ဌာန်ပရိုၚ်မန် (အေပရဴ ၂၁၊ ၂၀၂၁)
ပ္ဍဲကဵုဂိတုအေပရဴ ၂၁ ဂှ် ပရိုၚ်ဗဳဒဳယိုဝ်ပြးတိတ်မံၚ်လ္တူမုက်လိက် (facebook) ဂှ် ဒဒှ်ရ KNU၊ DKBA ကဵု BGF တအ် ပံၚ်ကောံညးသ္ကအ်တုဲ သွက်ဂွံဗတိုက်ကဵု တၠအဝဵုပၞာန်ဂှ် ဗဳဒဳယိုဝ် ဏအ်ဂှ် နူကၠာဟွံဂွံသီလဝ်အဝဵုရောၚ် နူကဵု ဌာန်ပရိုၚ် ကရေၚ် (KIC) ဓမံက်ထ္ၜးလဝ် နွံဒၟံၚ်ရ။
ဗဳဒဳယိုဝ် ဏအ်ဂှ် ဒှ်ဒၟံၚ်အခိၚ်ကၠာ ပၞာန်ဟွံဂွံသီဝဵု လောန်ကၠုၚ်သၞာံ ၂၀၂၀ ပ္ဍဲဂိတု ဒဳဇြေန်ဗာဂှ် KNU၊ DKBA ကဵု BGF တအ်ဂှ် ကၠောန်သ္ပလဝ်ကောံဓရီု ပ္ဍဲကဵုခရိုၚ်မြဝတဳ လ္တူဒဵုမုလအိဂှ် ဗဳဒဳယိုဝ်မွဲမံက်ဂတဝ်ကၠုၚ်တုဲ ဒှ်ဒၟံၚ်ဗဳဒဳယိုဝ် နူအခိၚ်ပ္ဍဲကောံဓရီုဂှ်ရောၚ် ညးဒေသမုလအိမွဲတၠ ဟီုဂးလဝ်ရ။
“အခိၚ်ကၠာတေံဂှ် ဆေၚ်စပ်ကဵုကိစ္စဂြိပ်ဆုမုလအိတုဲ ဆဵုလဝ်ညးသ္ကအ်နွံရ၊ ဗဳဒဳယိုဝ်ဏံဂှ်လေဝ် တုပ်မံၚ်ကဵုရမျာၚ်အခိၚ်တေံရ၊ အခိၚ်သီအဝဵုတုဲဂှ် ကောံကလောံဗီုတအ်ဏံဂှ် မွဲအလန်ဟွံဂွံကောံဏီပုဟ်” သာ်ဂွံ နူကဵု KNU ဟီုဂးကၠုၚ်လဝ်နွံရ။
ဗဳဒဳယိုဝ်ဂှ် အခိၚ်ကၠာတေံ ဒပ် BGF စၟတ် ၄ သ္ကိုပ်ဒပ်တွဵုရး ကဵု ၁၀၂၂ သ္ကိုပ်တံဒပ် ဗိုလ်ဇၞော် သဝ်မုက်တုမ် (စောမုတ်သုန်) ဒပ်စဵုဒၞာကောန်ဂကူကရေၚ် (KNDO) သ္ကိုပ်ဒပ်ပၞာန် သ္ကိုပ်ဗိုလ်ဇၞော် (စောနယ်ဒါးမြ) နူကဵု DKBA (ဗိုလ်ရေႊဝ) ကဵု နူကဵု KNLA သ္ကိုပ်တံဒပ်မွဲတၠတအ် ပါလုပ်ဒၟံၚ်ဂှ် ဟီုဂးသဳကၠဳညးသ္ကအ်နွံကၠုၚ်တုဲ ညးတအ်ကဵုညးတအ် အဃောဆက်ဒၟံၚ်တဲဂှ် တက်လဝ်ဗီုရုပ်စၟတ်သမ္တီလဝ် နွံကၠုၚ်ဒၟံၚ်ကီုရ။
အဓိက က္ဍိုပ်သ္ကိုပ်တအ် သဳကၠဳလဝ်ဂှ်မ္ဂး မွဲဂကောံကဵုမွဲဂကောံ ညံၚ်ဟွံဂွံပန်ပှော်ညးသ္ကအ်ကီု ညံၚ်ဂွံမံၚ်အာ ကောံကောံကလောံကလောံကီု ဟီုဂးလဝ်ရ။
သ္ပဟိုတ်နူကဵုတၠအဝဵုပၞာန်တအ် ပန်ဗတိုက်သရိုဟ်ဒၟံၚ် ညးထ္ၜးဒၟံၚ်ဆန္ဒဂှ် အဃောကောန်ဍုၚ်အရၚ်တအ် ကဵုဇြဟတ် ထံက်မံၚ်ဂလာန်ကဵု ဂကောံရပ်လွဟ်ကောန်ဍုၚ်အရၚ်ဂမၠိုၚ်တအ်ဂှ်ရ ဗီုကဵုလၟုဟ် ဆေၚ်စပ်ကဵုကိစ္စတၚ်နၚ်ဗၠေတ်တ် လ္တူဗော်ရပ်လွဟ်ကောန်ဍုၚ်အရၚ်တအ် ပရးတိတ်မံၚ်လ္တူမုက်လိက်တအ်ဂှ် ဂွံဆဵုကေတ်ဒၟံၚ် ဗွဲမဂၠိုၚ်ရ။
Reference>>Karen Information Center -KIC