Eng
ဗမာ
ပ္ဍဲကဵုဂိတု မေ စၟတ်တ္ၚဲ ၁၂ ဂှ် နူကဵု အကံက် facebook “KhinMaung Htay” ပတိုန်လဝ်ဂှ် “ဒပ်ဗၠာဲသၟိၚ်တအ် မဖျေံလဝ် ပ္ဍဲကဵုရုၚ်ဂဥုဲ ဍုၚ် (မြၚ်းခြံ) ဂှ် လွဟ် ၁၃ ဇကိုအ် သွံလဝ် ဗၞတ်သြန် ၃၀ ကိုဋ်တုဲ လုပ်သ္ပ CDM ရောၚ် ပရိုၚ်တိတ်မံၚ်တအ်” ကဵုလဝ် Credit ချူပတိုန်လဝ်ဂှ် ပရးတိုန်ဒၟံၚ် လ္တူလာၚ်တအ်ရ။ ပရိုၚ်ဏအ်ဂှ် မၞိဟ်ဒးစိုတ်လဝ်ဂှ် နွံ 1.9 k ကီု၊ မၞိဟ် comment လဝ်ဂှ် နွံ 106 ကီု၊ မၞိဟ်ကလေၚ်တြးပတိတ်ဏာဂှ် နွံ 466 ရောၚ် ဂွံတီကေတ်လဝ်ရ။
ဗွဲတၟေၚ်မ္ဂး ပ္ဍဲကဵု Live ပရိုၚ်ပ္တောံဂှ် မၞိဟ်ဗၞတ် ၄၀ ပြၚ်ချိုတ်အာနွံဂှ် တုပ်ညံၚ်ရဴ ပ္ဍဲဂိတု မာတ် ၁၄ ဗီုဗီဒဳယိုဝ် က္တဵုဒှ်ဒၟံၚ် ပ္ဍဲရးဒဂုၚ် ပ္ဍဲပွိုၚ်ဍုၚ် လှိုၚ်သာယာကီု၊ ပ္ဍဲကဵုရးအၚ်ဝ ကဵု ရးမကွေကီုတအ်ဂှ် ဖန်ဗဒှ်လဝ် Live ပ္တောံတုဲ ဗက်ဗလးဒၟံၚ်တအ်ဂှ် ဂွံဆဵုကေတ်ရ။
ပ္ဍဲကဵုဂိတုအေပရဴ စၟတ်တ္ၚဲ ၂၉ အခိၚ်ၜိုတ်သဝ်တ္ၚဲဂှ် ဟိုတ်နူကဵု အလဵုအသဳပၞာန်တအ် ထိၚ်လဝ်အဝဵုတအ်တုဲ တိုက်သြန် ဗဟဵု ဗွဲမဂၠိုၚ်တအ် သြန်ပိုတ်သ္ကုတ်ဒၟံၚ်ဂှ်ရ သွက်ဂွံပ္တိတ် သြန်တၞးၜါလက်ဒ္ကေဝ်တၟိဂှ် နကဵုယၟု ဌာန်ပရိုၚ် မြဝတီ ဂးတုဲ လလောၚ်တြးလဝ် မပြးတိတ်ဒၟံၚ်လ္တူလာၚ် (facebook) ဂှ် ပရိုၚ်ပ္တောံရောၚ် တီကေတ်လဝ်ရ။
ဒဒှ်ရ ဒပ်ပၞာန်ကောန်ဂကူကရေၚ် (KNU) ကဵု ဒပ်ပၞာန်ဗၠးၜးကောန်ဂကူမန်တအ် ပံၚ်ကောံညးသ္ကအ်တုဲ ဗတိုက်ကဵုဒပ်ပၞာန်ဗၟာတအ် ပရိုၚ်ပြးတိတ်ဒၟံၚ်လ္တူလာၚ် (facebook) ဂှ် ပရိုၚ်ပ္တောံရောၚ် ဂွံတီကေတ်လဝ်ရ။
ပ္ဍဲကဵုဂိတုအေပရဴ ၂၁ ဂှ် ပရိုၚ်ဗဳဒဳယိုဝ်ပြးတိတ်မံၚ်လ္တူမုက်လိက် (facebook) ဂှ် ဒဒှ်ရ KNU၊ DKBA ကဵု BGF တအ် ပံၚ်ကောံညးသ္ကအ်တုဲ သွက်ဂွံဗတိုက်ကဵု တၠအဝဵုပၞာန်ဂှ် ဗဳဒဳယိုဝ် ဏအ်ဂှ် နူကၠာဟွံဂွံသီလဝ်အဝဵုရောၚ် နူကဵု ဌာန်ပရိုၚ် ကရေၚ် (KIC) ဓမံက်ထ္ၜးလဝ် နွံဒၟံၚ်ရ။
ဗီုရုပ်သုၚ်စောဲလဝ်ဂှ် ဒှ်ဒၟံၚ်ဗီုရုပ်တြေံ နူကဵုအခိၚ် ဗော်ဍုၚ်မန်တၟိတအ် ထ္ပက်လဝ်လိက်ကသုက် NCA နူသၞာံ ၂၀၁၈၊ ဂိတု ဖေဖဝ်ဝါရဳ ၁၃ တေံရောၚ်တုဲ အဃောတက်လဝ် ဗီုရုပ်ကဵုဒပ်ပၞာန်ဗၟာဏောၚ်ဂှ် ဂွံတီလဝ် ချိုတ်တ်ပၠိုတ်တ်ကီုရ။ ဟိုတ်ဒှ်သာ်ဂှ်ရ ပရိုၚ်ဏအ်ဝွံ နကဵုတၚ်ရန်တၟံနွံနွံ ချူပတိုန်လဝ်ရောၚ်ဂှ် ဂွံတီကေတ်လဝ်ရ။