ပ္ဍဲကဵုဂိတု မေ စၟတ်တ္ၚဲ ၁၄ နူကဵု Page Facebook မၞုံယၟု “DHA NA- ဓန” မချူပ္တိုန်လဝ်ဂှ် နူကဵုကမ္မယှေန်ပေဲါရုဲမာဲကၟိန်ဍုၚ် နွံသၟဝ်တဲကံၚ်သဳပၞာန်တအ် ပ္တိတ်လဝ်လိက်လလောၚ်တြးမွဲရောၚ်ဂှ် ဒှ်ပရိုၚ်ပ္တောံမွဲရ။
ပ္ဍဲကဵုစၟတ်တ္ၚဲလိက်လလောၚ်တြးပ္တောံ မတြးပ္တိတ်လဝ်ဂှ် ပ္ဍဲသၞာံ ၂၀၂၁ ဂိတုမေ စၟတ်တ္ၚဲ ၁၂ တေံရ။ တၚ်နၚ်အဓိက မချူပ္တိုန်လဝ်ဂှ် ပ္ဍဲကဵုလိက်လလောၚ်တြးဂှ်မ္ဂး “ပ္ဍဲသၞာံ ၂၀၂၀ ဂိတုနဝ်ဝေန်ဗာ စၟတ်တ္ၚဲ ၈ ဂှ် ဒှ်တ္ၚဲကၠောန်သ္ပကၠုၚ်လဝ် ပေဲါရုဲမာဲမွဲတုဲ ပေဲါရုဲမာဲဏံဂှ် ဒှ်မာဲအလီမွဲရောၚ်တုဲ နူကဵုကံၚ်သဳအုပ်ဓုပ်ကၟိန်ဍုၚ်တအ် သ္ပစၟတ်သမ္တီလဝ်တုဲတုဲရ။ ဟိုတ်ဒှ်သာ်ဂှ်ရ ညးဂှ်မွဲလေဝ် နဒဒှ်ညးစၞးကၠတ်ထဝ်မွဲရောၚ်ဂှ် သ္ပစၟတ်သမ္တီလဝ် ဟွံမွဲရ။”
ပရိုၚ်ဏံဂှ် ဒှ်ပရိုၚ်ပ္တောံမွဲရောၚ် ယဝ်ဒးထ္ၜးသက်သဳမ္ဂး ဒၞဲါသုၚ်စောဲလဝ် Logo ကမ္မယှေန်ပေဲါရုဲမာဲကၟိန်ဍုၚ်ဂှ် ခေပ်ကုတ်ကေတ်လဝ် နူဗီု Logo တမ်မူလ ကမ္မယှေန်ပေဲါရုဲမာဲတုဲ ကလေၚ်ကၠောန်ပဠေဝ်လဝ် နကဵု Photoshop မွဲရောၚ် ဂွံတီကေတ်ရ။ တုဲပၠန် တၞးလိက်စက္ခူစကာလဝ်ဂှ် တၞဟ်ခြာနူကဵုတၞးလိက်စက္ခူ ကမ္မယှေန်ပေဲါရုဲမာဲတအ် သုၚ်စောဲလဝ်ရ။ Logo ကမ္မယှေန်ပေဲါရုဲမာဲကၟိန်ဍုၚ်တအ် သုၚ်စောဲလဝ်ဂှ် နွံဒၟံၚ်ပ္ဍဲကဵုလ္ဒေါဝ်တၞးလိက်စက္ခူဂှ်ရ။
ပ္ဍဲကဵုဂျာနေဝ် (မြန်မာ့အလၚ်း) တအ် ဓမံက်ထ္ၜးလဝ်ဂှ် လိက်လလောၚ်တြးဏံဂှ် နူကဵုကမ္မယှေန်ပေဲါရုဲမာဲကၟိန်ဍုၚ်တအ် တြးပ္တိတ်လဝ်ဟွံသေၚ်ရောၚ်၊ ဒှ်လိက်လလောၚ်တြးပ္တောံမွဲရောၚ်ဂှ် လလောၚ်တြးလဝ်ရ။
ပ္ဍဲကဵု Page Facebook ကမ္မယှေန်ပေဲါရုဲမာဲကၟိန်ဍုၚ်ဂှ်လေဝ် ချူပ္တိုန်လဝ်ဟွံမွဲရ။ Page Facebook ဏံဂှ်လေဝ် စနူကဵုဂိတုဇြေန်နာဝါရဳ စၟတ်တ္ၚဲ ၂၈ တေံတုဲဂှ် ရပ်စပ်စကာကၠုၚ်လဝ် ဟွံမွဲရောၚ် ဂွံတီကေတ်ရ။
ပရိသာတ်မန် ညးမဗှ်လ္ၚတ်ဒၟံၚ် ပရိုၚ်တအ်လေဝ် ဆေၚ်စပ်ကဵုကိစ္စလိက်လလောၚ်တြးဗီုတၞဟ်တအ်ဂှ် ဇၟာပ်မၞိဟ်ချူပ္တိုန်လ္တူလာၚ်မာန်ကီု၊ Page Facebook လ္ၚဵုတအ်ဂှ် သ္ပညံၚ်ရဴ ဌာန်ပရိုၚ်လုပ်သၞောဝ်မွဲတုဲ တၚ်နၚ်ဟွံဍာံဂမၠိုၚ်တအ်ဂှ် ချူပ္တိုန်စလေပ်ရ။ ဟိုတ်ဒှ်သာဂှ်ရ ပရိသာတ်မန်ပိုယ်တအ်လေဝ် ဆေၚ်စပ်ကဵုကိစ္စ ပရိုၚ်ဟွံဍာံ၊ ပရိုၚ်ပ္တောံဂမၠိုၚ်တအ်ဂှ် တိုန်စိုပ်လ္တူလာၚ်မ္ဂး ညံၚ်ဟွံဂွံပတှ်ေစှ်ေစိုတ်ပြဟ်ဟ်ကီု၊ ညံၚ်ဂွံလ္ၚတ်ဂၠိုက်ဂၠဲါရံၚ် ပ္ဍဲကဵုဌာန်ပရိုၚ်လုပ်သၞောဝ်တအ်ညိဂှ် မိက်ဂွံဗတိုက်ဖအောဝ်ဏာရ။