Eng
ဗမာ
ပ္ဍဲဂိတု မေ စၟတ်တ္ၚဲ ၂၁ ဂှ် နူကဵုအကံၚ် Facebook မွဲတၠ ပ္တိုန်လဝ်ဂှ် “ဒပ်KNU တံဒပ်လၟိဟ် (၁) ဖျေံလဝ်သ္ဇိုၚ်ပ္ဍဲကဵုတိဍာ်တွဵုရးဍုၚ်မန်ဏံဂှ် နူကဵုဒပ်ပၞာန်ဗၟာ က္ဆံၚ်ဗိုလ်ဇၞော်လေဝ်ပါ သီုကဵုက္ဆံၚ်အကြပ်ဇၞော် ကဵု ကောန်သ္ဂံၚ် ဗၞတ် ၁၃၇ တၠတအ် ဖျေံထောံလွဟ်ကု ကေန်အေန်ယူ တံ ရောၚ်” ဂှ် ချူပ္တိုန်လဝ် သာ်ဝွံရ။
ပ္ဍဲကဵုဂိတုမေ စၟတ်တ္ၚဲ ၁၆ နူကဵုမုက်လိက် KMO media ဂှ် ပ္တိုန်လဝ်ပရိုၚ် ဒဒှ်ရ ညးတာလျိုၚ် DKBA (ကရေၚ်ဗုဒ္ဓဘာသာ) သီုကောန်သ္ဂံၚ် ၂ လက် ပံၚ်တောဲကဵု ဗော်ကရေၚ် ကေန်အေန်ယူ သီုကဵုဗီုရုပ်တုဲ မၞိဟ်ကလေၚ်တြးပ္တိတ် နွံဗၞတ် ၆၈၀ တၠပြၚ်ဂှ် နူကဵုဌာန်ပရိုၚ် (တွေးပြီးမှယုံ) တအ် သ္ပဒတန်လဝ်နွံဒၟံၚ်ရ။
ပ္ဍဲကဵုဂိတု မေ စၟတ်တ္ၚဲ ၁၅ အခိၚ်နူဂယးပြဟ် ပရိုၚ်ဏအ်ဂှ် ပြးတိတ်အာဒၞဲါဗွဲမဂၠိုၚ်ရောၚ်ဂှ် ဂွံတီကေတ်ရ။ ပရူပရာမပါလုပ်ဒၟံၚ် ပ္ဍဲကဵုပရိုၚ်ဏံဂှ် အံၚ်သာန်သုကျဳဂှ် ထ္ပက်လဝ်စၟတ်တဲ ဂွံရိုဟ်ပလီုထောံ ဗော် NLD တုဲ သွဟ်ပေဲါရုဲမာဲ သၞာံ ၂၀၂၀ ဏံလေဝ် လုပ်ပွိုၚ်သၞောဝ်ဟွံသေၚ်ဂှ် ထ္ပက်လဝ်စၟတ်တဲရောၚ်ဂှ် ဓမံက်ထ္ၜးလဝ်ရ။ ဆေၚ်စပ်ကဵုကိစ္စပရူပရာပရိုၚ်ဏံတုဲ နူကဵုဌာန်ပရိုၚ် (တွေးပြီးမှယုံ) တအ် ဂၠိုက်ဂၠဲါလဝ်ဂှ် ဒှ်ဒၟံၚ်ပရိုၚ်ကောလဟာလ မွဲပိုဒ်ရောၚ် ဂွံဆဵုကေတ်ရ။
ပ္ဍဲကဵုစၟတ်တ္ၚဲလိက်လလောၚ်တြးပ္တောံ မတြးပ္တိတ်လဝ်ဂှ် ပ္ဍဲသၞာံ ၂၀၂၁ ဂိတုမေ စၟတ်တ္ၚဲ ၁၂ တေံရ။ တၚ်နၚ်အဓိက မချူပ္တိုန်လဝ်ဂှ် ပ္ဍဲကဵုလိက်လလောၚ်တြးဂှ်မ္ဂး “ပ္ဍဲသၞာံ ၂၀၂၀ ဂိတုနဝ်ဝေန်ဗာ စၟတ်တ္ၚဲ ၈ ဂှ် ဒှ်တ္ၚဲကၠောန်သ္ပကၠုၚ်လဝ် ပေဲါရုဲမာဲမွဲတုဲ ပေဲါရုဲမာဲဏံဂှ် ဒှ်မာဲအလီမွဲရောၚ်တုဲ နူကဵုကံၚ်သဳအုပ်ဓုပ်ကၟိန်ဍုၚ်တအ် သ္ပစၟတ်သမ္တီလဝ်တုဲတုဲရ။ ဟိုတ်ဒှ်သာ်ဂှ်ရ ညးဂှ်မွဲလေဝ် နဒဒှ်ညးစၞးကၠတ်ထဝ်မွဲရောၚ်ဂှ် သ္ပစၟတ်သမ္တီလဝ် ဟွံမွဲရ။” ဂှ် ဒှ်ပရိုၚ်ပ္တောံမွဲရောၚ်
အကံက် Nan Mo Zin Phu ပ္တိုန်လဝ်ဂှ်မ္ဂး “ပ္ဍဲကဵုဍုၚ် (မၚ်းတပ်)ဂှ် ဒှ်တိဍာဗၠးၜးကၠာအိုတ်ရ နူကဵုဒစဵုဒစး နာနာ၊ တိုက်သၠဲပိုန်ဒြပ်ကၟိန်ဍုၚ် ကဵု တံဒပ် ၂၇၄ တအ်ဂှ်လေဝ် သီဂွံလဝ်ရောၚ်” ဂှ် ချူပ္တိုန်လဝ် ပရိုၚ်ဟွံဍာံဂှ် ဂွံဆဵုကေတ်ရ။
ပ္ဍဲကဵုဂိတု မေ စၟတ်တ္ၚဲ ၁၂ အခိၚ်နူဂယးဂှ် ပ္ဍဲဒေသတိဍာ်ကချေၚ်ဂှ် ဇၟာပ်မၞိဟ်ဒးလုပ်ယိုက်ဂၠေၚ်ပၞာန်ရောၚ် လိက်လ လောၚ်တြး ဒုၚ်လဝ်ယၟု ကမ္မတဳဗဟဵု KIO ဟီုဂှ် ဒှ်ပရိုၚ်ပတောံမွဲရောၚ် ဂွံတီကေတ်ရ။