ဂွံတီလဝ်ရ။
ပ္ဍဲဒေသ ရေဝ်သမၠုၚ်ကျာ တွဵုရးမန်တေံဂှ် ဂကောံဒမၠတံ ဆက်ဗ္တိုက်ဒမၠမံၚ်သြန် နွံမံၚ်ဖိုဟ်ဏီဂှ်ရ နူဒပ်ပၞာန်ဗၟာဂှ်လေဝ် ပ္တိတ်လဝ်အမိၚ်လုပ်တိတ်ဂြိုပ်ဟွံဂွံ ကုရဲကွာန်တံကီုရဂှ် ဂွံတီကေတ် နူလဟီုညးဒေသတံကီုရ။
0 Comments