အမှုဗိုလ်ဇၞော် ဇြဝ်မျဵုထိတ် (ခလရ ၂၈၀) ဂးလဝ် မှာရာတုဲ ပန်ဂစိုတ်ဒးမၞိဟ် (၂) ပ္ဍဲကွာန်ပါၚ်မၚ်ဂၠန် ရေဝ်သမၠုၚ်ကျာ တွဵုရးမန်ဂှ် ယဝ်ရပ်စပ်စၟဳစၟတ် ပ္ဍဲရုၚ်သၞောဝ်ဓဝ်သွာၚ်ပၞာန်မ္ဂး တၠခန္ဓတံ သွက်ဂွံအာကၠုၚ် ရုၚ်အမှုဂှ် ဒှ်အခက်ခုဲမာန်ဏောၚ် ညးမဗိုၚ်ရၚ်တၠုၚ်မံၚ် ပရေၚ်ဂဗုတ်ဂှ်ဟီုရ။
“ကိစ္စအမှုဏံ လၟုဟ်စၟဳစၟတ်ဒၟံၚ် ပ္ဍဲရုၚ်ခုၚ်ပၞာန်ဖိုဟ်ရ။ အမှုဏံ ဒှ်ဍာံမံၚ်ဏောၚ် ရုၚ်ခုၚ်ပၞာန် စၟဳစၟတ်ဂွံသာ်ဂှ်မ္ဂး ဒးပအပ်ကဵု ရုၚ်သၞောဝ်ဓဝ် သွာၚ်ပၞာန်ဏောၚ်။ ကာလဂှ်တှေ် တၠခန္ဓတံ ဒးအာ ရုၚ်သၞောဝ်ဓဝ်ပၞာန်တေံဏောၚ်။ ရုၚ်သၞောဝ်ဓဝ်ပၞာန်ပၠန်လေဝ် နွံမံၚ် ပ္ဍဲရးတၞၚ်သြဳတေံဏောၚ်တှေ် တၠခန္ဓတံ သ္ဂောံအာကၠုၚ်ဂှ် နွံကဵုအခက်ခဲ တၟာဂလိုၚ်ဏောၚ်” နာဲသဵုတိၚ် မဗိုၚ်ရၚ်တၠုၚ်မံၚ်ဂှ် ဂးရ။
စၟဳစၟတ်မံၚ်အမှုဟီုဂှ် စၟဳစၟတ်ဂွံဗီုလဵု စိုပ်မံၚ်အဆံၚ်လဵုရောဂှ် မုလေဝ်ဟွံတီဏီ။ အာသၟာန် ပ္ဍဲစကခ (၁၉) ဍုၚ်ရေဝ် ဂှ်ပၠန်လေဝ် ပရေၚ်စၟဳစၟတ်အမှုဂှ် ဍေံတံလေဝ် မုဟွံတီဏီ ဟီုကၠုၚ်သာ်ဂှ်ရ နာဲသဵုတိၚ် ဆက်ဟီုရ။
သ္ကိုပ်ဗၠာဲသၟိၚ် မျေအ်တဝ် သ္ကိုပ်ဒပ်ဗၠာဲသၟိၚ် ပွိုၚ်ဍုၚ်ရေဝ် ဂှ်လေဝ် “အမှုဏံ ဟွံစိုပ်ကၠုၚ် ပ္ဍဲပိုဲဏီ။ လၟုဟ် အဃောစၟဳစၟတ်ဒၟံၚ် ပ္ဍဲရုၚ်ခုၚ်ပၞာန်ဖိုဟ်” သာ်ဝွံ ဟီုလဴကဵုဌာန်ပရိုၚ်ဗၠးၜးမန်ရ။
ရုၚ်ခုၚ်ပၞာန် စၟဳစၟတ်မံၚ် ဗိုလ်ဇၞော် ဇြဝ်မျဵုထိတ် ဖိုဟ်တုဲ နူရုၚ်သၞောဝ်ဓဝ်ပၞာန်တေံလေဝ် ဒဒှ်ရနွံကဵုဒုဟ်ဍာံဍာံ ဖျေံသ္ဂုတ်သွာတ်တုဲ နူဒပ်ပၞာန်လေဝ် ထပ်ပ္တိတ်အမိၚ် ဒဒှ်ရပ္တိတ်ထောံနူဒပ်မှ အမှု ဗိုလ်ဇၞော် ဇြဝ်မျဵုထိတ်ဏံ စိုပ်ရုၚ်သၞောဝ်ဓဝ် ညးဍုၚ်ကွာန်မာန်ဏောၚ် ဂွံတီလဝ်ရ။
ယဝ်ရ နူရုၚ်ခုၚ်ပၞာန် ဖျေံအမိၚ် သ္ဒးဒုၚ်ဒဏ်ထံၚ် ဒပ်ပၞာန်ဏောၚ် ဂးကၠုၚ်သာ်ဂှ်မ္ဂး အမှုဏံ ဟွံစိုပ်ရုၚ်သၞောဝ်ဓဝ် ညးဍုၚ်ကွာန်ရ သာ်ဝွံ ပ္ဍဲဂိတုမာတ် (၂၉) ဒုသ္ကိုပ်ဒပ် ကျဝ်ဝ်ဥူ နူစကခ (၁၉) လဴက္လးလဝ်နွံ နာဲသဵုတိၚ် မဗိုၚ်ရၚ်တၠုၚ်မံၚ်ပရေၚ်ဂဗုတ်ဂှ် ဂးရ။
ပ္ဍဲသ္ဂာတ္ၚဲ ဂိတုမာတ် (၈) ၂၀၁၆၊ နာဲမဵု ကဵု မာံချေတ်သဵု ကောန်ကွာန်ပါၚ်ဂၠန် (၂) တလ သွက်ဂွံစှေ်နှေဟ်ဂၠုၚ် တိတ်ကၠုၚ် နူသ္ၚိ အဃောကွာ်မံၚ်ပ္ဍဲဂၠံၚ်ကွာန်ဂှ် ဗိုလ်ဇၞော် ဇြဝ်မျဵုထိတ် နူကရောၚ်ပၞာန် ကၠုၚ်နူရးတၞၚ်သြဳ ပန်ကဵုလွဟ် ချိုတ်အာသီုၜါတုဲ အမှုပန်ဂစိုတ်မၞိဟ်ဏံ က္တဵုဒှ်ကၠုၚ်ရ။
ဟိုတ်နူဂှ်ရ ပ္ဍဲဗ္ဒိုပ်ဗၠာဲသၟိၚ် ဍုၚ်ခေါဇာ ပံက်လဝ်အမှု အမှုဂစိုတ်မၞိဟ် နကဵုၝောံပိုဒ် (၃၀၂) ကုဗိုလ်ဇၞော်ဇြဝ်မျဵုထိတ် မပန်မှာရာအာ ကုကောန်ကွာန်ပါၚ်မၚ်ဂၠန် (၂) တလ ဒေသပွိုၚ်ဍုၚ်ပါ် ခေါဇာ ရေဝ်သမၠုၚ်ကျာ တွဵုရးမန်ဂှ်ရ ဂွံတီကေတ်။